Read Lamkang 1 TIMOTHI 2 Bible Online

1 TIMOTHI 2 - Lamkang bible

1 TIMOTHI 2

¹Ava leiji ru kri reeppi neiji aka ktham chaakka tditta kṭhil cha, kaktham cha ungu kpanpaak ava mii mkheng tummi ado tlot ra;

²kruwng rek ungta kparthaang ngi ka am mii mkheng rek, tditta nenni mlam ktai thu rinkhu kdaaiji, Isowr ktong tha, ungu mii do kjatti ta amra.

³Hava ava kṭha, ungta nenna mikaktlan pik Isowr mik sut na thu talo kro.

⁴Mii mkheng ktlan pik da, ungu kindit ava kṭha deek ki kdei cha Mma ngi mdo ngei.

⁵Mleija Isowr khat ka am, ungu Isowr leh mii rek arlakki pau kpurlon khat ka am, dultimii kurthuwkki Jisu Khrista ngi,

⁶mdaksaa ava mii mkheng tummi kṭenthuw rang leiji pii chda, Mma rinkhu paumin ava mpha kcha deekki sakhi hur pikda.

⁷Hava leiji neia pau kparyaam khat ungta kenyee ngi mdo tukchol dok (Neiji mkindit pau kthe kcha ping, plei nei maang), krin cha leh kindit ava ngi ktlok chati rek chukpu khat ping.

⁸Ava leiji mmun ktai thu psel rekki kchiir khut khiingda plung kthi ktaak mdit mata kar ai kalrai ktaakki mdo ṭhil chaak raan ava neiji kngei chaakka.

⁹Anto lulu ngi snu rek ruk va mkul ka am ungu talo kro dona kṭha deekki hiil naada, msam keher mdit mata jeering mdit mata anto lu kdu dona mman klu langlang ngi kurthlong kma,

¹⁰pdainu kṭha nongtu dhormo kcheel snu rek mkurthut raan.

¹¹Snu khatti kdung plung kparneem mkheng tu kilṭhi ngi rim kdi kurchuk chso.

¹²Snu ku khat lee ngi psel rek tun ni kpurchuk mdit mata rutan mdo thloi ra ava neiji ro maang; mma ava rim kdi ma amra.

¹³Mleija ru kri reeppi Adam mdo seem, audilli Ev;

¹⁴ungta mdo huwn chaakka Adam pme, pdainu snu ungu pnu ktla.

¹⁵Anto daat joso snu ava ngi mkul ka am deek tu kilṭhi ngi krin cha thu ungu wonsat leh kchiir deek thu mkurnowl thlit bi, nao mupluk thu kaktlan pik chra.