Read Lamkang 1 TIMOTHI 3 Bible Online

1 TIMOTHI 3 - Lamkang bible

1 TIMOTHI 3

¹Tithe ava mkindit kat: Ku mii khatti Rinlop thu ber msuk nuwmbi, kṭha sii nong ava mngei chaakka.

²Tunva Rinlop ber ksu ava mdang kthi kma, numei khat innpu, plung kparneem, daksaa kurjowng pchaang, mal kokowl dei, kpurchuk dei,

³ju knee kma, plung kthi dei kma, pdainu plung kdowng, mii tu kalrai kma, ungu sum kngei kma ra.

⁴Mma ngi mnaole ava mlam khim khai thu kthe kupṭoi ungta mii kakjatti mdo thiik ra, mdaksaa ki phungka ava kṭha ngi mdo loloira.

⁵Mleija miilai khatti mdaksaa ki phungka daat mak klu kṭha ngi mloloi demabi, tak heppi Isowr Rinlop ava mmava tuk ksut pchaang rang da?

⁶Mma ava plungren kuhur ro thok ava rang pme, mleija mnaar klin reenra, ungu dijabowl hin mraal mdo piik ava lulu thu ktla kcha kro.

⁷Kheel sii ngi mma ava duwnki mii rekki kunton dokki mdo kjat rek rek kurthuwk ra, ava che donle mma ngi plung parheel da, dijabowl ktaang thu kman nime.

⁸Anto lulu ngi dekan rek rukka kdung plung klut, plei kanthlaang kma, ju knee nuwm kma, ungu sumlot tun mkraam rang pme;

⁹mmaanni kindit chelki poithuw tu kilṭhi ngi krin chaki kukthuk ava mdo kjown mer chaak raan.

¹⁰Ungta mmaan rukka ru kri reeppi kpirsin na chlamso; audilli mmaan mdaksaa ava tupsul na ma am mata dekan rek heppi sok alou chlam so.

¹¹Anto lulu ngi snu rek ruk va kdung kṭha ngi plung klut, titi ktadah kma, pdainu plung kdowng do mkheng thung ngi lamtrin chaak kurhui mkurthut raan.

¹²Dekan rek rukka numei khat ki innpu ra, ungu mnaole ungta mphungka ava kṭha ngi mdo loloi ra.

¹³Mleija nong kṭha deekki ksu dekan mii rek ava mdaksaa tummi kṭha mdo phaak chaak in ungu Jisu Khrista hin ka am krin cha ava thu kdung plung ngam kpha kcha ruk kurthuwk lam.

¹⁴Neiji nah hintha kbeiji kthlen ra ava kdo bin chaak,

¹⁵pdainu nei kukto dok daat luwngta, Isowr ki phungka thu tak heppi tche tatlown rang tdit ado dee nra, neiji hava paurek ava ahin kikjit kcha kurthuwk ping, inn ava kring Isowr ki Rinlop, mkindit kcho.

¹⁶Nenni dhormo ki kukthuk pau ava klin langlang ngi kurdowl tdit trot dok in: Mma ava daksaa arling ngi kandang da, Pthla ngi anto kat mi purthut pik inda, Waan tamsii rekki dei dok da, chati rek arlakki karyaam dok da, dultipaam miingi lamrin chda, laarnee ngi arjuk lou dok da.