Read Lamkang 1 TIMOTHI 4 Bible Online

1 TIMOTHI 4 - Lamkang bible

1 TIMOTHI 4

¹Tunva kindit chelli Pthla ngi theda tditta mii angṭhe ngi diltha pthla rek hin ungu tarnam rek paurin hin, plung var psuk donle mlamrin chaak in thungki kankai chlamra.

²Hava ava plei knei rek kṭha do tlot ktlo rek hinki kthuwk.

³Hanto lu hep daat mii murson rekki inn knei snu klou rome ungta then murson ava ruk kchaa rome di lamda. Pdainu then ava kindit kdei lamkrin cha mii rekki panpaak da mṭhil chaak diltha tchaak ra mleija Isowr do seem.

⁴Mleija Isowr do seem khim khaija kṭha, ungta panpaak da nenni narlaan bi, tipthlei ra do khat lee ame.

⁵Mleija Isowr ki pauna leh kaktham kcha ngi mdolo kurhui dok.

⁶Nang ngi hava pauna rek ava ku u knao rek plung thu atithiik pik chaakbi, nang nga krin cha ki pauna rek tun ni mdojuw, ungta nah doṭoi kṭha paurin, Jisu Khrista ki kṭha sok klou khat nadi.

⁷Isowr ktaak leh alraangki do ksi kma paumin pṭoi ma. Isowr lamṭoi na thu nah adaksaa ava kurchuk cha.

⁸Mleija daksaa ktongki kurchuk ava mpha mruk daat ki tum, Isowr ktongki ava mlam khim khai thu msit pum, mleija ava ngi tun tunki rinkhu leh karvang rangki rinkhu tum ruk va msit ka am langlang paureel pum.

⁹Kdo the ava anto kat ungu kdung ngi talo chaak ra kurhui.

¹⁰Mleija mṭut na kpha dekki nenni tapchaan nrangki hava nong nga tsuk, mleija mii mkheng, kheel sii ngi krin cha rek mdo ktlan pik nra, kring Isowr hin nenni plung ngi tbin chaak in.

¹¹Pau areen ra ungu hava lea apurchuk.

¹²Nah akselai ava ku mii khat lee ngi do ksi kma ngi bin mso, pdainu nang nga krin cha rek tummi pau ksaam thu ungu ache atlown na thu, wonsat thu, krin cha thu, kchiir deek thu mkurchu chaak naan ni am.

¹³Nei kthlen du khim khai, Laaika kpa, pau kparyaam, kpurchuk thu plung aplut cha.

¹⁴Karseel loppi aleenni mkhut in mkhiin in mpha thu, khulpu rek pauphuwn nah hin ado tpiik chaak chla ado thloi ava lee sut daak ma.

¹⁵Mii mkheng ngi nah nong tlot kṭha setset ava mdo dee nraan, hava nong rek atlo ra adaksaa ava karpii cha.

¹⁶Nah adaksaa leh ado purchu thu plung aplut cha, ava arpom mer cha, mleija hava ktlo ngi nah adaksaa leh akaryaak pik rek kaktlan pik ra.