Read Lamkang 1 TIMOTHI 5 Bible Online

1 TIMOTHI 5 - Lamkang bible

1 TIMOTHI 5

¹Upa arkowk ma pdainu apah khat lulu ngi mhin ak ksop cha; ahinni kmo bet ava a u anao lulu ngi atlo,

²snu kver ava anuhle lulu, nala kdowng rek ava acher rek lulu ngi plung kseeng mkheng tu kilṭhi ngi abin.

³Mkindit katti meikhu kurthuwk rek ava meikhu rek heppi ak kjat.

⁴Meikhu khatti mnaole mdit mata murdu marte mthloi ta, mmaanni mmaan mdak kat inki phungka thu dhormo ki nong ktlo ngi, mnuh mpah hin mruk mdo pinlet pik nra kurchuk chso; mleija hava Isowr do sut na thung ngi talo kro.

⁵Mkindit kat ki meikhunu ungu msangtlaak ki ka am mma ava kdung ngi Isowr kbin cha ungu suwnjaan knai kma ktham sora aṭhil chso.

⁶Pdainu mdaksaa ningthlun nra ktlo ava mma ngi mrin slii daat thu kdiyou cha.

⁷Mmaan thung ngi kar mak ma amma nra, hava pauva areen pik lam.

⁸Ku mii khatti mma riilam kthuwk rek, ungta kheel siingi mma mdaksaa kat phungka thung ngi mpurdon pik mata, ungta mma ngi krin cha thu mmat bi, krin kma rek kepkheel dek kurthuwkka.

⁹Kum som truk kthlung kma lai meikhunuh ava miing kuplut ro me, vei khat pang daatti innknei kurthuwk kro;

¹⁰ungta kṭha nong ktlo thu plung klut, kṭha ngi nao kjuwk dei, mal kokowl dei, kja kakham kpha rek kpurdon pik dei, kintiing rek khu kulṭhut pik dei, ungu mlam khim khai thu mdaksaa ava kṭha nong ktlo thu plung mvar chaak bi, mmiing kuplut krora.

¹¹Pdainu meikhu rek kmo ava mmiing kuplut rome; mleija mmaanni innknei snu klou rangki mbin inbi, Khrista hinki mdil kinle chlamra.

¹²Ungta ava leiji mmaan ava ru kri thokki mpaureel dok in kupkui lamra.

¹³Ava daat kma, mmaanni innbung ktai khuwlai tlowng lamda howngkva kurchuk nlamda, ungu howngkva daat kma pdainu mmaanni mdo the liit ma raan pau the lamda, kho kthe leh daksaa kirsim thu nong pchil lamda.

¹⁴Ava leiji meikhunuh kmo rekki inn nei da, naolu kthloi, innpaal na ktlo, ungta nen nraal kpii ngi kipteng mii hin mlam kapvan pik kmara ava neiji kngei chaakka.

¹⁵Mleija mii angṭheva lele dung ngi seitaan dil mṭoi chaakka.

¹⁶Ku mii khatti krin cha meikhunu snu miilai khat mthloi ta, mma ngi asut pṭoi pik lamso; Rinlop bowr tiprik lam mso, tditta ava leiji mkindit kat ki meikhu rek ksut pṭoi pik chra.

¹⁷Kṭha deekki ber ksu kver rek kheel siingi pau kparyaam leh kpurchuk nong ktlo rek ava sik kheel dekki takjat chaak lamra.

¹⁸Mleija Kchiir Laaika ngi theda, “Chavui ado pther slii silpa ner ava ado ktut rang pme,” Ungta “Nong ksu mii ngi marda man mdo arlaan chaak kat ra.”

¹⁹Anto kat kdingi sakhi kpii ra knii mdit mata kdum kma donle kver khat kupsulli mraal khat lee kpii rome.

²⁰Mii murson rekki kṭi ngi ma am nraan, pnu thu kurnowl daat mii ava mii mkheng maiṭhuwm mi mhai arko pik cha.

²¹Ksan ksui khat lee tlo ma, ungta ksan ksui ktaakki hava nopa rek ava ado arkhiik nra, Isowr leh Jisu Khrista ungta mdo kchol Waan tamsii rek maiṭhuwmmi neiji ahin hava pau kakham chaakka.

²²Ku mii khat lee tun ni kuknot reenni khut khiing ma, mdit mata ktlok miilai khat pnu arve phaak ṭhi ma; adaksaa ava kchiir deekki arkhii cha.

²³Dii hehe daat nee nowl ma, pdainu apoidun leh akoi de reen leiji rik rou dii mruk ruk anee.

²⁴Mii murson rek pnu ava makṭewl du liitti kuntown chdok, pdainu mii murson rek pnu ava dil thang ro ngi kandang lu.

²⁵Ava leiji kṭha nong ktlo rek rukka kunton dok; ungta mmaanni pandang liit mjoso, kurdowl pchaang lam pme.