Read Lamkang 1 TIMOTHI 6 Bible Online

1 TIMOTHI 6 - Lamkang bible

1 TIMOTHI 6

¹Isowr miing leh mdo purchu pau ava tun ni ku mii khat lee ngi kṭha kma mdo the ma nra, suwk owr rek va bowr krik kuhur mkheng kakjat mkheng kuhui mkurthut lulu ngi, mmaan ki kpu rek ava akjat lamso.

²Krin cha slii kpu kthloi cha rekki mmaan ki mu u mnao in mkurthut leiji, mmaan ava do ksi kma thleerri ktlo rome, mmaan sok klou kpha kcha rek ki krin cha leh wonsat kthloi mkurthut lei inni mmaan va kheel set setti sok alou chlam so. Havale apurchuk ra aparyaam pik lam.

³Ku mii khatti pau msik khat liklik purchuk da ungta nenki Mukpu Jisu Khrista ki pauna rek krowl ava mrot ma, ungu Isowr ktongki kpurchuk thu kinṭim mkurthut mabi,

⁴mma ava pleiknei mnaar linna ngaal, mma ngi do khat lee dei me; pauna rek mlei thu mma ngi do ksi kma poibin leh kar ai kalrai ungu karteen, pthuwkda, ava dothuw ṭhia changtlaak, ksinchaak, titi ktadah, kju kva poibin,

⁵kindit kthloi kma arthluwk ktaak lulu ngi mii rek arlakki pau karteen psuk nlamda, tditta Isowr ktong ki ava tphaak chaak kro pak da kdingi bin lamda hava mkheng nga kthuwk.

⁶Dhormo kṭha ngi kchet miilai ava, mdo thloi chaak thu ning kthlung mkurthut bi ava suwang.

⁷Mleija nenni dultipaam thu do khat lee tsin in pme, ungta nenni dultipaam thungki do khat lee talo pchaan in pme;

⁸pdainu nenni then leh dona nathloi chaak inbi ava tu kilṭhi ngi nenna ning kthlung tkurthut raan.

⁹Pdainu suwang kthuwk nuwm rek ava kepthleem thu, ktaang thu, mong kukto poibin leh klim poibin knempok mii rek ava kar eakrep lamda ungu mkro chaak naan kurthuwk.

¹⁰Mleija sum kngeija kṭha kma mkheng thuwna; hava kngei mii angṭhea mlamrin chaak thuwn ki tlowng parvai lamda ungu kja kakham knem pokki muplung inna kchei do thun heppi mdo ṭhen.

¹¹Pdainu Isowr mii, nah atumva, hava mkheng nga akdaan cha; ungta rinkindit, Isowr ktongki rinkhu, krin cha, wonsat, kdiil dei, plung kparneem, ava aptuwn cha.

¹²Krin chaki kṭha rawl kurduk ṭhi ava akurduk ṭhi cha; kṭuw knai kma ki rinkhu arpom cha, sakhi rek knempok maiṭhuwm mi nong ngi kṭha deekki athe thut mpha thu ado tu own chaak dok.

¹³Do mkheng ava rinkhu kpii kcha Isowr ungta Pontias Pilot hin kṭha deekki ado the thut naki sakhi akpiik pik Jisu Khrista maiṭhuwm mi, Mma ki rinpaumin ava,

¹⁴nah hinni neiji ksil chaak na a. Nenki Mukpu Jisu Khrista mkandan du khim khai Mma paureen ava kurhui deekki ktobor ktaak liitti ado arkhiik chaak nra neiji pau kakham chaakka.

¹⁵Ungta hava phowl kṭha kpii dei khdaat chrel Mkinreel riim, kruwng rekki Kruwng, mukpu rekki Mukpu,

¹⁶ku mii khat lee do dee ma mdit mata do dee pchaan ma, kdiyou liit kmara Mma hin daat ungta titnel pchaanma mar awng thu ka am, Mma mpha kcha deekki kandang ra. Tak kjat kurhui ungu kṭuw knai kma Kpaal ava Mma. Amen.

¹⁷Hava dultipaam thu suwang kthuwk tumva, mmaanni napal mdo tlot ma nraan, mdit mata kmawng chra suwangthuw tuwn ni plung mdo var ma nraan, pdainu nen tkanpat chaak nraan do khim khai mi kuptlon pik nenki Isowr hin tha, mmaanni plung mdo piik nraan, mhin inni pau akham pik lam.

¹⁸Kṭha nong ktlo ngi suwang mkurthuw nraan, mmaanni kṭha atlo lamso, changtlaak ktaak ungta plung kneiji apii chlamso.

¹⁹Tditta mmaanni rinkhu katki rinkhu ava mdo arpom chaak nraan, dilki tummi kṭha innmun kapṭhang kurthuwkki, mmaan mdaksaan tumra apurtuwl chlam so.

²⁰O, Timothi, nah hinni ado tsil chaak na ava kṭha deekki arkhii cha. “Kdei dok” Ava thungki kthuwk do ksi kma pau leh Isowr lamkrin kma luki pau pang the ngi kthe ava aser cha.

²¹Mleija “Kdei dok” ava mii angṭhe ngi mdo phaak chaak nuwm leiji krin cha ki kbii nam mapmaan pthiinna. Plungnee ngi aju kurthlo ṭhi chso.