Read Lamkang 2 TIMOTHI 2 Bible Online

2 TIMOTHI 2 - Lamkang bible

2 TIMOTHI 2

¹Ava mkurthutbi, nei kchapa, nang nga Jisu Khrista thu plungnee ngi arutang so.

²Ungta sakhi rek knempok maiṭhuwm mi nei ki hinki ado aryaak dok ava mii murson rek hin ruk va kpurchuk pchaang ra lamtrin kro mii rek hin asilna.

³Jisu Khrista ki kṭha rawlmii khat heppi kja kakham mhai phaak ṭhi cha.

⁴Mnong ktlo slii rawlmii khatti mma nong kuptlot pik mii ava ning mdo pthlun nrang leiji miicham nong khat lee tu kurchou nme.

⁵Klee kchen kparteek ava mma ngi nopa dil kṭoiji mchen partee mabi mma ngi laarkhum pha chme.

⁶Kpalren da nong klou loumii ava ngi mthei ava ru kri verri mdo phaak chaak ra.

⁷Nei kdo the ava abin rim, mleija Mukpu ngi do khim khai ki kdeipandi kcha ava nah hinni akpii chra.

⁸Neiji kṭha paumin thu, Devid charuwl thungki, kdiyou dok thungki kring kinle Jisu Khrista kdo paryaam ava abin phaak cha.

⁹Hava kṭha paumin tummi, kpar mak khat lulu ngi kja kakham kpha thu ungta mdo tbowl. Pdainu Isowr ki pauna ava bowl me.

¹⁰Ava leiji, mdo kchol dok rek tummi neiva do khim khaija kdo diil chaak, tditta mmaan ruk va kṭuw knai kma ki laarnee tu kilṭhi ngi Jisu Khrista thu kirliinna kpha kcha kro lam.

¹¹Hanto katti the da, “Mma tu kilṭhi ngi nenni ndiyo bi, Mma tu kilṭhi ngi ring che naan;

¹²nenni ndiil pchaan inbi, Mma tu kilṭhi ngi nen rukka tpaalra; nenni Mma nipthleibi, Mma rukva nenna mi kipthleira.

¹³Nenna lamtrin kurhui mjown min, Mma ava lamtrin chaak kurhuiji ka am daat, mleija Mma ngi mdaksaa mat pchaang me.”

¹⁴Hava abin phaak cha, kṭha thuwna kma, mkaryaa mii kar ea krena, pauna rek mlei karteenna thu, mdo kdaan nraan, Mukpu maiṭhuwmmi mmaanna pau mhai reen pik lam.

¹⁵Kindit pauna ava kindit deekki purchuk da, ningkja ktaak liitti nong klou khat heppi Isowr do rot khat lulu ngi nah adaksaa ava kṭha deekki Mma hin apii cha.

¹⁶Isowr kbin kma mii ngi pang pauvi mpau in thungki aser daak lam, mleija hanto lamkla set setti miirek ava Isowr ktaakki kuhowl pthii lamra.

¹⁷Ungta mpau inna arnai doso heppi kso you lamra. Hymenas leh Philetas ava mmaan arlakki rek lam.

¹⁸Kring karheel ava kvei dokka, kdingi kindit ava krin cha rek mii angṭhe plung tpinle pthii tir lamda.

¹⁹Pdainu knetti Isowr do pṭhan dokka hava kbii nam pummi krip daat: “Mukpu va Mma miirek ka mdee,” Ungta “Mukpu miing kthe mii pum ktaiji kar mak nong mdo tlot thungki adown pthiiso.”

²⁰Inn klin khat thungva jeering leh thiir kpowl uwm daat ka am ava pme pdainu dingbeel leh tnek beel ruk ka am, ungta angṭhea kunton dokki mdo sinton ra, angṭhea pang sinni mdo sinra.

²¹Ku mii khatti mdaksaa ava do ksi kma thungki mkartleu chaakbi, ava dil rongi mma ava kunton dok beel khat kurthuwk ra, mdo partleu dok ungu innkpu tummi do ksi langlang, kṭha nong khim khai thu kurchuwl dok cha.

²²Ava leiji ksenao do ngei thungki achen daak, ungta plung kseeng ngi Mukpu miing ku own kcha rek tu kilṭhi ngi, rinkindit, krin cha, wonsat ungu kdaai ava aptuwn cha.

²³Ka aak, mong kukto, mii chei kparche, do khat lee ktlo rome; mṭut na ava kar ae kalrai na tdit nang ngi ado dee dok.

²⁴Ungta Mukpu sra owr ava kar ea kalrai nrang ava pme pdainu mii pum ktai hin wonsat kthloi, kpurchuk dei, kakhaang dei,

²⁵kipteng rek ava plung kparneem mi kpindit pik kurthuwk ra. Isowr ngi rot pik donle mmaanni plung pinle da ungu kindit kdei kcha kro ra.

²⁶Ungta mma poibin ktlora dijabowlli mkjown dok lam diltha, dijabowl ktaang thungki mmaanni mkarthle chaak nraan leiki.