Read Lamkang 2 TIMOTHI 3 Bible Online

2 TIMOTHI 3 - Lamkang bible

2 TIMOTHI 3

¹Pdainu hava adei pandi cha, tditta mṭut na nit rek thungva mpha ava kparsa langlang ngi kthuwk ra.

²Mleija miirekka mdaksaa wonsat klo, sum kngei, napal ktlo, kpohok, mii krai cha, mnuh mpah pau kleek, plung ksel, kbuwr,

³dultimii wonsat ktaak, tparmet kro kmarek, titi ktadah, ktlou dei, plung thit kdet,

⁴plei knei, mpau kdet, kṭha kipder, napalli kdim, Isowr wonsat klo rang kchang nga kanthle ktardou kngei,

⁵dhormo kdujik karpom pdainu ava ki rutan kipthlei, miirek ava aser cha.

⁶Mleija mmaan mii angṭhe ngi innbung ktai tlowng lamda, pnu ngi mbowr in rik da, ungu mpoibin in thu chet lamda, kapchaang chliit kma snu rek kjowng lamda,

⁷mmaanna mpha ktai thu kurchuk chnuwm lam pdainu mkindit kdei pchaang chliit kma rek kjowng lamda.

⁸Jennes leh Jambras ava ngi Mousi mdo pten in lulu ngi, plung bin ktobor ungu krin cha kipthlei mii rek va kindit ava pteng lamda.

⁹Pdainu lam klangi pha chlam nime, hava miilai knii rek lulu ngi, ma aah chaak inna mii mkheng ngi kdeira.

¹⁰Tunva nang nga nei ado kpurchu, nei knopa, nei krinkhu doptuwn, nei kdo rin chaak, nei kdo diil, knet merri ka am nei kwonsat,

¹¹nei ksuwk thuw, nei kjat kakham, Antia thu, Ikoniam thu, Lystra thu nei kleen kthuwk, tak hep kdulu ki suwkthuw neiva kdiil tdit nang ngi ado dee dok; joso ava mkheng thungki Mukpu ngi mdo tiṭenthuw chaak.

¹²Jisu Khrista thung ngi Isowr ktongki rinkhu ngi ka am nuwm mii mkheng ngi suwkthuw mdo phaak kat kat ra.

¹³Kṭha kma mii rek leh kpurtut dei rekki mii huwng chlam da ungta huwn chaak donle karkheel set setti ktipthit lamra.

¹⁴Pdainu nah atumva, nang ngi tak kurchuk cha pti tdit knetti ado rin chaak thung ngi anowl thlit cha, ku hinki kurchuk cha pti tdit ado dee ra,

¹⁵ungu Jisu Khrista krin cha thu akirliin chaak nra nah akthe pik pchaang kurdowl jiik ava rek tu kilṭhi ngi, amot daat ki kurchuk dok cha pti tdit ado deera.

¹⁶Kchiir Laaika mkheng nga Isowr tdaal ungta kpurchuk tum, karkowk ki tum, kipjiir pikki tum, ungu rinkindit tummi kurchuk cha kro,

¹⁷tditta Isowr mii ava kṭha nong khim khai thu kurkhummi kurchuk dok cha.