Read Lamkang 2 TIMOTHI 4 Bible Online

2 TIMOTHI 4 - Lamkang bible

2 TIMOTHI 4

¹Isowr maiṭhuwm leh kdiyou mii rek leh kring mii rek kekṭewl rangki Jisu Khrista maiṭhuwm, ungta Mma kandan leh Mma Kruwngpaam ktham nu neiji aksil chaak na a:

²pauna ava aparyaam, mkaal thung ruk mkaal kma thung ruk kuknotti atlo, atuprot, arkowk, ungu aksop, kdiil cha mkheng tu kilṭhi ngi apurchuk.

³Mleija mii rekki paurin ava mdo dee pchaan ma nraan ki mpha karvangra, pdainu maknaa in kapdak, mmaan mdak kat in do ngeiji kpurchuk chukpu rek ava mmaan mdaksaa inni kthlaam purkuk lamra.

⁴Ungta kindit ti knaa ktikiin thungki kinlet daak lam donle paumin tseem ktong thang ngi plung kpii lamra.

⁵Nah atumva mpha ktai thu kurthlong, kja kakham akhaang dei cha, paumin kparyaam ki nong atlo, anong tlot ava apurkhum cha.

⁶Mleija neia tlaai kdown kpha thu kirsim dok kcha ping; nei ksun chaak nrang ki mpha ava kveija.

⁷Kṭha rawl kdu ava neiji kukurduk ṭhi dokka, kchen kparteek kupṭut dokka, krin cha ava neiji kdan chaakka.

⁸Ungta tunva rinkindit ki luwkhum ava nei ktumra mti thiik pikka, rinkindit kekṭewl Mukpu Nit ava thu nei ki hinni mhai kpii chra, ungu ava nei ki hin daat rang pme pdainu Mma kandan ra wonsat klo cha mii mkheng tum ruk kurthuwk.

⁹Nei ki hinni kbeiji athlen nra ru alou cha.

¹⁰Mleija Demas ava ngi tun tunki dultipaam wonsat loda mhai ma pthiida Thessalonikia tha kunsun kcha a, Kresen ni Galatia tha, Titas ava ngi Dalmatia tha kunsun lamma.

¹¹Luk mthina daatti neia mta am ṭhia. Nang ngi Mak athlaamra arvan ṭhi; mleija nei sok muklo cha thu mma ava do ksi langlang kurthuwk.

¹²Tikhikas ava neiji Ephisia tha ksii dokka.

¹³Troas thu Karpas hintha neiji kdo maak kiphrik leh klairik rek, ungta kheel siingi saavun jiik phel mkheng ava nang ngi arvan mpha thu mhai hur pik cha.

¹⁴Thiir ksa Alekjander ri nei sul mdo tpurnul nra kdung tlo da; mma nong tlot dil kṭoiji Mukpu ngi kthul pik ra.

¹⁵Mma hin nah adaksaa ava cheek karsin cha, mleija nen npau paryaam inna mma va kapchai reenni rome.

¹⁶Ru kri reeppi neiji kakarthe loi chaak nathu nei kuktong tha ku khat lee ame; mkheng inni mat tmaak pthii lamma. Mmaan mraal kpiia kurthuwk mso!

¹⁷Pdainu ktlok chati rek mkheng ngi mdo aryaak chaak nra, Mukpu ngi kbe tekki ripda ungu kurhummi paumin kdo paryaam chaak nrangki rutan mpii chda. Ava leiji neia humpii smang ner thungki mṭenthuw chda.

¹⁸Mukpu ngi kṭha kmakhim khai thungki mṭenthuwda ungu Mma parwaan Kruwngpaam kira mhai ktlan chda. Mma ava kṭuw knai liit kma mlaar knei kurthuwk so. Amen.

¹⁹Prisila leh Akuila ungta Onesiphoras phungka rekka leer khatti kurvui chaak lamma.

²⁰Erastas ava Korinthia tha neiji kmaak daat; Trophimas ava kukoi daatti Miletas tha kdo maak daat.

²¹Phalbi mvee dungi athlen nra ru mhailo pik cha. Eubulas, Pudens ungu Linas leh Kloudia ungta ku u knao rek mkheng ngi aturvui chaak lamma.

²²Mukpu ngi nah pthla ava kurthlo ṭhi so. Plungnee ngi aju ṭhi chso.