Read Lamkang TITAS 1 Bible Online

TITAS 1 - Lamkang bible

TITAS 1

¹Isowr sra owr khat ungta Jisu Khrista ki kenyee Poul li, Isowr do kchol dok krin cha rek ungta mmaanni Isowr ktongki mkindit ava kheel sii kdei dok kcha tu kilṭhi ngi,

²kṭuw knai kma ki rinkhu kbin cha ava plei knei liit kma, kum roi ksot thu Isowr ri paureel dok da,

³ungta mpha kcha deek pau kparyaam thu Mma pauna ava mi pandan pik chaanda, ava thu neia nen mi kaktlan pik in Isowr ki pauṭummi mhai sil chaak nda.

⁴Krin cha khat thu kinṭim chak, kinditti neiki knaopa Titas hintha: Kpah Isowr ungu nen mi kaktlan pik in Jisu Khrista hinki plungnee leh kdaai am so. Kretia thu Titas Nongtlot

⁵Ava leiji neiji Kretia thu ado kmaak daat, tditta nang ngi kuhup ado tuphut nra, ungu neiji ado kparseel dok lulu ngi khuwpii khim khai thu kver rek ak kchol:

⁶mii ava ngi kar mak nong mtlot ma, numei khat innpu mkurthut ra, ungu mnaole ngi krin cha mkurthuwra, ungta tlouda mii krai kma mdit mata kbom dei mii ava ak chol.

⁷Mleija ber ksu khat va Isowr vaiklou lulu ngi, kar mak nong ktlo kma; kpohok kma, mdit mata plung kthi dei kma, mdit mata ju knee kma, mii ka ai krai kma, kak kraam kma,

⁸pdainu plung knei, kṭha wonsat klo, mdaksaa kpu kurthuwk, kinditti krip, kseeng, ungu mdaksaa kurjowng pchaang, mii ava mkurthut ra.

⁹Kindit paumin ki pauna thu mma ava knetti ma amra, tditta mma ngi mii murson hin kṭha paurin mdo purchu pchaan nra ungta pau kleek rek do parma thungki ktidet pik mkurthut ra.

¹⁰Mleija pau kleek mii rek, pang pauvi kpau, mii kuhuwng kcha kheel siingi vunmor kreen rek lop mii ava knempokki ka am lam.

¹¹Mmaanna rim kdi ma am raan, mleija mmaanni sum mdo lot chaak nraanni, mdo purchu liit ma raan ava purchuk lamda, phungka mkheng nga pkui pthii tir lamda.

¹²Msingreel in thungki khat, mmaan ki khulpu katti theda, “Kretia rekka mpha ktai thu plei knei lam, kṭha kma saa rek, howngkva poibuwr kparjaa rek lam.”

¹³Hava rinpaumin ava mkindit kat kurthuwk. Ava leiji, mmaanni Jihudia rek do seem paumin thu mdit mata kindit kipthlei mii rek pau pṭum thu plung mdo var ma nraan,

¹⁴krin cha thu kindit mkurthut nraan, kapchaiji mhai arko pik chlam.

¹⁵Kchiir deek mii ava hin thang va do mkheng nga kchiir, pdainu ktobor leh krin kma mii ava hin thangva, kchiir khat lee ame; mmaan poibin leh muplung thuw inna ktobor.

¹⁶Mmaanni Isowr kdei ping kdingi karthe loi lamda, pdainu mnong tlot inni Mma ava mat lamda; mmaanna tipder kirvei pau kleek, kṭha ktlo thu msit ktaak rek lam.