Read Lamkang TITAS 2 Bible Online

TITAS 2 - Lamkang bible

TITAS 2

¹Pdainu nah atumva paurin do rot ava kat daat apurchuk.

²Pselpa kver rekki plung kdowng, plung klut, plung kuk kjowng, kdung krin cha, wonsat kthloi, ungu kdiil dei mkurthut nraan mhai the pik cha.

³Snu kver rek ki anto lulu ngi mlam chet Kṭha, kho kthe kma, ungu ju knee ki suwk mkurthut ma nraan mhai the pik lam; kṭha ava mmaanni apurchuk lamso,

⁴ungu snu kmo rekki mmaan ki innpu rek leh mnao le wonsat mdolo nra,

⁵plung kurjowng pchaang, plung kchiir, inn nong kipning, plung knei, mi innpu kurdu ngi ma am nraan apurchuk, tditta ava ngi Isowr pauna kṭha kma ngi the psuk lam nime.

⁶Anto lulu ngi pselnao rekki mdaksaan mkurjown pchaan nraan mhai the pik chlam.

⁷Mleija mkheng thung ngi nah adaksaa ava kṭha nong ngi atidet cha, ungu ado purchu thu plung klut plung ktippi atlo.

⁸Mii ngi ado tithe chaak ma nra kṭha pauvi asaam, tditta nen nlei thu kṭha kma mdo the ma nraan, nen mi kro kma rekka ningkja apii lam.

⁹Suwk owr rekki mmaan ki kpu rek tingi kṭi ngi ma am nraan, ungu mlei khim khai thu mning thlun naan mdo tlot nraan; pau mdo arthaan purlu jowk jowk ma nraan,

¹⁰mdo alrowt lam ma nraan, pdainu mkheng thu kindit tloda mdo tdet nlamra mhai the pik cha, tditta mmaanni do khim khai thu nen mi kaktlan pik Isowr paurin ktapṭhat bet kurthuwk ra.

¹¹Mleija mii mkheng kirliin chaak nra Isowr plungnee kandang nga,

¹²Plungnee ava Isowr ktaakki ka am ungta dultipaam ktongki kngei thungki tmaak pthii nra, ungu plung kparneem, kindit deekki krip, Isowr ktongki rinkhu ngi hava dultipaam thu ta am nra, mii the pik da,

¹³nenni plung ngi tbin chaak in klin langlang nenki Isowr leh nen mi kaktlan pik in Jisu Khrista ki laarnee kandang ra ava nenni tardat chaak in.

¹⁴Nen pnu ton mkheng thungki mi kṭenthuw ra, ungta kṭha nong ktlo tummi plung klut Mma mii rek ava Mma tummi mdo partleu pik nlamra, Mma ngi nen ntumra mdaksaa kpii cha kurthuwk.

¹⁵Hava lea athethuw dok; aksop lam, ungu rutan pum mkheng tu kilṭhi ngi mhai rai pik chlam. Ku mii khat lee ngi do ksi kma aju bin mso.