Read Lamkang TITAS 3 Bible Online

TITAS 3 - Lamkang bible

TITAS 3

¹Mmaanni paam kpu rek leh rutan kthloi rek tingi ma am nraan, kthe kupṭoi, plung ktip nong khim khai thu mkirsim nraan,

²ku mii khat lee tun ni kṭha kma pau mdo the ma nraan, kalrai mdo ser nraan, mii mkheng hinni plung kparneem ungu plung kdowng mdo tdet nraan atipbin phaak chlam.

³Mleija nen ndaksaa ava mpha khat thungva ka aak in pmin, pau kleek, lele tha kchet, do knempok kngei, ungu kanthle ktardou ki sowk rek, nenki nit ava khusiir parthit na leh khei kthe ngi tpartlai pthii in, mii do pder chaak ungta khat leh khat kipder cha ngi ta am in.

⁴Pdainu nen mi kaktlan pik Isowr ki kṭha ungu wonsat mkandan thungta,

⁵Mma ngi mi hai ktlan chaan da, ava nenki rinkindit nong tatlot lei inki pme, pdainu Mma mdaksaa kat ki wonsat dil kṭoiji, Mma ngi nenna veikhat kpurlu kcha ki kulṭhutti Pthla Kchiir ri ren mi pur owl inda mi ktlan pik chaan da.

⁶Nen mi kaktlan pik in Jisu Khrista thung ngi mido taptlon pik in.

⁷Tditta Mma plungnee ngi mido tpindit pik chaak nraan, ungu kṭuw knai kma kbin cha ki alrou mi paphaak chaan da.

⁸Mdo thea kindit kat. Hava pau ava Isowr krin cha rekki kṭha nong ktlo cha thu mdaksaan ni plung mdo plut nraan nang ngi ado namduwl lamra ava neiji kngei chaakka; hava lea mii rek tummi mkinreel li kṭha.

⁹Pdainu ka aak mii pauvi parjuk kparhai, suruwl ktai, kar ai kalrai, ungu Nowlam tummi kalrai mhai ser pik cha, mleija mmaanna mkat na ktaak ungta do ksi pme.

¹⁰Kṭhen ktupthuwk miilai ava veikhat mdit mata veiknii ngi mhin pau akham pik dok diltha, mhin pau khat lee the ma.

¹¹Hanto lu kdu mii ava mthina ngi mraal karpii kcha, ktobor ungu pnu kirvei tdit ado deera.

¹²Neiji Artimas mdit mata Tikikhas ava nah hinni ksii lam mpha thu, Nikopolis tha nei ki hin tha arvan nra ru mhailo pik cha, mleija phalbi lik thungva ava tha am daat nik di.

¹³Kekṭewl rek Yenas leh Apollo ava mlam thaan ado dak pik lam nra mhai tlot pik cha; kvaat khat ma amma nra mhai sut pik chlam.

¹⁴Ungta nen nmii rekki thei kchui kma mkurthut ma nraan, kuknot kat lu thu mdo purdon pik nraan, kṭha nong ktlo thu mmaan mdaksaa ava kurchuk chlam so.

¹⁵Nei kdo amṭhi rek mii mkheng ngi leer khatti aturvui chaakka. Krin cha thu nen wonsat mi klo rekka kurvui chaak lamma. Plungnee ngi naan akheng nga aju kurthlo ṭhi chaan so.