Read Lamkang PHILEMON 1 Bible Online

PHILEMON 1 - Lamkang bible

PHILEMON 1

¹Jisu Khrista tummi rowng inn thu ka am Poul nei leh nenki nu u nnao in Timothi ngi, neen kwonsat lo in knong suk ṭhiin Philemon

²ungu neen kchernu in Apphia ungta rawlmii kdo kurthut ṭhiin Arkhipas leh nah inn thungki Rinlop hin tha:

³Nenki Npah Isowr leh Mukpu Jisu Khrista ki kdaai leh plungnee am so.

⁴Neiji kṭhil chaak mpha thu nah aju bin phaak nu, Isowr kdo panpaak chaak thlit lu,

⁵mleija Mukpu Jisu leh kintiing rek mkheng hin tha nah awonsat leh krin cha thu ado thloi ava aryaa nu,

⁶ungbi nei kdo ṭhil chaak ava Khrista tu rinkhu khdaatti ka am lamrin ava ngi nang tu plap khat kurthuwkki, phowl kṭha khim khai kheel set setti tdee pandit chaak nraan leiki.

⁷Mleija nah wonsatti neia kdung ngi kanpa kcha ungu plung ngam kpha kcha kurthuwk ping, mleija ku u knao, nah Isowr mii rek mkheng plung ngam khat pti.

⁸Ava dil kṭoiji, ado tlot nra ava nang ngi ado tlot chaak nra, nah hinni pau kupṭum ki plung ktangar ava kokhoppi kdo thloi,

⁹anto daat joso wonsat leiji Jisu Khrista tummi tun ruk va rowng inn thu ka am Poul nei kurthuwk chdat joringva kchang kdonni aka ktham chaakka.

¹⁰Rowng inn thu ka am mpha thu Pthla ktong ki mpah kurthuwk neiji kchapa Onesimas tummi kak ktham chaakka.

¹¹Mpha khat thu mma ava nah hin do ksi cha pme, pdainu tunva mma ava nah tum ruk ungu nei ktum ruk va do ksi langlang cha.

¹²Nei kuplung kat kurthuwk mma ava neiji nah hinni ksii pinlet chaakka.

¹³Tditta mma ngi nah kchang donda kṭha paumin tummi neiji rowng inn thu ka am daat thu, sok mhai klo chra plung kngam rek rekki neiji mma ava kdo thiik chaak nuwm.

¹⁴Pdainu nah plung ṭhat ava namtrom mkurthut ma nra, pdainu nah plungbin daat mkurthut nra, nah poibin ktaakki neiji do khat lee tlo nuwm maang.

¹⁵Mdit mata mma ava nang ngi ado thloi pinlet thlit daat nra, hava leiji mpha mruk tummi lam karlat dok kro in pti.

¹⁶Mma ava suwk owr khat lulu kma, pdainu suwk owr khat kipkheel dekki, nei ki hin thangva wonsat kdolo rek rek ku u knao khat kurthuwk pdainu nah ahin thangva daksaa ktong thang ruk Mukpu ktong thang ruk tija pang thu wonsat adolo kurthuwk chdaat rang.

¹⁷Ava leiji nah plap pi neia atbin ta, nei ado tkowl chaak rang heppi, mma ava mhai kowl pik cha.

¹⁸Mma ngi nah ahinni kar mak mdo tlot mkheng mdit mata mleituwl ma amta, ava nei kleenlei thu mhai tpom pik cha.

¹⁹Poul nei kukhut katti hava kdo kjit chaak, neiji choi chdaat nikdinah adaksaa kat ruk nei kihin lei ktuwl dinu kdo thena ava pme.

²⁰Oji, ku u knao, Mukpu miing ngi nah hinki kbom cha neiji kngei chaakka. Khrista miing ngi nei kuplung mhai pngam pik cha.

²¹Nang ngi pau ado pṭoi ava kuplung thu knet merri neiji bin chnu, ava lei ahinni neiji kdo kjit chaak kurthuwk, tditta nei kdo the kipkheel dekki nangva tlo munna kdingi kbin chaakka.

²²Ava daat kma, neiji malpa ngi kthlun chaak nra ktumra innka khat mhai purchuwl pik cha, mleija nah doṭhil chaak ava ak krot pik ra kdingi neiji kbin chaakka.

²³Jisu Khrista thu neiji rowng inn thu kdo amṭhi Epaphratas,

²⁴ungu Mak, Aristarkhas, Demas leh nei knong suk ṭhi Luk mmaanni leer khatti aturvui chaak lamma.

²⁵Mukpu Jisu Khrista ki plungnee ngi apthla akurthlo ṭhi chso.