Read Lamkang HEBRU 10 Bible Online

HEBRU 10 - Lamkang bible

HEBRU 10

¹Mleija Nowlam rangki kindit do kṭha ava kma marlim ngaal mkurthut leiji, kdet liit kma mkum ktaiji kurnowl thlit da tlaai kdown ava ngi lamknai kcha rekka tden thung preva mkinreel pur owl pchaang me.

²Anto mkurthut mabi, mmaan tlaai downna kma pthii rang mo? vei khdaatti luwkbuk rekki mkartleu inbi, mmaanni pnu dei kurnowl lam nime.

³Pdainu hava tlaaidown ava mkum ktaiji pnu kbin phaak kurthuwk.

⁴Mleija silpa rek leh keel rek hii ngi tden thung preva pnu rek klou pthiia pchaang me.

⁵Hava leiji, Khrista ngi dultipaam thu murjun mpha thu, Mma ngi theda, “Tlaaidown rek ungu downda kpii cha Nang ngi ngei mti, pdainu Nang ngi ktumra daksaa khat ado tpur owl pik.

⁶Kakaa ngi downda kpii kcha ungu, pnu tummi downda kpii cha thu aning thlung me.

⁷Ava dilli Neiji the nu, ‘Laaika jiik kjul thu Nei klei mdo kjit lulu ngi, O Isowr, Nah apoibin ktlora Neia kurjung imping.’

⁸‘Tlaai kdown, ungta downda kpii cha, ungu kakaa ngi downda kpii kcha ungta pnu tummi downda kpii kcha ava Nang ngi ngei mti ungu aning thlung me dida tun knung ki Mma ngi theda.’ Hava lea Nowlam dil kṭoiji downda mdo piik chaak.

⁹Ava dilli Mma ngi tpomda, ‘Asuw, Nah plungbin ktlora Neia kurjung imping.’ Mvei knit naki mdo pṭhan nra ru kri reep ki ava knuwl pthiida.

¹⁰Ungta Mma plungbin ni Jisu Khrista ngi mdaksaa downda mdo piik ava ngi nen nkheng nga vei khdaatti mi tpinchel pik chaanda.

¹¹Ungta thiimpu khim khaiji mnii ktaiji sok kloura, kardu jikki tlaai kdown ava kurnowl thlit da kpii chrang ngi ripda, ava ngi pnu rek klou pthii pchaang nga kurthuwk me.

¹²Pdainu Khrista ngi pnu rek tummi kṭuw knai liit kmara vei khat pang ngi tlaai downda pii chda ava ngi Isowr khut chang ktongtha kuk ong.

¹³Ava dilli Mma kusnuwm kma rekka mkhu pja tingi mthiik du khim khai arngai da ka am.

¹⁴Mleija vei khdaat chrelli Mma ngi downda mdo piik chaakki, mdo tpinchel dok rek ava mpha ktai thu mkinreel pur owlda.

¹⁵Ungta Pthla Kchiir ri nen nhin sakhi mi hur pik inda; mleija ru kri ngi theda,

¹⁶“Ava nit rek diltha mmaan tu kilṭhi ngi, Nei kdo seemra paurina ava hava dida Mukpu ngi theda: Neiji Neiki Nowlam rek ava mmaan plung thu daal pik lam nikdi, ungu mmaan plungbin thu kjit nik di.”

¹⁷Ava dilli Mma ngi tpomda, “Mmaan pnu ton rek ungu kar mak nong mdo tlot in ava Neiji bin phaak nowl ni maang.”

¹⁸Havale kuptlot pik amna thungva pnu tummi downda kpii kcha amnime.

¹⁹Ava leiji, ku u knao rek, Jisu hii ngi nenni mun Kchiir thu klut chrangki knetti tbin chaak lei inni,

²⁰ren lam leh kring lam ava buwkhaar thu Mma mdaksaa ngi mi pvan pik chaanda.

²¹Ungta nenni Isowr Inn tunni klin langlang Thiimpu khat tathloi chaak in.

²²Kindit plungril krin cha ki kindit ava ngi kdim, kṭha kma plungbin thungki nuplung bin in mdojai partleu ungu nen ndaksaa ava dii kchiir deekki mdo alṭhut tu kilṭhi ngi vanai inche.

²³Kakna liit kma nuplungbin in dothe thut chaak ava knetti arpom in che, mleija paukreel Mma ava trin chaak kurhui.

²⁴Ungta khat leh khat wonsat leh kṭha nong rek ktongtha kurbom inche.

²⁵Mii murson rek dotlot lulu ngi kthuwk kurkuk ra leek maan che, pdainu khat leh khat kursop da, ungu mnit kvei slii naanni ado dee in heppi kheel set set ti tlo in che.

²⁶Mleija nenni kindit kdei cha narlaan chaak dok dil thaanni kdei kdeiji pnu ntlaak inbi, pnu rek tummi tlaai kdown vei khat ame.

²⁷Pdainu mdo kṭewl ra ka am daat ava ṭi inche, ungu kro kma rek ava mei kṭuwng thu kukbung chlamra.

²⁸Mousi Nowlam kleek mii rek ka mrinpaumin thuwnni sakhi rek knii kdum ktaak wonsat ktaakki kdiyou kcha lam.

²⁹Isowr Chapa mkhu ngi kther, ungu Mma kartleu chaak na paurina ki hii ava kbuwr heppi kbin, ungta plungnee ki Pthla ava kjuwm rakki ktlo mii ava tija kheelli mraal kpha chrang tdit naanni bin maan timo?

³⁰Mleija, “Phuw kloura ava Nei kdo, Neiji purthul nik di.” Ungta vei khat nowlli, “Mukpu ngi Mma mii rekka kekṭewl ra,” dida kthe Mma ava nenni ndee in.

³¹Kring Isowr khut thu ktla kcha mii ava tiṭit kirvei daatta.

³²Pdainu naanna kleng aphaak dok dil thaan, kja kakham tu kilṭhi ngi kparsa langlang ngi kdiil kcha aparteel in mpha thu, chodu ki nit rek abin phaak chaan.

³³Mpha khat thu kandang ngi mii maiji ning earri arai chaanda, ungu kja kakham ado parteel in, ungta mpha khat thu anto heppi mdo tlot in ava plap in pti.

³⁴Mleija naanni rowng inn thu mdo khum rek wonsat lo inti, ungu naan adaksaan tummi kṭha sii kmaang kro liit kma rangki alrou ka am tdit dei inti, naanki alrou mulrowt in mpha thu, kanpa rek rekki ado rot pik in.

³⁵Ava leiji, klin langlangki mnah kthloi, naan dobin chaak in ava var pthii maan.

³⁶Mleija naanni Isowr poibin tloda, ungu mpaureel ado arlaan chaak nraan, ado diil dei kat raan.

³⁷Mleija Laaika ngi theda, “Mleija mpha mruk dil thang bong ngi, kurjung rangki khat ava kurjungra ungu kto liit nime.

³⁸Pdainu Neiki rinkindit ava klamrin chaakki kringra, ungta Mma ngi mdil mkursown kinletbi, Nei kraothla ava Mma thu kning thlung nime.”

³⁹Pdainu nenna kmawng chrang ngi mdil tha kursown kinle mii ava pmin me, pdainu rin chda raothla karkhii kcha rek in pmin.