Read Lamkang HEBRU 11 Bible Online

HEBRU 11 - Lamkang bible

HEBRU 11

¹Tunva krin cha ava plung krippi tbin psuk chaak in ava, tdeema do ava plung tuplut chaak in.

²Mleija ava lei miipliw rekki Isowr ktongki krot pik mdo arlaan chaak in.

³Krin cha ava nenni ndee pandit chaak in, tditta dultipaam ava Isowr pauna ngi mdo pṭhan dok, ava leiji tdee do ava tdeema do ava thungki mdo seem.

⁴Krin cha thu Abel li Kein hinva talo kro tlaaidown Isowr hin down pik da, ava thu mma ngi rinkindit krot pik arlaang chda, Isowr ri mma chla piik sakhi hur pikda; mma ava diyou chdaat joso krin cha thu mma tithe thlit in.

⁵Krin cha thu Enok ki kdiyou mdo dee ma nra mma ava arju lou dok da; ungta Isowr ri mdo arjuk lo dok leiji, mma ava phang lamme. Tunva mma ava murjuk lo dok dungi mma ngi Isowr ning tupthlun pik chda.

⁶Ungu krin cha ktaakki Mma ning ktupthlun pik ava kurthuwk pme, mleija Isowr hin knai kcha mii khim khai ava hin Mma ka am ungu kthlaam kcha rekka mnah kpiira tdit mdo rin chaak kat ra.

⁷Krin cha thu Noha ngi mdo dee chaak ma kthuwk rangki mlei thu Isowr ri paureel pik da, mma ngi pṭoida, mphungka mdo ktlan nra arkuwngpii khat mma ngi sada; hava leiji mma ngi dultipaam mraal piida, ungu krin cha dil kṭoiji rinkindit ki charuwl khat.

⁸Krin cha thu Abraham mi, alrouvi mdo arlaan chaak ra mun khat ava tha kunsun rang ngi mu own mpha thu pṭoida; ungta mthlun nra mun kdei liit kma ngi kunsun da.

⁹Mii paam ktlok tha ka am lulu ngi krin cha thu mma ngi paureel ki paam ava thu paalda, Isek leh Jakob tu kilṭhi ngi buw inn thu paal lamda, paureel ava kat ki charuwl kurthut ṭhi lamda.

¹⁰Mleija Isowr ri punchoi dokda sada mdo seem khuwpii ava ktongtha mma ngi tarngaida.

¹¹Krin cha thu Sarah ngi kdung der chdaat joso, paukreel pik Mma ava trin chaak kurhuiji mdo bin leiji, nao mdo hur nrangki rutan ava mdaksaa thu arlaang chda.

¹²Ava leiji, mma ngi diyou tiing tiing daat joso, parwaan ki bursi rek heppi knempok, ungu truwn biingki tatai pchaanma sitphui hep jangi ngi knem mcharuwl rek ava miilai khat thungki plu chda.

¹³Hava le mkheng nga parreel karlaang ava pme, pdainu lamkla ngi deida ungu arvui chda, ungta mmaan ava dultipaam ki mal rek leh paamsuwk rek kdingi deida, krin cha thu kdiyou kcha lam kurthuwk.

¹⁴Mleija hanto kthe mii rekki mpaam raanni mthlaam inna kdingi the pindit pik lamda.

¹⁵Mmaanni mdo sun daak in paam ava mbin rim inbi, mmaanni khuw dil kinle chlam ruk kro.

¹⁶Pdainu kṭha bet khat Parwaan paam ava mmaanni ngeen lamda. Ava ngi mlei kurthuwkda, mmaanki Isowr tdit thung ngi Isowr ra mning kjak me, mleija Mma ngi mmaan tumra khuwpii khat purchuwl pik chlamda.

¹⁷Abraham ma krin cha thu mpirsin mpha thu, Isek ava tlaaiji downda pii chda, ungta paureel rek karlaang kcha miiva mchapa khdaat chrel ruk downda kpii kcha thu kirsim.

¹⁸Mma mlei thu theda, “Isek thungki nah acharuwl rekka kthuwk ra.”

¹⁹Isowr va kdiyou dok rek mii rap klua ktipring pinle mapchaan kdingi mma ngi bin chda, ava leiji pau purtol kthe ngi mma ava arlaang pinle chda.

²⁰Krin cha thu Isek ki Jakob leh Esau ava dil kira tummi phowl kṭha pii chlamda.

²¹Krin cha thu Jakob pi mdiyo du tiing ngi Joseph chapa rek mii pum ktai hin phowl kṭha pii chda, mukchung tun kbaang da Isowr luwbuk chda.

²²Krin cha thu Joseph pi mrinkhu mṭut tiing tiing ngi Isreel naorekki kal mdo khiin nraan the pik chlamda ungu mma mdo alruwl nlam rangki mlei thu parseel lamda.

²³Krin cha thu Mousi ngi mṭou mpha thu, mnuh leh mpah ngi thla kdum dowl lamda, mleija mmaanni nao rungchen kṭha ava dei lamda; ungta kruwng pauṭum ava mmaanni ṭi lam me.

²⁴Krin cha thu Mousi ngi mver mpha thu, Pharoh chanu ava chapa mdo dit rang nga rome.

²⁵Pnu ki nungai ava mdo phaak kchang rang nga Isowr mii rek tu suwkthuw kphaak ṭhi ava mma ngi kchol chda.

²⁶Egypt ki alrou hinva Khrista tummi ningkja phada kja kakham kparteel ava ngi klin siiki alrouvi bin chda, mleija mma ngi mnah ava ra suw chda.

²⁷Krin cha thu mma ngi Egypt ma da, kruwng plung thit ra mma ngi ṭime; mleija tdee pchaan ma Mma ava kdei kcha heppi parteelda.

²⁸Ru kri verri kṭou psel ava mdo eakre ma nra, krin cha thu mma ngi taplaanna leh hii kjai ava danda.

²⁹Krin cha thu mii rekki truwn ksen ava laan ki heppi klaan lamda; pdainu Egypt mii rekki anto lulu ngi maklaan in thungta, truwn dii ngi junjuh tir chlamda.

³⁰Krin cha thu Jerikho suwng ava nii tikheu mloi dok dil thaanni tluw chda.

³¹Krin cha thu ko ok kma Rahab pi tuprut pau klou rek ava plappi mdo kowl lam leiji, kthe kleek rek tu kilṭhi ngi mawn ṭhi lamme.

³²Ungta kheel setti neiva tak the nik da? Mleija Gedion, Barak, Semson, Jepthah, Devid, ungu Samuel leh khulpu rek mlei thu kdo the rang nga mpha ngi mrot pik chme.

³³Krin cha thu mmaanni kruwng paam rek pchaang lamda, kindit nong tlo lamda, paureel rek arlaang lamda, humpii smang rek ner pmeeng lamda,

³⁴mei rutan archu you lamda, kaang ksaang haa thungki karthlet lamda, ru kdowng thungki mru in tang da, rawl kdu thu mru in tangda, paam ktlokki rawlmii rek rei pthii lamda.

³⁵Snu rekki kdiyou dok rek ava kring karheel li arlaang chlamda. Mii murson rekki rinkhu kṭha bet tha mrin kinlet chaak nraan, kintek ra mdo mat lei inni suwkthuw pha chlamda.

³⁶Mii murson rekki kchung kuhur, mii do pnii chaak, ungu thiir ri do bowl, ungta rowng inn thu mdo khum lei inni kja kakham parteel lamda.

³⁷Mmaan ava lung ngi deeng lamda, knii kthuwkki ngaat lamda, kaang ksaang ngi eayou lamda, Jao leh keel vun naa lamda parvai lamda, sra kurthuwk lamda, suwkthuw pha lamda, mii do owr chaakki am lamda.

³⁸Mmaan tummi dultipaam ava mkurhui ma lei inni kbowk lai, ungu lown tun tha, lung khur leh dulti khur thu parvai chlamda.

³⁹Ungta kdung ngi mdo rin chaak in am daat joso, havale mkheng ngi paureel arlaang chlamme,

⁴⁰mleija nen ktaakki mkinreel mdo pur owl ma nra, Isowr ri nen ntumra kṭha bet do khat mi purchuwl pik inda.