Read Lamkang HEBRU 12 Bible Online

HEBRU 12 - Lamkang bible

HEBRU 12

¹Ava leiji, nea mi ktukhul dok in klin langlang armei khat ka ammi sakhi rek mkurthut leiji, nen ruk va bowr krik leh knai tekki kakbaang pnu khim khaija nsiir inni thii pthii in chera, ungu nen ndusuk inni ka am kchen kparteek kdei tu kilṭhi ngi chen rei inche.

²Krin cha kpu ungu mkinreel kpurthuw Jisu suw inche, Mma ngi mmaiṭhuwm mi ka am kanpa ava tummi, ningkja ra matda khros parteelda, ungu Isowr ko onna mkhut chang ktong tha kuk ong.

³Ava leiji naanni plung pjada mdit mata ktet dok akurthut ma nraan, Mma mraal kpii ngi pnu rek dohal chaak thungki mdo diil chaak ava abin phaak in.

⁴Pnu mraal kpii ngi ado kursul ṭhi in ava hii kbu kpha ra naanni karnaak ṭhi maanti.

⁵Ungta mchapa rek lulungi Mma ngi ado tuk kso chaak inna naanni aparngiil pthii dok inmo? “Kchapa rek Mukpu do archak ava ko ol tekki lou maan, mdit mata Mma ngi araal in atpiik inta plung parheel daak maan.

⁶Mleija Mukpu wonsat lorekka mdo pindit pik, ungta Mma do arlaan chaak chapa rek khim khaija mdo archak.”

⁷Naan do diilra ava karchak tum. Mchapa rek lulu ngi Isowr ri ado ta tlot pik in; mleija mpah do archak ma chapa ku ka am da?

⁸Mii mkheng do phaak ṭhi sap karchak ava ngi a am maanbi, naanna mchapa rek kma pah taak nao in pti.

⁹Hava daat kma, nen mi karchak chraan dultimii ki npahle tathloi in; ungu nenni takjat chaak lam. Pthla ngi Npah in ava kurdu ngi kheel siingi ta am raan pmemo?

¹⁰Mleija mpha mruk tummi mmaanki dothloi thu mi archak inda, pdainu nenni Mma ki Kchiir ava tphaak ṭhi nraan, nen ṭhat nra mido tarchak in.

¹¹Mleija mpha mruk tummi karchak mkheng ava kanpa rang kchang nga plung jatna kurthuwk; dil thang rongi ava ngi kurchuk chdok rekka rinkindit ki kdaai theiji kchui lam.

¹²Ava leiji, abaan in kakham ava akhiing inra, khu kunchun ava ru aptang in,

¹³ungu akhu ther raan arji in, mleija khu kseek rekki mkhu in mdo ar el ma nraan, pdainu ava kchang nga kdam lamra.

¹⁴Mii mkheng tu kilṭhi ngi Kchiir leh kdaaiji a am nraan atlo in, mleija ava ktaakki ku khat lee ngi Mukpu dei chnime.

¹⁵Ku mii khat lee ngi Isowr plungnee kpha kcha kma mkurthut ma nra asuw dei in; tditta murjung kakha mowngda ungu suwkthuwna ava ngi mii knempok mbuwr ma nrang lei.

¹⁶Tditta ku mii khat lee ngi pang turkuiji kturkui, mdit mata dhormo ktaak Esau lulu upa ngi mṭou chaak ava then vei khdaat pang kingi mdo jur chaak heppi mso.

¹⁷Mleija naanni ado dee in, tditta dil thang rongi phowl kṭha marlaan chaak nuwm thu, mma ava rot pik me, mleija arthli kbu ngi thlaam chdaat joso mma ngi plung mdo parheel chaak nrangki mpha ava phang chme.

¹⁸Mleija naanni tuthown kro, kṭuwng slii mei, ungu kjiingnu, kjiing mek muk, tirthli kraang,

¹⁹peengkhul krowl, ungta pauna rek krowl karyaa rekki, mhin thaanni mdo paryaam pursom pik chaak nlamra ktham chlamda.

²⁰Mleija mhin inni mdo piik dok, “Nowmsaa daat rukva lown ava mthownbi, ava lung ngi kdeengra,” dida pau mdo pṭum ava mmaanni diil pchaang lamme.

²¹Tdee chaak ava tija thu tiṭit kirver daatta dida Mousi ngi theda, “Kdo ṭit chaak tu kilṭhi ngi kunchun ping.”

²²Pdainu naanna Siyon lown tha, ungu Parwaan ki Jerusalem, kring Isowr khuwpii tha, ungta tatai pchaan ma Waan tamsii rek kurku na tha kthleng in pti.

²³Ungta Parwaan tha mmiing mdo plu dok, ru kri reepki kṭou rek kunpun na tha, ungu mii mkheng kekṭewl Isowr hin tha, ungu kinreel li kindit mii rek pthla ava hin tha,

²⁴ungu ren paurina ki pau kpurlon Jisu hin tha, ungta Abel hii hinva kheel siingi kṭha ngi tpaal chaak naan hii kjai ava hintha kthleng kchaan pti.

²⁵Kpau slii Mma kipthlei akurthut ma nraan asut pṭoi dei chaan. Mleija dulti tun pau kakham pik lam Mma ava mmaanni pthlei lamda, mkarthle pchaan maanbi, Parwaanki pau kakham Mma ava nenni nipthlei inbi, tkarthle pchaan in nime.

²⁶Mma krowlli dultia tpunchunda; pdainu tunva, “Neiji dulti daat kpunchun kma pdainu parwaan ruk vei khat nowlli tpunchun nikdi,” dida Mma ngi paureel da.

²⁷“Vei khat nowlli,” Hava mdo seem dok do ava tnok donle klou pthiira, mdo tno pchaan ma do ava daat ka amra.

²⁸Ava leiji, kakna pchaang kma Kruwngpaam tarlaan chaak lei inni, nenni kdung kakjat leh kṭi tu kilṭhi ngi Isowr dolo kro luwkbuk kdown cha ki plungnee arlaang inche.

²⁹Mleija nenki Isowr ava kukbung mei kurthuwk.