Read Lamkang HEBRU 13 Bible Online

HEBRU 13 - Lamkang bible

HEBRU 13

¹Unaoki wonsatti kur nowl thlit so.

²Malrek kowlda plung nei ktidet parngiil maan che, mleija mii mursonni kdei chdok kma ngi Waan tamsii rek pthlung chlamda.

³Rowng inn thu mdo khum rek ava rowng inn thu ado am ṭhi in lulu, ungu naan rukka daksaa ngi a am lei inni, suwk kthuwk rekka mhai bin phaak pik chaan.

⁴Kphal ava mii mkheng thu takjat chaak kurthuwk so, ungta kowm kbuwr rome; mleija Isowr ri pang turkuiji kturkui leh losang kṭhi ava kekṭewl ra.

⁵Naan arinkhu in thu sum kngei ava aser chaan, ungta ado thloi in ava ngi ekhop in; mleija Mma ngi theda, “Neiji asui inda ama pthii liit in nimaang.”

⁶Hava thu nenni plung krippi tithe chaak in, “Mukpua nei mukbom, neiji ṭi nimaang, mii ngi nei kihinva tak ktlo pchaang rang da?”

⁷Naan hinni Isowr pauna akthe pik kchaan ber ksu rekka abin paphaak in; mmaan rinkhu thei abin inra, ungta mmaan dorin chaak nopa ava apṭoi in.

⁸Jisu Khrista ava janii ruk snii ruk kṭuw knai liit kma kartlei kma ka am.

⁹Msik lik lik ungta ren lik lik do purchu ngi aṭhi pthii maan so; mleija plungril la plungnee ngi ru mdo ptan pik, then pme, ava kupṭoi rekka do psit lamme.

¹⁰Nenni suwlbuwr khat tathloi chaak in, ava thu buw Inn sok klouvi ava mthung ngi then kchaa rome.

¹¹Mleija pnu tummi tlaai kdown ra thiimpu kparthaang rek ava ngi mun Kchiir thungki mdo arvan sin in hii avaki saadak rek ava songkowm tha mdo pkaak pthii lu in.

¹²Ava leiji Jisu rukva Mma hii ava katti mii rek mdo tpinchel nra, paltong duwn tha kja kaham mdo parteel.

¹³Ava leiji, nenni songkowm duwn tha chet in chera, ungu Mma ningkja na ava hurṭhi chaan chera diil inche.

¹⁴Mleija hava tha nenni knet mer rang ki khuwpii tathloi in ava pme, pdainu kurjung rangki khuwpii ava nenni kthlaam tkurthut in.

¹⁵Mma hin Isowr kpanpaak ki tlaaidown ava down in chera nowl thlit inche, tditta ner ki thei ava ngi Mma miing mdo dee chaak.

¹⁶Kṭha ktlo ava naanni ado thloi in, kthemve thu mhai parngiil pik chmaan, mleija hanto lu tlaai downni Isowr ning kthlung.

¹⁷Ber ksu rek pauthe apṭoi in, ungu mmaan kurdu ngi am in; mleija mlei kpiira mii rek heppi, mmaanni naanki raothla arkhii da ksut pṭoi kurthuwk lam. Mmaan plung kapja kma kanpa rek rekki atlo in, mleija naan akak nraan amnime.

¹⁸Neen ktummi mhai ṭhil pik chaan, mleija do mkheng thu kdo tlot nuwm lei inni, plung thuw kindit kdo thloi chaak in kdingi neenva kdo bin chaak in.

¹⁹Naan hin kbeiji neiji kikinlet nra, naanni hava ado tutlot pik raan, plung klutti akaktham chaak inna.

²⁰Tunva kṭuw knai kma ki paurina hii ngi klin langlangki Jao krung nenki Mukpu Jisu kdiyou dok thungki kipring pinle; kdaai ki Isowr ri,

²¹Jisu Khrista do sut na thu mning kthlung, do kṭha khim khai thu naan akursom nraan, naanni Mma poibin ado tlot nraan, naan thung ngi nong ktlo kurthuwk; Mma hin kṭuw knai liit kma kpanpaak kurthuwk so. Amen.

²²Ku u knao rek, neiji naan hinni kthe chaakka, kuksop ki nei kpauna rek ava mhai parteel pik chaan, mleija neiji naan hin ktoi tekki kdo kjit chaak.

²³Nenki nu u nnao in Timothi ava mdo parthle dok, tdit naanni ado dee pandit raan, kbeiji mma mthlen ta mma tu kilṭhi ngi avel chlai inni.

²⁴Naan ki ber ksu rek mkheng leh kintiing rek mkheng ava leer khatti kurvui chaak lamma. Italy ki kthleng rekki aturvui chaak inna.

²⁵Akheng inna plungnee ngi aju kurthlo ṭhi chaan so. Amen.