Read Lamkang HEBRU 2 Bible Online

HEBRU 2 - Lamkang bible

HEBRU 2

¹Ava leiji, nenna mi kjuwn ṭhi dok kro in pmin kdingi taryaak dok in ava thu knai betti plung plut inche.

²Mleija Waan tamsii rek dothe thut dok paumin ava kindit mkurthut bi, ungu pnu ktla mdit mata pau kleek ki mdo tlot in lulu ngi mraal kpha chra.

³Nenna klin langlang ki kirliing kcha nkurthut maannu tak heppi tkarthle raan da? Mukpu ngi ru kri reeppi ava the thuw dokda, ungta Mma pau karyaa kcha rek nen nhin kakbaang thlit daat.

⁴Isowr ruk va titinna rek leh tngana rek, ungu msik msik tngana rek, ava Mma poibin dil kṭoiji mdo them pik Pthla Kchiir ki chla rek tu kilṭhi ngi sakhi mdo piik.

⁵Mleija nenni tithe slii in dultipaam thu kurjung rangki Mma ava Isowr va Waan tamsii rek kurdu ngi thiime.

⁶Mmun khat thu ava sakhi pii da the da, “Nah do bin psuk mii ava talu da? Mdit mata Nah do sut pṭoi Mii Chapa ava tak hep kdu da?”

⁷‘Mma ava Nang ngi Waan tamsii rek kurdu ngi, mpha mruk tummi pchowm ti, Nang ngi Mma ava laarnee leh kakjat tu kilṭhi ngi, laar luwkhum pkhum pik ti,

⁸Mma khu therri do khim khaija ti pnung pthii tinu.’ Tunva do khim khaija Mma kurdu ngi thii tinu, duwn tha Mma ngi khut mdo pnen ma do khat lee ame. Anto lulu ngi nenni do khim khaija Mma kurdu ngi ka ammi tdee liit in pme.

⁹Pdainu Isowr ki plungnee ngi mii pum ktai tummi Jisu ngi kdiyou pirsin ndokda, mpha mruk tummi Waan tamsii rek kurdu ngi kchowm betti amda, suwk kthuwkki mdiyo leiji laarnee leh kakjat ki laar luwkhum mdo khum ava nenni ndee in.

¹⁰Tditta Mma lei ungu Mma thung ngi do mkheng ma am leiji, chapa rek knempokka laarnee tha mdo arvan ṭhi naki kja kakham ava ngi mmaan kirliin chaak naki mkinreel kurthuwk.

¹¹Mleija ktipinchel dok Mma ungu mdo tipinchel dok rek mkheng thuwna ava khdaat.

¹²Mma ngi theda, “Neiji Nah amiing nga Nei ku u knao rek hin paryaam nik di, mmaanni mthuw kurku in mpha thu Neiji apanpaak nik di.”

¹³Ungta vei khat nowlli, “Neiji Mma rin chnik di.” Ungu vei khat nowlli, “Neia Isowr do piik chaak kmo rek tu, hava thu ka am daat ping.”

¹⁴Ava leiji kmo rekki daksaa leh hii thu mtum in mdo phaak ṭhiin leiji, Mma ngi kdiyou thu kdiyou ki rutan kthloi dijabowl mdo ea kre nra,

¹⁵ungta kdiyou ra kṭi cha ava ngi rinkhu roi ksotti mdo bowl pthii kurdu ngi ka am kcha mdo ṭenthuw nra, Mma mdaksaa ruk va mmaan tu nopa kinṭim chakki ava kat louda.

¹⁶Mleija kindit katti Mma ngi Waan tamsii rek mdo bin pik lei ava pme, pdainu Abraham charuwl rek mdo bin pik.

¹⁷Ava leiji Mma ngi mii rek pnu ton mdo ptlot pik nra, Isowr sok klou cha thu, plung knei ungu lam trin chaak kurhui thiimpu kparthaang mkurthut nra, Mma ava mu u mnao rek tu mlam khim khai thu kinṭim ra.

¹⁸Mleija Mma mdaksaa ngi kja kakham pha da ungu mdo pthleem leiji, mdo pthleem mii rek ava Mma ngi mdo bom pchaan lu.