Read Lamkang HEBRU 4 Bible Online

HEBRU 4 - Lamkang bible

HEBRU 4

¹Ava leiji, Mma karngat na thu klut kcha avaki paureel ma am slii thu naan ku mii khatti kthlung pchaang kma ngi akekṭewl in kro kdingi nenni ṭi chaan che.

²Mleija mmaan hinni mthlen lulu ngi kṭha paumin ava nen nhin kthleng, pdainu mdo aryaak in paumin ava do khat lee tipsit lamme, mleija karyaa rek va mlamrin chaak in tu kilṭhi ngi arlaang lamme.

³Mleija krin cha nenva karnga ava thu talu chaak in, Mma ngi hanto theda, “Nei kuplung thitti pau kdo kham lulu ngi, ‘Mmaanni Neiki karnga ava thu luwt chip pchaang lam nime.’ ” Dultipaam mapṭhan daat ki Mma nong ṭuw dok daat joso kthe chaakka.

⁴Mleija mun khat thung ngi tikheu ava mlam hanto ngi theda, “Ungta Isowr ri mnong tlot na mkheng thungki mnii tikheu na nitti karnga da.”

⁵Ungu mun ava thu Mma ngi the nowlda, “Mmaanni Nei kakar ngat na thu lut pchaang lam nime.”

⁶Ava leiji, klut ra mii angṭhe ma am leiji, ungu ru kri verri kṭha paumin karlaang kcha rekki, mpauleek lei inni mlu pchaan maan leiji,

⁷mpha roi ksot diltha Mma ngi Devid hin theda, “Snii,” mdo dit nit khat palreen pik lamda, mpauna rekka hanto tker lamda, “Snii ngi naanni Mma krowl aryaak in mpha thu, aplung ril in tapchai maan.”

⁸Mleija Joshua hin mkarngat chaak naan mpiik bi, Isowr va dil kira nit khat ava the nime.

⁹Ava mkurthut bi, Isowr mii rek tummi mkarngat nraan sabath nit khat ka am daatta.

¹⁰Mleija Isowr karngat na thu klut kcha ku mii khat ava, Isowr ri Mma nong thungki mkarngat ava lulu ngi, mma ruk va mnong tlot thungki karnga kcha.

¹¹Ava leiji, ku mii khat lee ngi paukleek ava thu mtluk ma nra, nenni karnga kcha thu talu chaak nraan ru lou chaan che.

¹²Mleija Isowr pauna ava kring, ungu mdo tlot slii, kaang ksaang haa knii kraang jap kheel dekki kraang, raothla leh pthla kpurdu, ungu mhang leh daksaa kurjom kṭhen kpha thu kthun pchaang, ungta arthluwk dobin leh plungthuw mdo dee teng pchaan.

¹³Ungta mdo seem khat lee ngi Mma maiṭhuwm ki kurdowl daat ame, pdainu do mkheng nga Mma mik sut na thu kandang, Mma hin nen nkheng ngi mlei tpiik raan.

¹⁴Ava mkurthut bi, nenni Isowr Chapa, Jisu, Parwaan tha ktlowng Thiimpu Kparthaang sii nenni tathloi in kdingi nenni tithe thut dok in ava knetti arpom inche.

¹⁵Mleija nen nsowl chaak naan thu wonsat klo pchaang kma ava pme, pdainu nen lulu ngi mlam khim khai thu mdo pthleem, anto daat joso pnu ktla kma Thiimpu Kparthaang nenni tathloi chaak in.

¹⁶Tditta mpha kcha deekki tikriin in mido tbom chaak nraan, wonsat leh plungnee tarlaan chaak nraan, nenni plungnee ko onna ktinel tekki plung prip chaan che.