Read Lamkang HEBRU 6 Bible Online

HEBRU 6 - Lamkang bible

HEBRU 6

¹Ava leiji, chodu ki Khrista ki paurin ava nenni ma pthiin che, ungu plung kurchuwl ktongtha, kdiyou nong rek thungki plung ren kuhur kapṭhang Isowr ktongtha krin cha thu vang inche;

²baptis ktlo, khut kikhiing mlei thu mdo parseel, kdiyou rin karheel naki, ungu kṭuw knai kma ki kekṭewl thu pṭhang nowl maan che.

³Ungta Isowr ri mrot rangta nenni hava tlo inche.

⁴Mleija veikhat kleng dok rek, Parwaan ki chla kparsin na dok rek, ungu Pthla Kchiir ki mtum kpha dok rek,

⁵ungta Isowr ki kṭha pauna leh karvang rangki kum ava ki rutan kparsin na dok rekki,

⁶vei khat nowlli plung ren kuhur tdit ava kparsa langlang nga, mleija mmaanni Isowr Chapa ava mkhusi inni mmaan mdaksaa kat in tummi khros leen pthoi lamda ungu kandang ngi ningkja mdo piik in.

⁷Mleija mleen khuwkra thlit daat ava knee, ungta bil knum rek tummi chiibaal kupthuw pik ungu paam ava ngi Isowr hinki phowl kṭha ava mdo arlaan chaak.

⁸Pdainu tirliing nowm daat muk mownbi, ava do sime, mdonna thangva mei thu kukbung chra.

⁹Anto daat joso nei kwonsat lo rek, neenni hanto pau daat jown ring naan tummi mṭhat bet nra tditta kirliing kchara ava nenni tbin psuk chaak in.

¹⁰Mleija naanni ado tlot slii in ava Isowr ri anong tlot in ungu wonsat ava kjuwm mi suwda mdo pindit pik ava pme, naanni kintiing rek sok adolo chaak in tummi wonsat mdo tidet.

¹¹Ungta neen kdo bin chaak inna naan mii pum ktaiji kdung ado bin chaak in ava mṭut na kpha dekki ning kakraalli kinṭim sappi ktidet inna kdingi abin chaan.

¹²Tditta ava leiji naanni howng avat ma nraan, pdainu krin cha, ungu kdiil deiji paureel ava kpha kcha rek nopa klou cha kurthuwk in.

¹³Mleija Isowr ri Abraham hin pau mreel mpha thu, mpaureel nra klin ku khat lee ma amma leiji, mma mthina ngi pauktham da,

¹⁴theda, “Kinditti Neiji phowl kṭha apii nik di ungu aju purjou pok chnik di.”

¹⁵Ungta Abraham mi hanto diil dei chda, paureel ava pha chda.

¹⁶Mii rek va mmaan hinnu klin bet ava miing pau ktham nlamda, ungu mdo pne bet nraan, ungta mkarteen naan mkheng thu mpau ktham inni mṭut na purthuw lamda.

¹⁷Ava leiji Mma paureel karlaang kcha rek hin Mma poibin ava kartlei liit pme tdit mkindit nangi Isowr ri mdo tdet nuwm leiji paukham tpomda.

¹⁸Tditta ava leiji nenni talu chaak nraan nen ndusukki ka am plung dobin knetti karpom kirtlei liit kma rangki do knii thung ngi plei knei rang nga kurthuwk liit pme, ruktang ngi nen mido tuk kso nraan leiki.

¹⁹Nenni tphaak chaak in plung dobin chaak ava raothla ktongki hava nareeng lulu kat, tditta kukdown Inn thungki buwkhaar dil pangtha ril ktlummi talu chaak na.

²⁰Ava thu Jisu ngi Melkhiyedek dopar naak dil kṭoiji kṭuw knai kma ki Thiimpu Kparthaang Khatti, nen kchang donda ru kri verri milu pik inda.