Read Lamkang HEBRU 7 Bible Online

HEBRU 7 - Lamkang bible

HEBRU 7

¹Mleija Melkhiyedek ava Salem ki kruwng, Isowr ki Thiimpu Kparthaang sii Mmangi kruwng rek eayou thida mdil kinle da Abraham kurdut ṭhida ungu mhin phowl kṭha pii chda,

²ungta Mma hin Abraham mi do khim khai thungki tholowm sruk sowm thungki khat piida. Mmiing ava ru kri reepki rinkindit Kruwng kdingi purlup da, ungu ava dilli Mma ava Salem ki Kruwng ruk kurthuwk da, tditta ava kdaaiki Kruwng kurthuwk.

³Mma ava Mpah mdit mata Mnuh mdit mata mthuwna charuwl ka am pme ungu mdo pṭhunna nit mdit mata mrinkhu ṭut na ka am pme, pdainu Isowr chapa rek Mma ngi purkuk thlit da kṭuw knai kma ki Thiimpu khatti ka am.

⁴Asuw daat in, Mma tija thu klin chdaatta. Nenki npah in Abrahammi chasowm ki tholowm ava Mma hin piida.

⁵Ungta thiimpu khat ki nong karlaang kcha Levi charuwl rek kat daat rukva Nowlam paureen dil kṭoiji mii rek hinki, tditta Abraham charuwl thungki kurthuwk daat joso mu u mnao rek hinki tholowm ava louda.

⁶Pdainu mmaan charuwl thungki kma hava miilaiji Abraham hinki tholowm arlaang da ungu paureel karlaang dok mma ava phowl kṭha pii chda.

⁷Klin betti kdil bet hin phowl kṭha mdo piik ava arleek setti pau tkarteen psuk nra ame.

⁸Hava thangva kdiyou chra miirek ava ngi tholowm mdo arlaan; ava thangva kring sakhi kthloi Mma ngi mdo arlaan.

⁹Ku mii khatti hanto kthe ruk kro tditta tholowm karlaang Levi mdaksaa daat ruk va, Abraham hin tholowm mdo piik,

¹⁰mleija Melkhiyedek ki Abraham mkurdut ṭhi mpha thungva Levi ava kṭou mlai liit.

¹¹Tunva Levi phungka thungki ngi thiimpu ki mkinreel mkurthut bi, (mleija ava kurdu ngi mii rek va Nowlam mdo arlaan chaak,) Aron do parnaak dil kṭoiji Miing khat kchang nga melkhiyedek dopar naak dil kṭoiji ktlok thiimpu khat mthuw nrangki arleek setti talu msit ka amda?

¹²Mleija thiimpu thung ngi mkartleu nra ma ambi, Nowlam rukka mkartleu kat ra.

¹³Mleija ktlok chati kurthuwk miilai khat mlei thu hava lea mdo the, chati ava thungki ku khat lee ngi suwlbuwr sok lome.

¹⁴Mleija Judah charuwl thungki nenki Mukpu ava kthuwk kat, ungu chati ava ki thiimpu mlei thu Mousi va do khat lee theme.

¹⁵Melkhiyedek hep daat ktlok Thiimpu khat mthuw mpha thu hava kheel dekki kindit chel ra.

¹⁶Thiimpu khat kurthuwk Mma hava daksaa ktongki charuwl mlei thu mdo ngeen dil kṭoi kat ava pme pdainu kṭuw knai kma rinkhu ki rutan dil mdo ṭoi.

¹⁷Mleija Mma hinni hanto sakhi piida, “Melkhiyedek dopar naak dil kṭoiji, Nah kṭuw knai kma ki Thiimpu Khat pti.”

¹⁸Khat ktong thangva, chodu ki paureen ava sowlda do msit ma leiji kneng pthiida.

¹⁹Mleija Nowlam va mkinreel do khat lee pthuwk me; ktlok khat ktong thang nowlva plung dobin chaak kṭha bet ava mithe pik inda, ava thu nenni Isowr hin tnai chaak in.

²⁰Ungta ava paukreel ka am kma ava pme.

²¹Chodu ki thiimpu kurthuwk rek va, pau kakham ktaakki mnong inna mdo tlot in, pdainu hava khatta pau mdo reel tu kilṭhi ngi theda, “Mukpu ngi paukham da, ungu mpoibin parthlei nime, ‘Nah kṭuw nai kma ki Thiimpu Khat ava pti.’ ”

²²Hava ngi Jisua kindit kat ki kṭha bet paurina pur owlda.

²³Mnong tlot inna kdiyouvi mdo pkhaan thlit lei inni, chodu ki thiimpu rekka msing knempok lam.

²⁴Pdainu Mma ngi Thiimpu nong ava ktlok khat hin ksilna tlome, mleija Mma kṭuwnai liit kma ka am.

²⁵Mma thu Isowr hin knai kcha rekka mpha ktai thu kheel setti Mma ngi kaktlan pik lam mdo pchaan, mleija mmaan tummi pau kthe pik ra kdet liit kma kring.

²⁶Mleija hantolu hep daat Kchiir ungu tupsul na ktaak, pnu ktla kma, pnu kirvei rek thungki msikki ka am, Parwaan kheel dekki mdo khiin Thiimpu Kparthaang Khat nenni tathloi in.

²⁷Thiimpu kparthaang rek va ru kri verri mmaan mdaksaan kat ki pnu tum tloda, audilli mii rek pnu tummi mnii ktaiji tlaai mdo down in lulungi, Mma va mdo tlot nra ame. Mleija Mma mdaksaa mkarpiik chaakki vei khdaatti mii mkheng tumma mdo tlot dok.

²⁸Mleija ksowl cha miilai ava Nowlam mi thiimpu kparthaang rang ngi mdo tpur owl, pdainu Nowlam dil thang ngi kthuwk paureel ki pauna ava ngi kṭuw knai kma ki mkinreel Mchapa ava mido tukchol pik in.