Read Lamkang HEBRU 8 Bible Online

HEBRU 8 - Lamkang bible

HEBRU 8

¹Tunva neen kdo the mpau katta hava: nenni hantolu hep daat Thiimpu Kparthaang tathloi in, Parwaan tha mkullaar pummi Kruwng ko onna tunni mchang ktong tha kuk ong Khat,

²mun Kchiir thu, miilai kma pdainu Mukpu dopri mkindit ki buw Inn thu mdolo.

³Mleija thiimpu kparthaang khim khaija chla ungta tlaai kdown rangki mdo kchol dok; ava leiji hava Thiimpu rukva do khat mdo down ra.

⁴Tunva Mma ngi dultipaam thu ka am katkat mkurthut bi, Mma ava thiimpu khat kurthuwk liit nime, mleija Nowlam dil kṭoiji chla kdown ra ava thiimpu rek ka am lam.

⁵Mmaan ava Parwaan ki mun Kchiir thungki mno leh marlim sok klou kcha ngaal lam; mleija Mousi ngi buw inn kṭhunra mkirsim mpha thu Isowr ri mhin parseel da, theda, “Lown tun nah ahinni mdo tdet dil kṭoiji do khim khai ado sak nra asuw cha.”

⁶Pdainu anto katti, Khrista ngi pliw hinva kheel siingi kinreel kṭha bet ki paurina Mma ngi pau kpurdon ki sok klou ava pha chda, mleija kṭha paureel tuwn ni ava ktlo kurthuwk.

⁷Mleija ru kri thokki paurina ava ngi mparma mabi, miknit naki mmun rang nga amnime.

⁸Mleija mmaan doparma Mma ngi mphaak thungta Mma ngi theda, “Mukpu ngi theda, Mnit rek kurjungra, ava thu Neiji Isreel phungka leh Judah phungka tu kilṭhi ngi, ren paurina khat pṭhang nik di.

⁹Neiji mkhut in kjowng nu Egypt paam thungki, kṭhi pthuw lam nitti, mmaan pahle hin paurina kdo seem pik lam lulu pme; mleija kpaurina thu mmaanni nowl lamme, ungta ava leiji Neiji plung pdun psuk lam maang.

¹⁰Ava nit rek diltha, Neiji Isreel phungka tu kilṭhi ngi, do seemra paurina ava hava, dida Mukpu ngi theda; Nei Knowlam ava mmaan poibin thu Neiji thii nik di, ungta mmaan plung thu kjit pik lam nikdi, ungu Neia mmaanki Isowr kurthuwk nik di, ungta mmaanna Nei kmii rek kurthuwk lamra.

¹¹Ungu ‘Mukpu adei cha,’ kdingi the lam thida mmaan mii pum ktaiji,mplap hin ‘Mukpu adei in,’ dida mii pum ktaiji mu u mnao hin purchuk nime, mleija mkheng kheng inni kmo suwn kingi, kver kpha dekki Neia mhai kdei chlam ra.

¹²Mleija Neiji mmaan dopar ma thu wonsat lo lam nikdi, ungu Neiji mmaan pnu rek bin phaak nowl ni maang.”

¹³Mma ngi ren paurina ru kri ver ki ava pliw pur owl pthii da. Ungta pliw kurthuwk cha ungu kchuwl cha ava kmawng chra mthea.