Read Lamkang JEEMS 1 Bible Online

JEEMS 1 - Lamkang bible

JEEMS 1

¹Isowr ungta Mukpu Jisu Khrista ki sra owr khat Jeems ava ngi kinṭheu tir cha chati sowm lei knii rek hin tha: kurvui chaak lamma.

²Neiki ku u knao rek, naanni kja kakham knempok aparteel in thu, mkheng ava kanpa ngi mhailo pik chaan,

³mleija naanni adee in, tditta naan alamrin chaak kpirsin ni ado diil chaak nraanki mdo thuwṭhi.

⁴Ungta naanni do khat lee ado kriin ma nraan, mkinreel ungu kurkhum dok akurthut nraan, naan dodiil chaak ava ngi mdo purkhum dok.

⁵Ku mii khat lousing kvaat ma amta, mii mkheng hin pau ktaak liitti plung kneiji kpii Isowr hin aṭhil chaso, ungu Mma ngi mhin kpii chra.

⁶Pdainu plung kinṭheek liit kma mma ngi aṭhil chso, mleija plung kinṭheek mii do ṭhil ava tarthli do juwn truwn hep daat.

⁷Mleija plung kinṭheek ungu mlam mkheng thu plung krip kma miilai ava ngi Mukpu hinki do khat lee karlaang chrangki bin cha mso.

⁹Plung kjuwm ku u knaova mdo khiin pik leiji napal atlo chso,

¹⁰ungu suwang miiva plung kdowng ngi napal atlo chso, mleija nowmsuwl paar lulu ngi mma ava kṭuh chra.

¹¹Mleija kniw kthuwkki kdung pchaida msat cheva nowmsuwl ava kpurvui kchalu; mreipaar ṭuh chda, ungta mrungchen kmawng kcha. Anto lulu ngi suwang miilai rukka mdu suk thung ngi kchuwl kcha kurthuwk.

¹²Kja kakham kparteel mii ava msuwkṭha, mleija mma ngi kpirsin mri mpha thu, Isowr wonsat klo kcha rek hin pau mdo reel pik dok rinkhu ki laar luwkhum mma ngi karlaang chra.

¹³Mii ava mapthleem mpha thu ku mii khat lee ngi, “Neia Isowr ri mdo tipthleem,” kdingi kthe rome; mleija kṭha kma ngi Isowr va pthleem me, ungu Mma mdaksaa rukva ku khat lee pthleem me.

¹⁴Pdainu mii pum ktai ava Mma do ngei thu, ungu Mma mdak kat do ngei thu kchet rangki mdo pthleem.

¹⁵Audilli plungbin kurmowl ava ngi pnu pṭouda; ungta pnu mkurchuwl dok leh kdiyou mdo pṭou.

¹⁶Nei kwonsat lo chaak ku u knao rek, kurhuwng chmaan.

¹⁷Kṭha baanjam khim khai ungu kinreel chla khim khaija tun knungki kthleng, Mma ava karthleng liit me mdit mata kjiingnu kur owl kma mar awngki Npah ava hinki kurjung.

¹⁸Mma do seem rek do ava thungki ru kri ngi thei mkurthuw nra, Mma mdaksaa kat plung binni nenna kindit pauna ava thu mido tiṭhi chaak in.

¹⁹Nei kwonsat lo ku u knao rek, hava adei in. Mii pum ktaija karyaa thu knaa ksing, kpau thu naam naammi kpau, naam naammi plung kthi kurthuwk so.

²⁰Mleija miilai plung thitti Isowr ki rinkindit nong tlo pchaang me.

²¹Ava leiji, ktobor ungu kṭha kma nong ktlo mkheng ma pthiida, naanki raothla rek kaktlan kap pchaang mdo pṭau dok pauna kparneem ava tu kilṭhi ngi mhai arlaan pik chaan.

²²Pdainu pauna ava ktlo rek kurthuwk in, naan adaksaan kurhuwn chaak nangi karyaa daat kurthuwk maan.

²³Mleija ku mii khatti pauna ava aryaa thida ktlo mkurthut mabi, mma ava meenseen thu mdaksaa ki nopa mai ksuw kcha ava hep daat.

²⁴Mleija mma ngi mthina ki nopa mai suw chthida, mche nrang tha mche dok che, tak hep lu kdu ping tdit mma ngi mdo parngiil pthii.

²⁵Pdainu kinteu kcha ki Nowlam mkinreel ksuw kcha ava, kdet liit kma ka am, mdo parngiil pthii ra knaa daat ktikiin kma pdainu mnong ktlo mii ava ngi mnong tlot thu msuwkṭha ra.

²⁶Ku mii khatti miplei mukjowng pchaan ma, ungu muplung ril thu kurhuwng chda, dhormo kneiji mkarbin bi, ava lu miilai dhormo ava do ksi ava pme.

²⁷Npah in Isowr maiṭhuwm ki kbuwr liit kma kchiir dhormo ava hava: Sranao rek ungu meikhu rek jat kham thu kvel, ungta dultipaam ki ktobor thu mdaksaa karneeng da ka am ava.