Read Lamkang JEEMS 2 Bible Online

JEEMS 2 - Lamkang bible

JEEMS 2

¹Neiki ku u knao rek, nenki Mukpu Jisu Khrista,ungu laarnee ki Mukpu krin cha thu ksan ksui tlo maan.

²Mleija naan akunpun in mpha thu jeering khutpaar knaa, dona mman klu ngi kurthlong mii thleng sora, ungu sra miilai khat rukva dona pliw ngi kurthlong sora marvan lu mpha thu,

³ungta naanni mik klor maiklor ava kukthok betti suwda, “Awonsatti hava thu mhai ko on pik chaan,” dida the thida Sra miilai ava hin “Nang nga autha erip daat,” mdit mata “Nei kukhu ther tha eko ong,” dida kthe akurthut innu,

⁴naan asingreel inni pjiir inti nu ungu kṭha kma poithuw ngi kekṭewl maan timo?

⁵Nei kwonsat lo ku u knao rek, mhai aryaak pik chaan. Krin cha thu suwang kthuwk rangki Mma wonsat lo rek hin pau mdo reel pik dok rek Kruwngpaam ki charuwl rek rang ngi dultipaam thungki sra owr rek ruk Isowr va kchol memo?

⁶Pdainu naanva sra mii ava kjat pik maan ti. Naan suwk akupthuwk in, kekṭewl lusang thu akuhowl in mmaan ava suwang rek pmemo?

⁷Naan atun ki tak kjat kurhui amiing in ava mmaan ni mdo jowm chaak in pmemo?

⁸Kchiir Laaika dil kṭoiji, “Nah adaksaa lulu ngi aveen wonsat alo,” dida mdo the kinreel siiki Nowlam ava kindit deekki apurkhum chaak inbi, kṭha deekki ktlo in pti.

⁹Pdainu naanni ksan ksui atlot inbi, naanna pnu ktla kchaan pti, ungu kar mak nong ktlo rek lulu ngi Nowlam mi atikṭewl inna.

¹⁰Pdainu ku mii khatti Nowlam mkheng karkhiik chaakka, dida karthe pdainu khat pang thu mapchaan mabi, mma ava mkheng tun mpar ma a.

¹¹Mleija, “Losang ṭhima,” dida kthe mma ngi “Mii eayou ma,” kdi rukva theda. Naanni losang kṭhi kma pdainu mii a eayo inbi, Nowlam ki kpar mak ava in pti.

¹²Ava leiji kintek Nowlam kurdu ngi mdo kṭewl rang heppi tpau ruk pau in ungu ta tlot ruk atlo in.

¹³Mleija wonsat knei kma ku mii khat hin thangva wonsat ktaakki mdo kṭewl pik; anto daat joso wonsat ava ngi kekṭewl ava mdo pchaan.

¹⁴Nei ku u knao rek, ku mii khatti krin chaakka dida karthe thida, pdainu mnong mtlot mabi, ava tak msit ka am da? Mdo rin chaakki mma ava kaktlan pik rangmo?

¹⁵A u anao in psel mdit mata acher in khatti mdo hiil naak ra thloi msora ungu mnii ktai ki then mikriin nu,

¹⁶Naan ku mii khatti mhin inni, “Kdaaiji vang chbak, klum deekki am, apoi pa chso,” dida the thida, daksaa do kriin do khat lee mpurdon pik mabi, ava tak msit ka amda?

¹⁷Ava leiji krin kcha rukka mnong ma am mabi, mthina ngi kdiyou cha.

¹⁸Pdainu ku mii khatti kthera, “Nangva rin chti neiva mnong ngi kdo tlot,” anong rek kma ado rin chaak ava mhai tdet, ungu nei rukva klamrin chaaka mnong ngi aju tdet ni.

¹⁹Isowr ra khdaat tdit ado rin chaak in; kṭha deekki ava ado tlot in. Tarnam rek daat rukva mdo rin chaak, ungu mṭit inni kunchun lam.

²⁰Do ksi kma mii rek naan, mnong ktaakki krin cha ava mthei ktaak tdit naanni adee nuwm inna?

²¹Nenki npah in Abraham mi suwlbuwr tunni mchapa downda mpiik mpha thu ava mnong rekki mdo pandang pmemo?

²²Krin cha ava mnong rek tu kilṭhi ngi kchet ve, ungu krin cha ava mnong rekki mdo purkhum tdit naanni ado dee in.

²³Ungta Kchiir Laaika ava kindit, “Abraham mi Isowr rin chda, ungu ava rinkindit khatti mdolo pik,” dida mdo the ava kurkhum dok; ungu mma ava Isowr plap mdo dit.

²⁴Mii ava mnong rekki mdo pindit pik, ungu mdo rin chaak daat pme tdit naanni ado dee in.

²⁵Ungta anto lulu ngi ko ok kma Rahab ruk va, tamsii rek ava arlaang chthida, lam msik khat tha mdo sii ava mnong ngi mdo pindit pik pmemo?

²⁶Mleija Pthla ktaak daksaa ava kdiyou kcha lulu, mnong ktaakki krincha rukka kdiyou.