Read Lamkang JEEMS 3 Bible Online

JEEMS 3 - Lamkang bible

JEEMS 3

¹Neiki ku u knao rek, naan mii knempokki chukpu rek kurthuwk maan, mleija kurchuk nen ava hin klin ungu kparsa langlang ngi kekṭewl ra tdit ado dee in.

²Mleija nen nkheng inni do knempok tparma lu in, ungu ku mii khatti mpau na thu mparma liit mabi, mma ava kinreel miilai khat kurthuwkka, mdaksaa mkheng rukka kukjowng pchaang ra.

³Nen mido tupṭoi nraan nenni skowl ner rii happi nner inna nipṭen inbi, nenni ndaksaa mkheng ruk tu howl ra.

⁴Arkuwng pii rek ruk mhai sut pik chaan; kling langlang ungu kheel siiki tchang kraang ngi juwn daat joso nareeng kdil suwnni kuhowl mii ava ngi mdo howl nuwmna tha mdo howl.

⁵Anto lulu ngi plei ava daksaa thungki msing kdilsuwn, ungu klin klin do napal mdo tlot. Paam klinpa ava meiṭai suwnni mdo thlaar kre.

⁶Ungta plei ava mei lulu. Nen nthungki msing khat plei ava ngi rinkindit kma dultipaam thu kṭha kma ṭoujouda, rinkhu mkheng nga meiji ṭuwngda sim meiji kṭuwng cha.

⁷Mleija nowmsaa, plung ngi kundowt, truwn thungki mdo seem msik msikki do puwa ava tipmeeng pchaang da, ungu ava dultimii ngi mdo tipmeen.

⁸Pdainu dultimii ku mii khat lee ngi plei ava tipmeeng pchaangme. Karnga liit kma kṭha kma khat, kdiyou kruw ngi kdim kcha.

⁹Ava ngi nenni Mukpu ungu Npah panpaak in minnu, ungu ava ngi nenni Isowr arling klou mii ava pauhur tbuk naan.

¹⁰Ner khdaat thungki phowl kṭha leh pauhur kthuwkve. Neiki ku u knao rek, hava anto liit rang pme.

¹¹Diitlaang kphul khdaat thu dii kthlum leh kakha kphulve kromo?

¹²Nei ku u knao rek, kduwt ding leen kruwn kchui mdit mata rik rou leen kduwt kchui rang mo? Ptih dii thu dii kṭha kthuwk pchaang pme.

¹³Naan arlakki ksing ungu kdei pandi ku ka am in ptida? Lousing ki plung kparneem mi mma nong ava kṭha rinkhu ava ngi atidet chso.

¹⁴Pdainu naan plungril thu kakha kheithe ungu mdaksaa kparning ma ambi, napal tlot na maan ungu kindit tunni pleinei maan.

¹⁵Havalu lousing nga tun knungki arjung kṭum ava pme pdainu dultipaam pthla ktongki, dijabowl hinki.

¹⁶Mleija kheithe leh daksaa kparning amna thungva kar mak vevu ungu kṭha kma nong ktlo khim khai ka amlu.

¹⁷Pdainu tun knungki lousing ava ru kri ngi Kchiir, au dilli kdaai, plung kparneem, mlei ko ol, wonsat knei leh kṭha theiji kdim, plung chel karche mdit mata plung ktobor ame.

¹⁸Ungta rinkindit thei ava kapdaai rek dovar kdaai ava.