Read Lamkang JEEMS 4 Bible Online

JEEMS 4 - Lamkang bible

JEEMS 4

¹Ava ngi naan arlakki kar ai kalrai rawl kurdu mdo thuwṭhi pme mo? Naan thungki msing rek ava ngi rawl karnaak ṭhira ngei maanti mo?

²Naanni kdung ngi ado ngei in ungu thloi maanti; ava leiji naanni mii ado eayo in. Ungta naanni khei ado the naan pdainu phang chmaan ti, ava leiji naanni kar ea ṭhiin ti rawl ado karnaak ṭhiin. Naanni thloi maanti, mleija ṭhil chmaan ti.

³Naanni aṭhil chaak in ungu arlaang chmaan ti, mleija naanni ado kinthlet loi raan kar makki ado ṭhil chaak in.

⁴Trin chaak kurhui kma mdo seem miirek! Dultipaam plap kurthuw ṭhi ava Isowr kipteng tdit dei maan timo? Ava ngi mlei kurthuwk da ku mii khatti dultipaam plap mkurthut ṭhi nuwmbi, mdaksaa ava Isowr kipteng mpurthuw a.

⁵Mdit mata “Nen nthung ngi ka am Mma ngi mdo seem Pthla ava kdung kheithe nda,” dida Kchiir Laaika ngi mdo the ava do ksi kma naanva abin inmo?

⁶Pdainu Mma ngi kheel setti mipii inda; ava ngi mlei kurthuwkda Laaika ngi theda, “Isowr ri kpohok rek ava mat da, pdainu plung kdowng rekka plungnee pii chlamda.

⁷Ava leiji Isowr kurdu ngi naan adaksaan na karpii chaan. Dijabowlli amat indon ungu naan hinki kchen chra.

⁸Isowr hintha nai chaan ungu Mma ngi naan hin aknai pik chraan. Pnu kirvei rek naan, akhut in apartleu chaan, ungu plung kunṭhuwn ni am maan, aplungril in apchiir chaan.

⁹Kdung kja ngi ungu kurnung karbaang inra ṭap in. Naan apnii inna kurnung karbaang tha ungu akanpat inna aplung in jiinna ktong thang ra.

¹⁰Naan adaksaan ava Mukpu maiṭhuwm mi plung kdowng ngi am in ungta Mma ngi akikhiing chraan.

¹¹Ku u knao rek, khat ti khat mraal kpii ngi kṭha kma pau karthe nmaan. Mu u mnao mraal kpii ngi kṭha kma pau kthe, mdit mata mu u mnao kekṭewl, Nowlam mraal kpii ngi kṭha kma pau kthe ngi Nowlam kṭewl maan. Pdainu naanni Nowlam akṭewl inbi, naanna Nowlam kupṭoi kurthuwk maanti, pdainu kekṭewl miilai khat in pti.

¹²Kaktlan ungta ke eakrep kapchaang Mma ava Nowlam kpii ungu kekṭewl khdaat kurthuwk. Pdainu mveen kekṭewl nah ku pti da?

¹³“Snii mdit mata pduk nii ngi nenni khuwpii hava thu chet in chera ava tha kum khat am in che, tphaak chaak raan sumdowl lou inche,” dida kthe naanna tun tunni arvaan.

¹⁴Pduk niiva tak kthuwk rang tdit naanni dei chmaan ti. Naan arinkhu inna talu da? Mleija naanna mpha mruk tummi kandang thida kmawng kcha mnil ava in pti.

¹⁵Ava kchang nga, “Mukpu poibin mkurthutta, nenni ring in min don hava mdit mata ava tatlot ra,” dida naanni ado the raan.

¹⁶Pdainu tunva naanni kpohok ungu kparlin nong atlot inna. Hantolu hep daat kparlin ktlo mkheng ava kṭha pme.

¹⁷Ku mii khatti mkindit dei chda, ungu ktlo kma mma ava pnu.