Read Lamkang JEEMS 5 Bible Online

JEEMS 5 - Lamkang bible

JEEMS 5

¹Tun tunni arvaan, suwang rek naan, atun thaanni kthleng slii kja kakham tummi ṭap chaan ungu owng in.

²Naan suwanthuw ava kṭop kcha a, ungu ado ana inna ngeetti mupṭum thutta.

³Naanki jeering ungta jeering kpowl ava tampei kakaak kcha a, ungu tampei ava ngi naanki sakhi kurthuwk ra ungu mei lulu ngi naan adaksaan kchaara. Mṭut na nit rek tummi naanni alrou apurtuwl inna.

⁴Asuw in, naan bil thu bil knum rek arda man, naanni ado kardowl daak rekki owng lamda; ungu kakhau rek own ava mpunpa ngi Mukpu knaa kthlung nga.

⁵Naanni dultipaam thu arthlu arle ungu kngei ning kthlung ngi ka am in pti; mdo suryo nra nit khat kira aplung inna apmer inna.

⁶Naanni rinkindit mii ava mraal pii inti, te eayo ruk ado eayo in; mmaanva amat inme.

⁷Ava leiji, ku u knao rek, Mukpu murjun du khim khaiji adiil dei chaan. Asuw in, mman klu langlang dultimii leen kpanma ungu kukto ngi khuw mrat du khim khai bil knum mii ngi khaang da mdo ardat chaak.

⁸Naan rukva adiil dei chaan. Aplungril in apṭhang chaan, mleija Mukpu arjun nrang nga knai tekka.

⁹Ku u knao rek, naanna ado tekṭewl ma nraan khat leh khat kurnur maan; asuw in, kekṭewl ava thurngot bulli krip daatta.

¹⁰Ku u knao rek, Mukpu miing ngi khulpu rekki kja kakham mdo diil in ava lulu kurthuwk in.

¹¹Asuw in, knetti kakhaang rek ava neenva kanpa kdo dit lu in. Naanni Job do khaang ava ado aryaak dok in, ungta Mukpu wonsat lo ungu wonsat knei Mukpu ki mṭut na nit ava naanni ado dee in.

¹²Pdainu ku u knao rek, hava mkheng tun, parwaan mdit mata dulti mata ktlok miing kthamda paureel maan, pdainu ado tekṭewl ma nraan, naanni ong ngi ado dit raan ava ong ngi adi in, eme ado dit raan ava eme adi in.

¹³Naan arlakki kja kakham ku mii khat ka ammo? Mma ngi aṭhil chso. Kanpa ku mii khat ka ammo? Mma ngi kanpa laa atheso.

¹⁴Naan arlakki kukoi ku mii khat ka ammo? Mma ngi Rinlop ki kver rek a ownso ungu mmaanni mma tumra Mukpu miing ngi thao apbul lam sora, aṭhil pik lamso.

¹⁵Ungta krin cha rek do ṭhil pikki kukoi miilai ava kaktlan chra, ungu Mukpu ngi kpardel prip pik chra; ungta mma ngi pnu marve bi, Mma ngi kuptlot pik chra.

¹⁶Ava leiji, naanni adam chaak nraan, khatti khat hin apnu ton in athe thuw in, ungu khat leh khat tummi karṭhil pik in. Rinkindit miilai khat do ṭhil ava kheel li ruktang ngi nong mdo tlot.

¹⁷Elijah ava nen ndaksaan kat heppi dulti miilai khat, ungta khuw mrat ma nra plung klutti mma ngi ṭhil chda, ungu kum kdum thla truk lik thu dultipaam thu khuw rame.

¹⁸Audilli mma ngi ṭhil nowlda ungbi parwaan ki khuw prat pik chda, ungta dultipaam ava ngi chasowm arkun chda.

¹⁹Neiki ku u knao rek, naan arlakki ku mii khatti kindit thu mparvai chaak ungu ku mii khatti atiṭhi pinlet inta,

²⁰mlam ṭoi rang thungki parvai da kar makki ka am kcha, pnu kirvei khat arvan kṭhi pinle mma ava kdiyou dok thungki mraothla kaktlan pik chra ungta mupnu ton knempok ava kupkhum pik chra tdit mma ngi adeiso.