Read Lamkang 1 PITOR 1 Bible Online

1 PITOR 1 - Lamkang bible

1 PITOR 1

¹Jisu Khrista ki kenyee khat Pitor ri, Pontas thu, Galatia thu, Kapadosia thu, Asia thu, ungu Bethania thung ngi ṭhek kinṭheu tir da paam suwkki ka am rek,

²Chodu reeppi Kpah Isowr ri kcholda ungu Jisu Khrista pauthe mdo pṭoi nraan Pthla do tpinchel dok ungta Mma hii kthuwk ava ngi mdo alṭhut dok rek hintha: Plungnee leh kdaai naan athung ngi dim chso.

³Nenki Mukpu Jisu Khrista ki Mpah Isowr ava panpaak chaan che! Mma wonsat klin langlang ngi kdiyou dok thungki Jisu Khrista kring karheel thu kring kbin changi nnenna renni kṭou cha,

⁴Ungta kmawng kmara, kbuwr liit kma, kchuwl kma naan atumra Parwaan tha mdo arkhiik, alrou ava tphaak chaak nraan lei.

⁵Mṭut na nit ki mpha thu Isowr rutanni kandang ra mdo purchuwl dok nen tkirliin chaak nra kring thu ado tseel psuk pik in.

⁶Mpha mruk tummi tun tun naanni kja kakham knempok parteel daat jown tiva, hava thu naanna kanpa kcha in pti.

⁷Ava leiji naan do rin chaak plung klut ava meiji pirsin na joso kmawng chra mman klu jeering kheel dekki Jisu Khrista kpurphuwng thu kpanpaak ungu mlaarknei ungta kakjat pik mkurthut nra ado tpirsin naan.

⁸Mma ava naanni kdei liit kma wonsat lo chaan tinu, tun tunni naanni dei cha mjownti, Mma ava rin chaan tinu kanpa kcha in pti, ungu kheel siingi kanpa chnaan di.

⁹Naan do rin chaakki araothla in kirliing ado phaak chaak in.

¹⁰Kirliing hava mlei thu naan ado rangki kurthuwk plungnee ava pau kphuwng khulpu rekki mdo thlaam in.

¹¹Khrista ngi kja mdo parteel ava kthe thuw ungu dil thang ki laarnee mdo phaak ra ava mmaan thu ka am Khrista ki Pthla ngi mdo the pik dok lam ava tak hep kdu mii mdit mata talu mpha thung rang kdingi thlaam lamda.

¹²Tditta mmaanni mdaksaan sok lou lamme, pdainu naan tumra mmaan hin pandang da, Parwaan ki mdo arjuk sii Pthla Kchiir rekki naan hin kṭha paumin kparyaam mmaan ava tun tun naan hinni atithe pik inna, hava do ava Waan tamsii rek rukva kdung mdo dee nuwm chaak in.

¹³Ava leiji, aplungril in apnet chaan; kle apjaang in, Jisu Khrista mkurphuwn thu naan hin kthleng plungnee tun kdung kbin cha ngi plung athii chaan.

¹⁴Kthe kupṭoi kmo rek lulu, chodu ngi adee pandit chaak maan thu a am in lulu ngi am maan.

¹⁵Pdainu naan aku own kchaan Mma Mchiir lulu ngi, naan adaksaan rukka ache atlown nraan, mkheng thu chiir in.

¹⁶Mleija Laaika thu kjit da, “Kchiir ri am in, mleija Neia Kchiir ping.”

¹⁷Ungta ksan ksui ktaakki mii pum ktaiji mnong tlot dil kṭoiji kekṭewl Mma ava naanni Apah adit inbi, naan adaksaan ava paam suwkki a am in mpha thu kṭi ngi am in.

¹⁸Jeering kpowl mdit mata kmawng chra do kma, naan apah le thungki ado phaak chaak in do ksi kma rinkhu ava thungki in pti.

¹⁹Pdainu tupsul na ktaak mdit mata kbii ktaak Jaonao khat lulu ngi, Khrista ki hii mman klu langlang ngi ado tren dok in.

²⁰Mma ava dultipaam mpunchoi du liitti mdo kchol dok ksa, pdainu naan tumra mpha mṭut na thang ngi mdo pandan.

²¹Naan do rin chaak leh ado bin chaak in ava Isowr hin mkurthut nra, kdiyou dok thungki pring pinle da, Mhin ni laarnee pii chda, Mma thu naanni Isowr hin plung knet cha in pti.

²²Naan ki a u anao rek in ava kdung wonsat klo cha ngi araothla in ava kindit kthe kupṭoiji apartleu chaan.

²³Kmawng chrangki muh kma pdainu kmawng liit kma rangki muh ngi kring ungta kakbaang thlit daat Isowr ki pauna ngi naanna ren ṭouvi kṭou kcha in pti.

²⁴Mleija, “Daksaa mkheng nga nowm lulu, ungta mlaarnee mkheng nga nowm paar lulu. Nowm ava kpurvui cha, ungu mreipaar ava kṭuh cha,

²⁵pdainu Mukpu pauna ava ṭuwnai me.” Naan hinki kṭha paumin karyaam ava hava.