Read Lamkang 1 PITOR 2 Bible Online

1 PITOR 2 - Lamkang bible

1 PITOR 2

¹Ava leiji mii ngi khu siir mdo parthit nrangki mkheng ungta naan ki aṭhat nmaan mkheng ungu plung klut kma, kheithe, titi pau ksaam mkheng ama pthii dok in.

²Ren thokki kṭou ro nao kdowng heppi naanni kirliing ado phaak chaak nraan, Pthla ktongki arnuw dii anee in.

³Mleija Mukpuki wonsat ava naanni ado partem dok in.

⁴Mii rekva mdo pthlei pdainu Isowr mik sut na thu mman klu langlang ngi mdo kchol lung ava hin arvaan.

⁵Ungta Jisu Khrista thu Isowr dolo kro, Pthla ktongki tlaai down ni ado tdown nraan, naan adaksaan rukka hava kring lung heppi, Pthla ktong ki inn ksa kurthuwk in.

⁶Mleija Laaika thu theda, “Asuw in, Siyon thu mdo kchol dok mman klu langlang, markil ki lung khat Neiji kphun na, ungu Mma krin cha mii ava ningkja du nime.”

⁷Ava leiji, mman klu langlang Mma ava naanni arin chaan, pdainu krin cha kma rek tumva, “Inn ksa pangi mdo pthlei lung ava katti, markil ki kcho ril kurthuwkka.”

⁸Ungta “Lung khat ava mii rek khu siir parthit na, Lungpii ava mtluk chaak naan ra;” mleija mmaanni pauna ava ning mdo pu ui maan leiji khusiir kparthi ava mmaan tum kat ra dida mdo purtum.

⁹Pdainu naanna kjiingnu thungki kheel siiki mar awng tha ado to own dok in, tditta Mma ngi tngana nong rek mdo tlot ava kthethuw ra, mdo kchol dok chati, kruwng khatki thiimpu ra, kchiir chati rek leh Isowr miirek rangki in pti.

¹⁰Mpha khat thungva naanna mii pmaan ti pdainu tunva Isowr miirek in pti; mpha khat thungva naanni wonsat arlaang chmaan ti pdainu tunva naanni wonsat ado arlaan chaak in.

¹¹Kwonsat lo rek, naanki raothla rawl ado karnaak ṭhiin daksaa do ngei thungki ado ser nraan, mal rek leh paamsuwk rek lulu ngi neiji akaktham chaak inna.

¹²Kar mak nong ktlo rek dida kaplaal li mmaanni mpau ma nraan ktlok chati rek arlakki naanki kṭha nong mmaanni deida kvel nit thu Isowr kpanpaak mkurthut nraan kṭha ngi echet tlowng in.

¹³Mukpu tummi dultimii nopa khim khai ava kurdu ngi am in, kinreel siiki paam kpu hin,

¹⁴mdit mata kar mak ktlo rek mraal kpii ra paam kpu rek hin ruk va atlo in, ungu kindit nong ktlo mii apanpaak in.

¹⁵Mleija kṭha deekki ado tlot in ava ngi ka aak mii rek do dee pandit ma ava rim kdi kthii pthii ava Isowr poibin.

¹⁶Kintek mii rek lulu ngi am in, anto daat joso naan akinte chaak in ava kṭha kma ado khum nraan heppi sinton maan; pdainu Isowr sra owr rek heppi am in.

¹⁷Mii mkheng akjat chaan. A u anao in kthuwk ava wonsat alo in. Isowr aṭi chaan. Paam kpu ak kjat in.

¹⁸Sra owr rek, naanki plung ṭhat leh plung down ava daat kma pdainu kdung ado diil in rukva, kak kjat mkheng tu kilṭhi ngi naanki kpu rek kurdu ngi am in.

¹⁹Mleija Isowr dobin mkurthut leiji, kindit kma ki kja kakham parteel da, kdiil cha mii ava mdo rot pik.

²⁰Mleija naanni kar mak nong ado tlot lei inni ado tbun in ava akhaan chaak innu, ava tak ksi rang da? Pdainu naanni kindit tloda ungu ava leiji kja kakham parteel da, kdung adiil chaak inbi, naanna Isowr do rot pik ava in pti.

²¹Mleija hava kpha thu aju own chaan da, tditta naanni Mma khunee ado ṭoi chaak nraan, naan akurchu chaak nraan ado tmaak pik in, mleija naan tummi Khrista rukva kja kakham mdo parteel.

²²Mma ava pnu tla me; mner thu kar mak pau khat lee thuwk me.

²³Mma ava mrai chaak in mpha thu, Mma va rai purthul me; Mma ngi kja kakham mphaak thu, pṭit lamme; pdainu kindit deekki kekṭewl Mma hin lam mdo rin chaak.

²⁴Nenni pnu ktongtha diyou da rinkindit ktong tha kring tkurthut chaak nraan, ding leen Mma mdaksaa katti, nenki pnu mihur pik inda. Mma kchung kbii ngi naanna kdam ado phaak chaak in.

²⁵Mleija naanna Jao lulu ngi kparvai kcha in pti, pdainu tunva Jao krung ungu naanki raothla rek kseel Mma hin kinle kcha in pti.