Read Lamkang 1 PITOR 3 Bible Online

1 PITOR 3 - Lamkang bible

1 PITOR 3

¹Anto lulu ngi numei rek, naanki innpu kurdu ngi am in, tditta ku mii khat mursonni pauna kupṭoi kma kurthuwk daat lam joso, mmaanki numei lamchet ṭhatti, pauna ktaak liitti,

²mmaanni naan no ṭhat ungu lamchet kṭha mdee in mpha thu kpha kcha kurthuwk lamra.

³Naanna mduwn ni kirsim sam keher, jeering ngi kirsim, ungu dona mman klu hiil naa maan.

⁴Pdainu plung ngi kurdowl miilai plung kparneem ungta Pthla ngi kdaai kmawng liit kmara ava ngi kirsim chaan, ava Isowr do sut na thu mman klu.

⁵Chodu ngi plung klut snu rekki anto kirsim lamda mmaanki innpu rek kurdu ngi ka am lam.

⁶Anto lulu ngi Sarah ngi Abraham do the pṭoida, mhin Mukpu kdingi mdo own chaak. Ungta naanni kindit tlo da do khat lee ngi atipṭit maanbi, tunva naanna mma naole in pti.

⁷Anto lulu ngi innpu rek, naanki numei ava kapchaang chlang lang pme kdingi kak kjat pik cha tu kilṭhi ngi am in, mleija naanna rinkhu plungnee ki charuwl rek mdo punlom dok in pti. Tditta naan do ṭhil ava mdo pkhaan ma nra, naanki numei rek kbin pikki am in.

⁸Mṭut na rel tha naan akheng inni Pthla ki plung khdaat, plung kinṭim, mu u mnao wonsat klo, plung kparneem, ungta plung kdowng ngi am in.

⁹Kṭha kma tummi kṭha kma pinle maan, mdit mata krai tummi rai pinle maan; pdainu ava kchang nga phowl kṭha apii chaan, mleija naanni phowl kṭha ado phaak chaak nraan hava tummi naanna ado tu own dok in.

¹⁰Mleija, “Rinkhu wonsat klo ungu, kṭha nit rek kdei cha nuwm mii ava, kṭha kma thu plei knei ungta, kṭha kma pau mdo the nrang thungki mner arkhii chso.

¹¹Mma ngi kṭha kma thungki kinle sora ungu kindit atlo chso; mma ngi kdaai athlaam sora mdu suk asomchso.

¹²Mleija Mukpu mikka rinkindit rek leen ka am, ungu maknaa ava mmaan do ṭhil chaak thu kparvang. Pdainu Mukpu ngi kṭha kma ktlo rekka mraal mdo piik.”

¹³Naanni kindit chang kaptlaak akurthut innu, tunva naan sul akpurnul raanna ku rang da?

¹⁴Pdainu rinkindit leiji naanni kja kakham aparteel inbi, suwkṭha kurthuwk naan. Mmaan ava ṭi chmaan mdit mata plung pja maan.

¹⁵Pdainu naan plung ril thu Khrista ava Mukpu kdingi ak kjat chaan. Naan thu ka am kbin kcha leiji akikhewl in mii pum ktai ado arthaan pik nraan mpha ktai thu apurchuwl chaan, anto daat joso plung kdowng plung kparneemmi atlo in.

¹⁶Khrista thu naan alam chet in kṭha ava do ksi kma thleer ri ajowm chaan da akrai kchaan ma am mpha thu ningkja mdo phaak chaak nraan, naan plung bin ava kindit deekki arkhii chaan.

¹⁷Mleija Isowr poibin mkurthut bi, naanni kar mak nong ktlo thu kja kakham ado parteel in kchang nga kindit nong ktlo thu kja kakham ado phaak inni kṭha siira.

¹⁸Mleija Isowr hin mido tiṭhi chaak nraan, rinkindit kma rek tummi, rinkidit deek Khrista ava rukka mii mkhengki pnu tummi vei khat pang thu mi diyo pik inda, daksaa ngi Mma ava diyou da, pdainu Pthla dil kṭoiji ring karheel da.

¹⁹Mma Pthla ava ngi chet da rowng inn thu ka am pthla rek hin pau paryaam da.

²⁰Noha nit rek thu arkuwngpii msak slii thu Isowr ri kdung diil da mardat mpha thu, pthla rek ava ngi pṭoi lamme; ava thu ktlowm suwn tditta miilai tret rek daat dii thungki ktlan pik lamda.

²¹Baptis ktlo hava ngi arthawng purlup da, tunva naanna ado taktlan pik dok in, daksaa tun ki ktobor tuknuwl pthii lulu pme, pdainu Jisu Khrista rin karheel thu, Isowr plung kindit chel ava ngi theda,

²²Mma ava Parwaan tha hungkal da Isowr khut chang ktong tha ka am, Waan tamsii rek, Pthla ktong ki rutan kthloi rekka Mma tingi ka am.