Read Lamkang 1 PITOR 5 Bible Online

1 PITOR 5 - Lamkang bible

1 PITOR 5

¹Ava leiji kver mdo kurthut ṭhi ungta Khrista jat kham sakhi kuhur kandang rangki laarnee ruk mtum ka am kphaak ṭhi naan arlakki ka am kver rek ava neiji kuk kso chaak lamma.

²Ktlo nuwm kma lu kma pdainu ktlo nuwm rek rekki, ningkja na ngi mman lei kma, pdainu ning kakraalli plung klutti, naan arlakki Isowr Jao lop ava mhai seel pi chaan.

³Naan ado tsil na tun kpaal na kma pdainu Jao rek lop tummi mkurchu chaak naan kurthuwk in.

⁴Ungta Jao krung mkinreel ava mkandan mpha thu, naanni laarnee ki kchuwl kro kma laar luwkhum pha chnaan di.

⁵Anto lulu ngi kmo bet va kvir bet tingi ma amra. Naan akheng nga khat leh khat plung kparneem tu kilṭhi ngi adaksaan na kparnaak in, mleija Isowr va kpohokka mdo mat pdainu plung kdowng hin plung kparneem mdo piik.

⁶Ava leiji, mpha kcha deekki Isowr ri ado tikhiin chaak nraan, ruktang langlang Isowr khut ava tingi adaksaan na plung kdowng ngi am in.

⁷Naanki ajat naan mkheng nga Mma hin avar deen chaan, mleija Mma ngi naanna tuk ado tu sut pik in.

⁸Plung apnet chaan, mik khut ahar in. Naan akipteng in dijabowlli, humpii smang kruwn lulu ku mii khat mdo chaak nra thlaamda pang tlowng ngi ktlowng nga.

⁹Krin cha thu knet merri mma ava amat in, tditta anto hep daat kja kakham kparteel ava dultipaam thu ka am a u anao in hin rukva kthuwk dok tdit ado dee in.

¹⁰Ungta kṭuw knai kma laarnee ki tummi, Khrista thu mdo own dok naan ava, plungnee mkheng ki Isowr Mma daksaa katti, kja kakham mruk aphaak dil thaanni tipnet don akapṭhan pik craan, ungu ru aju kaptan pik raan.

¹¹Kṭuw knai liit kma Mma ngi kpaal kurthuwk so. Amen.

¹²Trin chaak kurhuiji kdo bin chaak, neiki ku u knao Silvanas leiji neiji ktoi tekki kikjit chaakka, aksop chaan, ungu hava Isowr plungnee kindit pi dinu neiji kthe thut chaakka, ava thu knetti am chaan.

¹³Bebylon tha ka am, anto heppi mdo kchol, mma rukva aturvui chaak inna; ungu anto lulu ngi kchapa Mak ruk va aturvui chaak inna.

¹⁴Wonsat tu kilṭhi ngi khat leh khat kurput inra kurvui chaan. Khrista thu ka am naan akheng hin kdaai amso.