Read Lamkang 2 PITOR 1 Bible Online

2 PITOR 1 - Lamkang bible

2 PITOR 1

¹Jisu Khrista ki sra owr khat ungu kenyee khat kurthuwk Simon Pitor ri nenki Isowr ungta kaktlan pik Jisu Khrista ki rinkindit rek nen tu kinṭim sappi krin cha kpha rek hintha:

²Isowr leh nenki Mukpu kdei chaki lousing thu plungnee leh kdaai ava naan thung ngi knemmi kurjou kurthuwk so.

³Nen mi ku own kchaan Mma kdei chaki lousing thu Mma mdak kat ki laarnee leh kinreel ki rinkhu ungu Isowr ktongki do mkheng nga Isowr rutanni mi rot pik inda.

⁴Ava thu Mma ngi mman klu langlang ki leh klin langlang paureel nen nhin inni mihai pii chaanda, tditta kngei leiji dultipaam thungki ktobor knaam thungki ado tiṭen thuw chaak nraan, ungta Isowr ktongki rungchen kpha sap akurthut nraanki.

⁵Mleija hava lei katti naanva ado rin chaak in kṭha ava tu kilṭhi da, ungu kṭha kdei chaki lousing tu kilṭhi da,

⁶ungta kdei cha lousing nga daksaa kurjowng tu kilṭhi da, daksaa kurjowng ava kdiil dei tu kilṭhi da, kdiil dei ava Isowr ktongki tu kilṭhi da,

⁷ungu Isowr ktongki ava unao ki karman tu kilṭhida, ungta unao ki karman ava wonsat tu kilṭhida, hanto ktopom kurthuwk.

⁸Mleija havalea naan ado ungu mnembi, nenki Mukpu Jisu Khrista kdei cha ki lousing thu kurchuwl kma mdit mata mthei ktaak kurthuwk ni maan ti.

⁹Mleija havale kthloi kma ku mii khat ava, mma ki pnu pliw ava mdo partleu pik dok kparngiil mii ava mik ktot ungta mbe ki tek daat mdo dee.

¹⁰Ava leiji, ku u knao rek, ado tu own chaak in naan leh ado tuk kchol chaak naan ava knetti ado thiik nraan changtlaak athloi in, mleija naanni hava atlot inbi, tluw liit nimaan ti.

¹¹Ava leiji nenki Mukpu ungu kaktlan pik Jisu Khrista ki kṭuw knai kma Kruwngpaam alu chaak nraanki kekleemmi akpurdon pik chraan.

¹²Ava leiji hava ado bin phaak nraan, naanni dei dokda, ungu naan dothloi kindit thu kapṭhang dok kurthuwk daat jownti, mpha ktai thu neiji ak pbin phaak chaak inna.

¹³Hava daksaa ngi ka am khim khai thu, naan dobin phaak nangi, ado kukso in ava mkindit kurthuwk mo kdingi neiva kbin chaakka.

¹⁴Mleija nenki Mukpu Jisu Khrista do tdet dil kṭoiji, neiji kdaksaa kdo maak pthii nrangki mpha ava knai tekka tdit neiji kdee chaakka.

¹⁵Ungta neiji ksun chaak dok diltha mpha ktai thu naanni hava ado bin phaak chaak nraan neiji suw chdaat nik di.

¹⁶Mleija neenni nenki Mukpu Jisu Khrista ki rutan leh kurjung rangki ava aktidet in mpha thu nopa ki paumin ava ksing rek rekki pṭoi chmaan ring, pdainu Mma kullaar ava neen kmik kat inni sakhi in ping.

¹⁷Mleija Mma ngi Mpah Isowr hinki kak kjat leh laarnee marlaan chaak mpha thu, laarnee ki kullaar ri Mhin krowl khatti theda, “Hava Nei kwonsat lo Kchapa, Mma hin kdung ngi kning kthlung nga.”

¹⁸Parwaan ki krowl kurju ava neenni aryaa chaannu, mleija Mma tu kilṭhi ngi Kchiir lown tuwn ka am sap in ping.

¹⁹Ungta nenni tu thloi in khulpu rek pauna ava ngi kheel setti mihai pindit pik inda. Khuw mtlei du khim khai ungta plung thu vaarpa bursi marhan thuw du khim khai mmun kjiing thung ngi meila mlen lulu ngi, plung aplu chaak inbi, kṭha deekki tlo naandi.

²⁰Ru kri verri hava ado dee pandit raan, tditta Kchiir Laaika ki pau kphuwng ku mii khat lee ngi mthina daat ki pau kpurluppa ava pme.

²¹Mleija pau kphuwng nga tden thung preva miilai do binni kthleng ava pme, pdainu Pthla Kchiir do thown mii rekki Isowr hinki pau mdo the.