Read Lamkang 2 PITOR 2 Bible Online

2 PITOR 2 - Lamkang bible

2 PITOR 2

¹Naan arlakki kindit kma chukpu rek kthuwk heppi, mii rek arlakki kindit kma khulpu rek kthuwk lamra, ke eakrep rang leiji kindit kma tup prut pau ksin lamra, mma kṭenthuw Isowr kat daat rap klua mat lamda, mmaan mdaksaan tuwnni kbei sekki mmawn chaak nraan pthuwk lamda.

²Ungta mii maknemmi kṭha kma ktlo ava dil kṭoi chlamra, ungu mmaan leiji kindit lam ava krai chlamra.

³Ungta makraam reen lei inni kindit kma pauvi pang the akthe psuk raan; mmaan nikar mak nong mdo tlot inna alraangki howngva liit lamme, ungu mmawn chaak nraan ava iip liitme.

⁴Mleija Waan tamsii rekki pnu mtlaak in mpha thungva Isowr ri ṭheek liit lamme, pdainu sim thu mvar pthiin, ungu mdo kṭewl nlam rangki nit mphaak du khim khai kjiingnu khur thu ktuh da mdo thiik pthii lam.

⁵Mma ngi alraangki dultipaam ava kṭheek kma pdainu Isowr kbin kma rek dultipaam ava tun diipa mdo pinlet, rinkindit ki pau ksaam Noha ava mii murson tikheu rek tu kilṭhi ngi mdo ṭheek.

⁶Sodom leh Gomorah hava khuwpii knii ava purvut kjuwng daatti mraal piida, ungta Isowr kbin kma rek ki mkurchu chaak naan.

⁷Ungta kṭha kma ava ngi kṭha kma nong tuptlot lamda kdung ngi mkinthlet naan kurthuwk, rinkindit Lot ava Mma ngi mdo ṭenthuw pik.

⁸Mleija rinkindit miilai ava ngi mmaan arlakki ma am thu mdo dee ungu mdo aryaak, mmaan ki nowlam ktaakki nong mdo tlot in ava mnii ktaiji rinkindit ki raothla mdo owr chaak.

⁹Audilli mdo kṭewl nrangki nit ava mphaak du khim khai Isowr kbin cha rek mii ava ṭenthuw da, ungu rinkindit kma rek ava mraal kpii tingi arkhii da mdo thiik ava Mukpu ngi mdo dee.

¹⁰Ungta kheelli kanthle ktardou ki nong kbinni kbuwr ungu rutan pum ning kpu ui kma mii ava Mma ngi mdo dee. Mmaan ava plung ktaak, ungu kpohok, mmaanni mlaar knei langlang khat ava kṭi kma mdo rai chaak in.

¹¹Waan tamsii rap klua kheel sii ngi ktang ungu mru tang daat joso Mukpu maiṭhuwm mi kṭewlda ungu krai kcha tlo me.

¹²Pdainu hava lea mdoi pummi mdo seem saa rek heppi, mdo pman ra ungu mdo eayo rang ngi kṭou, mlei kdei pandi kma krai mmaan ava mmaan tu kilṭhi ngi kinṭim chakki mmawn chaak nraan, ke eakrep lamra.

¹³Kar mak nong mdo tlot lei inni kar makki kja chlamra. Kanthle ktardou rekki suwn kanpat loi lamda, mmaanna achaak aneek ṭhiin mpha thu mnopa inni kanthle tardou lamda kbii pum ungu kar mak kcha lam.

¹⁴Mmik inna losang kṭhi ngi kdim kcha a, pnu tummi pneel liit lamme. Mmaanni knet kma raothla ava pman lamda. Muplung ril inna kakraam kurchu ndok lamda. Mmaanna pauhur ki naole lam.

¹⁵Mmaanni kar mak nong ktlo thu mdo kat nraan ngei lamda, Boer chapa Balam lamṭoi ṭoi lamda, kindit pthlei lamda leledung ngi kchet chlamma.

¹⁶Pdainu dultimii pauvi arkowk da; ki ewng kcha skowlraam mi dultimii krowl khatti khulpu ava pkhaan da.

¹⁷Hava lea dii ktaak diitlaang ungu tirthli khuw dorei pthii armei rek lam; mleija mmaan tumra kjiingnu khur ava mdo ṭheek daat.

¹⁸Mleija mmaanni ka aak napal pau the lamda, kindit kma thungki raanṭhul li karthlet kcha mii rek ava daksaa ktongki kar mak ktlo thu archil lamda.

¹⁹Mmaanni kintekki ma am nraan pau preel lamda, pdainu mmaan mdaksaan na ktobor naam ki sowk rek lam; mleija miilai khat do pchaan ku mii khatta ava ki suwk.

²⁰Mleija mmaanni nenki Mukpu ungu mi kaktlan pik in Jisu Khrista kdei cha thu dultipaam ki kbuwr nong thungki mkarthle chaak dok in dil tha, mmaanna kbuwr nong thu kman nowl lamda, ungu kpar chaan chaak lamda, mṭut na thangva ru kri ki hinva kheel sii.

²¹Mleija mmaan hinni mdo parlaan Kchiir paureen kdei kdeiji mdil thaanni mdo kinlet daak in hinva, rinkindit lam ava mdo dee liit maanni kṭha sii.

²²Kindit pauril dil kṭoiji mmaan hin thuwk kat da, uiji mkunso chaa nowlda ungta tulṭhut dok vaksuwn ni bul thu kukbul nowl.