Read Lamkang 1 JOHON 2 Bible Online

1 JOHON 2 - Lamkang bible

1 JOHON 2

¹Nei knaole sisi rek, naanni pnu atlaak ma nraan, neiji naan hinni hava kikjit chaakka; pdainu ku mii khatti pnu mtlaak bi, nenki Npah ava tu kilṭhi ngi nenna mi ksan chraan, rinkindit ki Jisu Khrista ka am.

²Ungta nenki pnu rek tummi Mma ngi nakchang in midon pik inda, nen ntum daat kma pdainu dultipaam ki pnu rek mkheng tum kurthuwk.

³Nenni Mma paureen rek nar khiik chaak inbi, hava ngi nenna anto kat tdit ndee chaak raan.

⁴“Mma ava neiji kdee,” dida kthe pdainu mpaureen rek kleek miilai ava plei knei, ungta kindit ava mma thu ame.

⁵Pdainu Mma pauna kar khii cha mii ava hin tha mkindit kat ki Isowr wonsat kinreel ka am. Hava ngi nenni Mma thu ka am ping tdit tdee kat chaak raan.

⁶Mma hintha kakbaang thlit daat ping dida kthe mii ava va Mma che heppi mma rukva mche ra.

⁷Kwonsat lorek, neiji naan hin ren paureen khat kikjit ava pmaang, pdainu mupṭhun daat ki naan dothloi pliw paureen ava; naan do aryaak dok pauna pliw ki paureen.

⁸Anto daat joso neiji naan hinni ren paureen khat kikjit chaakka, ava Mma leh naan thung ngi kindit kurthuwk, mleija kjiingnu ava kvei dokka ungta kindit mar awng ava kleng nga.

⁹Mii ava ngi mar awng thungki ping dida karthe thida mu u mnao mipder chaakbi, mma ava kjiingnu thu ka am thlit daatta.

¹⁰Mu u mnao wonsat klo mii ava mar awng thu kakbaang thlit daat, ungta ava thu khusiir mdo parthit nra ame.

¹¹Pdainu mu u mnao kipder cha mii ava kjiing thungki ungu kjiingnu thu kchet, ungu mma ngi tva tha kchet imping tdit kardei me, mleija kjiingnu ngi mmik mupto pthiia.

¹²Kmo sisi rek, neiji naan hin kikjit chaakka, mleija Mma tummi naanki pnu rek ava atuptlot pik dok inna.

¹³Kpahle naan hinni neiji kikjit chaakka, mleija mupṭhun daat ki Mma ava naanni ado dee dok in. Ksenao rek, neiji naan hin kikjit chaakka, mleija naanni kṭha kma khat ava ado pchaan dok in. Kmo rek, neiji naan hin kikjit chaakka, mleija naanni Apah in ava ado dee dok in.

¹⁴Kpahle, neiji naan hin kikjit chaakka, mleija mupṭhun daat ki Mma ava ado dee chaak dok in. Ksenao rek, neiji naan hin kikjit chaakka, mleija naanna aru in ktang ungu Isowr pauna naan thu kbaang thlit da ka am, ungta kṭha kma khat naanni ado pchaan dok in.

¹⁵Naanni dultipaam mdit mata dultipaam thungki do ava wonsat lo maan. Ku mii khatti dultipaam wonsat mlobi, Mpah wonsat klo ava mma thu ame.

¹⁶Mleija dultipaam thu ka am do mkheng, daksaa do ngei, ungu rinkhu napal, ava Mpah hinki pme pdainu dultipaam thungki.

¹⁷Ungta dultipaam ma kvei kcha lu, ungu mthungki tngei do ava ruk kvei kcha lu; pdainu Isowr plungbin ktlo mii ava kṭuw knai liit kma kakbaang thlit daat.

¹⁸Kmo rek, mṭut na ṭhang kurthuwkka! Ungta khrista kma kthleng naanni ado aryaak in lulu ngi, tun rukva khrista kma knempok kthleng nga; ava ngi mlei kurthuwk da, mṭut na ṭhang tdit nenni ndee in.

¹⁹Mmaan ava nen nthungki ksun kcha lam, pdainu mmaanna nen nthungki lam pme, mleija mmaanni nen nthungki mkurthut inbi, nen tu kilṭhi ngi ta am slii daat raan, pdainu mmaan mkheng nga nen nthungki pme tdit mkandan nra ksun kcha lamma.

²⁰Pdainu naanna Kchiir khat ava ngi thao ado tupbul dok in ava naan akheng inni ado dee dok in.

²¹Naanni kindit ado dee maan leiji neiva kikjit cha ava pmaang, pdainu naan do dee dok, ungu plei kneija kindit mlei pme tdit ado dee dok in.

²²Jisua Khrista tdit kmat miilai ava kma donle plei knei ku ka am da? Mpah leh Mchapa kma khrista kma ava hava.

²³Mchapa kmat ku mii khat lee ngi Mpah thloi me, Mchapa kthethuw mii ava ngi Mpah ruk mdo the thut chaak.

²⁴Naan thung ngi mupṭhun daat ki ado aryaak in ava kbaang thlit daat so. Mupṭhun daat ki ado aryaak in ava ngi makbaan thlit daat bi, audilli naanni Mchapa leh Mpah thu kakbaang thlit naan di.

²⁵Mma paureel pik dok kṭuw knai kma ki rinkhu ava hava.

²⁶Naan aku huwng kchraan mii rek mlei thu neiji akikjit pik inna,

²⁷pdainu naanni Mma hinki ado arlaan chaak in thao kpubul ava naan thung ngi kakbaang thlit daat, ungta naanna ktlok mii khatti ado tpurchu nraanki arleek set do ame; Mma thao pbul li do khim khai thu aju purchuk inda, ungu ava kindit, ungta naan hin ado tpurchu in ava heppi, plei knei kma, Mma thung ngi kbaang thlit chaan.

²⁸Ungta tunva, kmo sisi rek, Mma mkandan mpha thu plung krippi nenni hurda, Mma murjun mpha thu ning kakjak ki ndil thaanni tkursown ma nraan, Mma thu kbaang thlit chaan che.

²⁹Mma ava rinkindit tdit naanni ado dee in, kindit ktlo mii pum ktai ava Mma ngi mdo pṭou pik tdit ado dee kat chaak in.