Read Lamkang 1 JOHON 3 Bible Online

1 JOHON 3 - Lamkang bible

1 JOHON 3

¹Asuw in, Isowr naole kdingi mido tu own nraan, Npah inva tak hep kdu pang thu wonsat mi tpiik chaak daat inna; ungta naanna anto kat in pti. Dulti- paam mi nen mido tdee ma naanki mlei ava dultipaam ava ngi Mma dei chme.

²Kwonsat lorek, tunva nenna Isowr naole in pmin; nenna talu tdut raan tdit kandang mlai, pdainu Mma ngi mkandan mpha thu nenna Mma rungcheng tdut jik raan tdit nenni ndee in, mleija nenni Mma ava mhep mheppi tdee chaak raan.

³Ungta Mma kbin kcha mii pum ktaiji Mma Chiir heppi Tchiir chaak raan.

⁴Pnu ktla mii pum ktaiji Nowlam mdo leek daak; pnu va Nowlam mdo leek.

⁵Pnu rek klou pthii ra Mma ava kandang tdit naanni ado dee in, ungu Mma thungva pnu ame.

⁶Mma thung ngi kakbaang thlit daat ku mii khat lee ngi pnu arvei me, pnu kirvei ku khat lee ngi Mma ava dei chme mdit mata kdei tdee ruk dei chme.

⁷Kmo sisi rek, ku mii khat lee ngi ahuwn chaak maan so. Kindit ktlo mii ava Mma ngi rinkindit mkurthut lulu ngi rinkindit kurthuwk ra.

⁸Pnu ktla mii ava dijabowl hinki; mleija mupṭhun daat ki dijabowl ava pnu thu ktla. Dijabowl nong rek ke eakrep rang leiji Isowr Chapa kandang.

⁹Isowr hinki kṭou ku khat lee ngi pnu arveime; mleija Isowr nopa ava mma thung ngi kakbaang thlit daat. Ungta Isowr hinki kṭou mkurthut leiji mma ngi pnu tla pchaang me.

¹⁰Isowr naole, ungu dijabowl naole ava hava ngi tdee ra: kindit ktlo kma mii, mdit mata mu u mnao wonsat klo kma mii ava Isowr hinki pme.

¹¹Mleija mupṭhun daat ki naan do aryaak pauminna hava, tditta nenni khat leh khat wonsat tkurlo raan.

¹²Ungta mnaopa ke eayou kṭha kma khat Kein hep daat rang pme. Ungu talu leiji mma va mnaopa mdo eayo da? Mleija mma mdak kat nong tlot ava kṭha pme ungta mnaopa ava rinkindit miilai.

¹³Ku u knao rek, dultipaam miingi ado tipder chaak lei inni ngak maan.

¹⁴Nenni kdiyou thungki ra rinkhu kpha thu taklaan chaak dok in, mleija nenni nu u nnao in wonsat talo in. Wonsat ktaak mii ava kdiyou thung ngi kakbaang thlit daat.

¹⁵Mu u mnao kipder kcha ku mii khat ava mi ke eayou, ungu mike eayou ku mii khat lee hinni kṭuw knai kma ki rinkhu kbaang liit me, tdit naanni ado dee in.

¹⁶Nenni hava wonsat ava tdee chaak in, tditta Mma ngi nen ntummi mrinkhu mi pii chaan da; ungu nenni nu u nnao rek tummi nrinkhu in tpiik chaak kat raan.

¹⁷Pdainu dultipaam ki alrou kthloi ungu mu u mnao do kriin dei daat joso muplung ril thung ngi mraal kpii ngi do khat lee purdon pik da mtlot mabi, tak heppi Isowr wonsat ava mma thu kakbaang rang da?

¹⁸Kmo sisi rek, nenni pauna mdit mata pau daatti wonsat klo kurthuwk maan che, pdainu mnong ungta kindit thu wonsat kurlo in che.

¹⁹Hava ngi nenni kindit tdit tdee raan, ungta plung ril ava ngi nen nraal mi tpiik inna.

²⁰Ungu nen nuplung ril ava Mma maiṭhuwmmi knetti ta am raan; mleija Isowr ra nen nuplung ril hinva klin kurthuwk, ungta Mma ngi do khim khai mdo dee dok.

²¹Kwonsat lo rek, nen nuplung ril in ava ngi nraal in mi kpii mkurthut bi, Isowr maiṭhuwm mi plung krip kthloi kurthuwk maan min.

²²Ungta Mma hinki nenni tiṭhil chaak in khim khai ja tarlaan chaak in, mleija nenni Mma paureen arkhi in min ungu Mma ning thlunna ktlo pmin.

²³Ungta hava ava Mma paureen rek, tditta nenni Mma Chapa Jisu Khrista ava lamrin chda, Mma paureen pik ava heppi nenni khat leh khat wonsat tkurlo raan.

²⁴Mma paureen karkhi mii mkheng nga Mma hin kakbaang thlit daat, ungu Mma ava mmaan thung ngi ka am, ungta Mma do piik chaak Pthla ava ngi, Mma ava nen nthung ngi kakbaang thlit daat tdit nenni ndee in.