Read Lamkang 1 JOHON 4 Bible Online

1 JOHON 4 - Lamkang bible

1 JOHON 4

¹Kwonsat lorek, Pthla khim khaija lamrin chmaan, pdainu Isowr hinki mo kdingi apirsin naan; mleija dultipaam thu kindit kma khulpu rek knempok ktlowng lamma.

²Hava ngi naanni Isowr Pthla ava ado dee in: daksaa thu Jisu Khrista ava kurjung dida kthe thuw kcha Pthla khim khai ava Isowr hinki.

³Ungta Jisu kthe thuw kma pthla khim khaija Isowr hinki pme. khrista kma pthla ava hava kurthuwk, mma ava kthleng nga tdit naanni ado aryaak dok in, ungu tunva dultipaam thu ka am dokka.

⁴Kmo sisi rek, naanna Isowr hinki in pti, ungu naanni mmaan ava ado pchaan dok in; mleija naan thung ngi ka am Mma ava dultipaam thu ka am ava hinva klin sii.

⁵Mmaanna dultipaam ki rek lam, ava ngi mlei kurthuwk da, mmaan do the ava dultipaam ki ungu dultimii ngi mdo aryaak pik lam.

⁶Nenna Isowr hinki in pmin. Isowr kdei kcha mii khim khaiji mido taryaak pik in, ungu Isowr hinki kma mii ava ngi nenna mido taryaak pik in pme. Hava ngi nenni kindit Pthla leh kindit kma pthla ava kdei cha tkurthut in.

⁷Kwonsat lorek, nenni khat leh khat wonsat kurlo in che; mleija wonsatta Isowr hinki, ungta won kapsat ava Isowr hinki kṭou ungta Isowr mdo dee.

⁸Wonsat ktaak miiva Isowr deime; mleija Isowr ra wonsat knei.

⁹Hava thu Isowr wonsat ava nen narlak ki mdo pandan, tditta Mma thung ngi nenni ta am chaak nraan, Isowr ri Mchapa Khdaat chrel ava dultipaam thu misii pik inda.

¹⁰Wonsatta hava, tditta nenni Isowr wonsat talo in ava pme, pdainu Mma ngi nenna wonsat milo inda ungu nenki pnu chang kdonni Mchapa misii pik inda.

¹¹Kwonsat lorek, Isowr va hanto ja thu wonsat mi klo kchaan mkurthutbi, nen rukva khat leh khat wonsat tkurlo chaak kat raan.

¹²Ku mii khat lee ngi Isowr kdei ame; nenni khat leh khat wonsat tkurlo inbi, Isowr ri nen nthung ngi kakbaang thlit daat ra ungta Mma wonsat ava nen nthung ngi kinreel ka am ra.

¹³Hava ngi nenni Mma thu ungu Mma ngi nen nthung ngi kakbaang thlit daat tdit nenni ndee in, mleija Mma ngi Mma mdak kat ki Pthla mi pii chaan da.

¹⁴Ungta Mpah ngi Mchapa ava dultipaam kaktlan pik ra misii pik inda tdit nenni dei in minnu ava rinpaumin kuhur pik tkurthut in.

¹⁵Jisua Isowr Chapa dida ku mii khatti mthe thut chaakbi, mma thung ngi Isowr kakbaang thlit daat kurthuwk, ungu mma ava Isowr thung ngi kakbaang thlit daat.

¹⁶Ava leiji nen ntummi Isowr wonsat milo inda nenni dei in min ungta trin chaak in. Isowr ra wonsat knei, ungu wonsat thu kakbaang thlit daat mii ava Isowr hin kakbaang thlit daak, ungta mma thung ngi Isowr kakbaang thlit daat.

¹⁷Hava thu wonsat ava nen tu kilṭhi ngi kinreel kurthuwk, tditta kekṭewl nit tummi nenni plung krippi ta am nraan, mleija Mma ngi anto mkurthut lulu ngi nen rukka hava dultipaam thung ngi tkurthut in.

¹⁸Wonsat thungva kṭi ame, pdainu kinreel wonsat ava ngi kṭi ava krei pthii kurthuwk. Mleija kṭia mraal tu kilṭhi, ungta kṭi miia wonsat thu kinreel pme.

¹⁹Nenni won tapsat in, mleija ru kri ver thu Mma ngi nen wonsat milo chaan da.

²⁰Ku mii khatti, “Neiji Isowr wonsat klo,” dida the thisora, mu u mnao mapder chaak bi, mma ava plei knei; mleija mma ngi mdo dee daat mu u mnao wonsat klo mkurthut mabi, mma ngi mdo dee ma Isowr ava wonsat lo pchaang nime.

²¹Ungta Isowr wonsat klo miiva mu u mnao ruk wonsat mdo lora dida mdo the hava paureen ava Mma hinki tphaak chaak in.