Read Lamkang 1 JOHON 5 Bible Online

1 JOHON 5 - Lamkang bible

1 JOHON 5

¹Jisua Khrista dida krin kcha miipum ktai ava Isowr nao khat, ungta mnuh mpah wonsat klo mii pum ktaiji mnao ruk wonsat mdolo.

²Hava ngi nenni Isowr wonsat lo da ungu mpau- reen rek nupṭoi in mpha thu nenni Isowr wonsat talo in tdit ndee in.

³Mleija nenni Mma paureen rek arkhii chaan minnu, hava Isowr wonsat. Ungu Mma paureen rekka krik ava pme.

⁴Mleija Isowr hinki kṭou cha khim khaiji, dultipaam ava mdo pchaan chaak; ungu hava kap- chang tdit nen lamrin chaak ava ngi dultipaam ma mapchaanna.

⁵Jisua Isowr Chapa dida krin kcha ava kma donle, dultipaam kapchaang ku ka am da?

⁶Dii leh hii ngi kthleng Mma ava hava, Jisu Khrista ava dii daat kma pdainu dii leh hii tu kilṭhi.

⁷Ungta sakhi kuhur ava Pthla kurthuwk, mleija Pthla ava kindit.

⁸Sakhi kuhur rek kdum ka am lam, Pthla, dii ungu hii ungta havale kdum ava kulrot nlam.

⁹Nenni dulti miirek rinpaumin narlaan inbi, Isowr rinpauminna klin langlang kurthuwk, mleija hava Isowr rinpaumin tditta Mma ngi Mchapa sakhi mdo hur pik.

¹⁰Isowr Chapa krin kcha miia mdaksaa thung ngi rinpaumin mthloija. Isowr krin cha kma mii ava ngi Mma ava plei mnei psukka, mleija Isowr ri Mchapa mdo pluk ava rinpaumin mma ngi lamrin chme.

¹¹Ungta rinpaumin ava hava, tditta Isowr ri kṭuw knai kma rinkhu mi pii chaanda, ungu hava rinkhua Mma Chapa thu ka am.

¹²Mchapa kthloi mii ava ngi rinkhu kthloi cha kurthuwk; Isowr Chapa kthloi kma miiva rinkhu thloi chme.

¹³Isowr Chapa krin cha naan hin kṭuw knai kma ki rinkhu athloi inna tdit naan do dee nra, neiji naan hin hava kikjit kcha ping.

¹⁴Ungta Mma thung ngi kdung plung tip pri psuk chaak inna hava, mleija nenni do khim khai Mma plungbin dil kṭoiji nṭhil chaak inbi mi karyaak pik chraan.

¹⁵Ungta nenni tiṭhil chaak in khim khai mi taryaak pik inna tdit nenni ndee inbi, nenni Mma hin taktham chaak inna tphaak inna tdit ndee in.

¹⁶Ku mii khatti kdiyou rang ki kma mu u mnao pnu ktla mdee ta, mma ngi aṭhil pik so, ungu kdiyou rangki kma pnu ktla tummi Isowr ri rinkhu kpii chra. Kdiyou rangki pnu ka am; ava tummi miilai khat va mdo ṭhil chaak ra dinu neiva the maang.

¹⁷Kar mak nong ktlo mkheng nga pnu, pdainu kdiyou rang kma pnu ka am.

¹⁸Isowr hinki kṭou kcha ku mii khat lee ngi pnu arvei me tdit nenni ndee in, pdainu Isowr hinki kṭou Mma va mdo arkhiik, ungu kṭha kma khat ava ngi thowng pchaang me.

¹⁹Nenna Isowr ki in pmin, ungu dultipaam mkheng nga kṭha kma khat ava thu ta am in tdit ndee in.

²⁰Ungta Isowr Chapa ava kthleng nga, ungu nen nhin kdeipandi cha mi pii inda, kindit ava ku tdit tdee nra; ungta Mma Chapa Jisu Khrista, kindit Mma thung ngi nenna ta am in tdit nenni ndee in. Kindit Isowr ungu kṭuw knai kma rinkhu ava hava.

²¹Kmo sisi rek, naan adaksaan na khut do sak pthla luwkbuk thungki karneeng chaan.