Read Lamkang PAUPHUWN 1 Bible Online

PAUPHUWN 1 - Lamkang bible

PAUPHUWN 1

¹Kbeiji kthuwk kat ra, Jisu Khrista ki pauphuwn, msra owr rek hinni mdo tdet rangki Isowr ri mhin mdo piik; ungta Mma sra owr Johon hinni Mma ki Waan tamsii arju siida tipdee chda,

²mma ngi Isowr pauna ungu Jisu Khrista rinpaumin, mma do dee chaak mkheng ava sakhi pii chda.

³Mdo pandan pauna rek ava owngda kpa kcha mii rek ka msuwkṭha! Ungta ava karyaa kcha rek, ungu ava thu mdo kjit karkhii kcha rek mii ava msuwkṭha; mleija mpha ava knai tekka.

⁴Johon ni Asia thungki Rinlop rek tikheu hin tha: Ka am slii, ka am dok, ungta karvang rang Mma hinki, ungu Mma ku onna Pthla rek tikheu hinki,

⁵ungta trin chaak kurhui ki sakhi kdiyou dok thungki ru kri reeppi kṭou, ungu dultipaam ki kruwng rek, paam kpu ngi kpaal Jisu Khrista ki plungnee leh kdaai naan thung ngi am so. Nen wonsat mi klo kchaan ungu Mma hii ngi nen pnu rek thungki mi kpantek chaan

⁶ungta nenna Mma ki Kruwngpaam, Mpah Isowr thiimpu rek ra mdo purthuw, Mma hintha laarknei langlang ungu kṭuw knai liit kma paam kpu ngi paal so. Amen.

⁷Asuw in, Mma ava armei tu kilṭhi ngi kurjung nga, Mma kcheiji kthun mik khim khaiji kdei ra; ungta dultipaam ki chati rek mkheng ngi Mma mlei thu kurnung karbaang donle ka am lamra. Anto kat ra. Amen.

⁸Ka am bing, ungu ka am dok, ungta kurjungra ruktang riim Mukpu Isowr ri theda, “Neia Alpha ungu Omega ping.”

⁹Naan ki a u anao in, Jisu Khrista suwkthuw kphaak ṭhi ungta Kruwngpaam kdung ngi akdiil ṭhiin Johon neia Isowr ki pauna ungu Jisu Khrista ki rinpaumin mlei thu Patmos mdo dit prahpaam tun ni ka am ping.

¹⁰Mukpu nit thu neia Pthla ngi am chnu, ungta kdil pang ktong tha peengkhul krowl khat hep daat krowl khat kparyaa langlang neiji aryaa chnu.

¹¹Ava ngi theda, “Nang ngi ado dee ava Laaika thu akjit, ungu Rinlop rek tikheu hin, Ephisia ungta Smyrnia ungu Pargamum ungta Thyatira, Sardis ungu Philadelphia ungta Laodesia tha apthla.”

¹²Ava dilli nei kihin kpau bing ava ksuw ra kdil kinle nu, ungu kdil kikinlet thungta jeering meila tikheu krip daat neiji deinu.

¹³Ungta meila rek arlakki Mii Chapa hep daat phrik kturrown knaa ungu muplung jeering riingi kparyeel neiji deinu.

¹⁴Mluw leh msam ava plaa kpowl lulu ngi, tbuwr heppi powlda, mmik ava meiṭai kṭuwng heppi ṭuwngda;

¹⁵mkhu ava mei thu tukno dang thiir ksen uwm hep daat, ungta mukrowl ava dii knempok kluwng ava archaang hep daat da.

¹⁶Mkhut chang ktongtha bursi tikheu sinda, mner thu kaang ksaang kraang mhaa knii ngi pdonda, ungu mmai ava kniw kapchaiji ksa heppi lengda.

¹⁷Neiji Mma ava kdee thungta kdiyou lulu ngi mkhu therri tluw chnu. Pdainu Mma ngi mchang ktong ki mkhut kleen ni thiida, theda, “ṭi ma, Neia mdo pṭhunna ungu mṭut na ava ping.

¹⁸Ungta kring daat auping; Neiji diyou nu, ungu asuw, Neia kṭuw knai liit kma kring ping, ungta kdiyou leh sim ki chungkam ava Neiji ksin daatta.

¹⁹Tunva nang ado dee ungu dil thang ngi kthuwk rangki ava akjit.

²⁰Nei kukhut chang ktong tha nang ngi bursi tikheu ado dee ungta jeering meila tikheu krip ado dee ki kukthuk pau ava bursi rek tikheu va Rinlop rek tikheu ki tamsii rek lam ungu meila krip rek tikheu ava Rinlop rek tikheu rek lam.”