Read Lamkang PAUPHUWN 10 Bible Online

PAUPHUWN 10 - Lamkang bible

PAUPHUWN 10

¹Au dilli Parwaan ki kurjung ṭum ruktang langlang Waantamsii khat neiji deinu, armeiji jiil dok da, mluw leen kowllisa amda, mmaija kniw hep daat, mkhu rek ava mei kcho hep daat da.

²Mma ngi mkhut thu mdo sin daat jiikkjul kdilsuwn ava pvangda. Mchangki mkhu ava truwn leen khiingda, ungu mlee ki mkhu ava laan tha khiingda,

³ungta humpii smang khat kruwn heppi krowl kparyaa ngi owngda, Mma ngi mu own thungta, pṭeek kpuwk tikheu heppi marchaang ava amda.

⁴Ungu pṭeek kpuwk tikheu vi miprit dok thungta, neia kikjit ra kirsim nu, pdainu Parwaan ki krowl khat dothe aryaa nu, “pṭeek kpuwk tikheu dothe ava kbii anam dok, ungu kjit lamma.”

⁵Ungta truwn leen krip daat Waantamsii nei kdo dee ava ngi Parwaan ktong tha mkhut changki khiingda

⁶ungu kṭuw knai liit kma ava thu ka am ava ktham da, Parwaan ungu mthungki ka am ruk kapṭhang, dultile mthungki ka am, truwn leh mthungki ka am kapṭhang Mma ava kto liit nime dida pau ktham da.

⁷Pdainu mtikheu na Waantamsii ngi mdo dum ra peengkhul nit rek thu Mma ngi mdum du tiing ngi Mma ngi msra owr rek khulpu rek hin theda, Isowr ki kukthuk pau ava kurkhum ra.

⁸Au dilli Parwaan ki krowl khat nei kdo aryaakki ki hin the nowlda, “Va,truwn leen thang leh laan tun krip daat Waantamsii khut thung ngi mdo sin daat jiikkjul kparvang daat ava alou,” dida theda.

⁹Ava leiji neiji Waan tamsii hinvanu jiikkjul kdilsuwn ava mdo tpiik nra thenu; ungbi Mma ngi ki hin theda, “Alou ungu achaa dok; nah apoi thungva kakha ra, pdainu aner thungva pkhui ning heppi kthlumra.”

¹⁰Ungbi neiji jiik kjul kdilsuwn ava Waantamsii khut thungki lounu ungu chaa dok nu, kner thungva pkhui ning heppi thlumda, pdainu kchaak dok le kpoi thungva khada.

¹¹Ungta nei kihin theda, “Nang ngi mii knempok ungu chati rek ungta pauna rek ungu kruwng rek mlei thu pau ado phuwn nowlra.”