Read Lamkang PAUPHUWN 11 Bible Online

PAUPHUWN 11 - Lamkang bible

PAUPHUWN 11

¹Au dilli kchung hep daat mdo owl na kchung khat mpii da, ungu ki hin theda, “Erip ungta Isowr luwbuk Inn, suwlbuwr ungu mthungki luwkbuk rek ava a owl.

²Pdainu luwbuk Inn duwnki dulbuk ava owlma; ava ama pthii, mleija ava chati rek hin mdo piik dok, ungta mmaanni Kchiir khuwpii ava thla som plii lei knii thung ngi kther lamra.

³Ungta Neiki sakhi rek knii ava ngi khuiru dona naa lamdon le kum pun khat arjaa knii ungu nii som truk lik thung ngi pau mdo phuwn nraan ki rutan rot pik lam nik di.”

⁴Hava lea dultipaam ki kruwng maiṭhuwmmi krip ding knii leh meila rina knii rek lam.

⁵Ungta ku mii khatti sul mpurnul lambi, mner in thungki mei ptlong donle mmaan kipteng rek ava mdo chaaklu; ku mii khatti sul mpurnul lambi, anto lulu ngi mma va ke eayou ra.

⁶Mmaanni pau mphuwn in nit lik thung ngi khuw mrat ma nra, parwaan mdo arkam nraan ki chungkam mdo thloi in, ungta dii ava hii mdo pur owl nraanki rutan mdo thloi in, ungu mmaanni mbin in khim khai thu tngana rek ava dulti leen mdo prei nraan krutan mdo thloi in.

⁷Ungta mmaanni rinpaumin mupṭut dok inle, ti knung rel khur thungki saa arhan thuwk donle mmaan tun rawl karnaak ṭhi don, ungu pchaang lam don ke eayou lamra.

⁸Ungta mmaan ki kdiyou kluwng ava pau purtol va Sodom leh Egypt mdo ditna, mmaanni ava khros leenni Mukpu mdo pthoi naan, klin langlang khuwpii arlakki ka am.

⁹Mleija mii rek hinki, chati rek, ungu pleiji kpau rek, ungta chati rek ava ngi nii kdum mṭim lik thung ngi mii rekki mmaan ki kdiyou kluwng thlaam lamda ungu thlaan thu mdo alruwl raanna rot pik lamme.

¹⁰Ungta dulti tun ka am rekki kanpa lamra, ungu mkanpat inni chla kparthleng lamra, mleija hava khulpu rek knii ava mmaanni dultipaam thu suwk pthuwk lamda.

¹¹Pdainu nii kdum mṭim ava dil tha Isowr hinki rinkhu tdaal mmaan thung ngi lutda, ungbi mkhu inni rip lamda, ungta mmaan kdei mii rek leen kheel siiki kṭi ava amda.

¹²Au dilli Parwaan ki krowl kparyaa langlang khat mmaan hinni mdo the ava aryaa lamda, “Hava tha arhang kal in!” Ungbi mmaan kipteng rek ava do sut na thung ngi armei arlakki Parwaan tha hangkal lamda.

¹³Ungta ṭhang ava kat thu klin langlang ringnaang khat thuwk da, ungbi khuwpii thungki buw Inn ava tluw chda; ringnaang kthuwkki miilai pun tikheu eayou da, ungu mdo ṭheek rek ava ngi kheel siiki kṭi ngi Parwaan ki Isowr ava panpaak chlam da.

¹⁴Mknit na suwthit na ava kvei dokka; asuw in, mukdumna suwthit na ava kthleng tiingtiing nga.

¹⁵Au dilli mtikheu na Waantamsii ngi peengkhul dumda, Parwaan tha krowl kparyaa khat amda, ava ngi theda, “Dultipaam ki kruwngpaam ava nenki Mukpu leh Mma Khrista ki Kruwngpaam mi kur owl kcha a, ungta Mma ngi kṭuw knai liit kma kpaal ra.”

¹⁶Ungta Isowr maiṭhuwmmi tku onna tunni kuk ong kver rek som knii lei plii ngi, kuwn lamda Isowr luwbuk chlamda,

¹⁷the lamda, “Kapchang riim Mukpu, Isowr kurthuwk slii ungu kurthuwk dok, Nang ava neenni akpanpaak chaak inna, tditta Nang ngi arutan klin langlang lou tinu, kpaal rangki apṭhunna.

¹⁸Chati rekka mplung kthi, pdainu Nah plung thit kthlung nga, ungta kdiyou rek mdo kṭewl nrangki, msra owr khulpu rek ungta, kintiing rek mnah mdo piik nra, ungu Nah amiing kṭi rek kdil leh klin mikniing, ungta dulti ke eakrep rek ava, ke eakrep rangki mpha kveija.”

¹⁹Au dilli Parwaan ki Isowr luwbuk Inn ava kparvang da, ungta Mma paurina ki pluh ava kandang da; ungu kowl plek da, krowl rek, pṭeek kpuwk archaang, ringnaang, kdung ngi ṭil ktla ava thuwk da.