Read Lamkang PAUPHUWN 14 Bible Online

PAUPHUWN 14 - Lamkang bible

PAUPHUWN 14

¹Au dilli neiji deinu, ungta asuw in, Siyon lown leenni Jaonao rip daat da, ungu Mma tu kilṭhi ngi mapchel tun inni Mma leh Mpah miing kthloi punpii khat ungu pun som plii lei plii rek am lamda.

²Ungta Parwaan ki krowl khat dii knempok kluwng archaang hep daat, ungu kdung ngi pṭeek kpuwk archaang hep daat neiji aryaa nu; krowl kdo aryaak ava tingsai kdum krowl hep daat ta.

³Ungta mmaanni laaren ava tkonna maiṭhuwm ungu kring saa rek leh kver rek maiṭhuwmmi the lamda. Laa ava dulti thungki mdo ṭenthuw rek punpii khat pun som plii lei plii kma donle ku khat lee ngi the pchaang me.

⁴Mmaan ava snu tu mdaksaan kbuwr liit kma rek lam, mleija mmaanna Kchiir rek lam, mmaanna Jaonao chena ktai thu mdil kṭoi rek lam, hava lea ru kri thokki thei lulu ngi Isowr leh Jaonao tummi dultimii thungki mdo ren dok lam.

⁵Ungta mmaan ner thu plei knei am liit me, mleija mmaanna kenyee rek lam.

⁶Au dilli dulti tunni ka am chati rek khim khai ungu sumkhur khim khai ungta pau khim khai ungu mii rek khim khai hin ni pau kparyaam rangki Parwaan ṭimmi kjuwng slii Waantamsii ktlok khat neiji deinu.

⁷Ungta krowl kparyaa ngi Mma ngi theda, “Isowr aṭi chaan ungu Mma hinni apanpaak chaan, mleija Mma ngi mdo kṭewl nrangki ṭhang ava kurjung nga; ungta parwaan leh dulti ungu truwn leh diitlaang kphul kseem Mma luw abuk chaan.”

⁸Mdil kṭoi ktlok Waantamsii khatti theda, “Bebylon klin langlang ava ktluw kcha a, ktluw kcha a, mma ngi chati rek mkheng nga kbuwr ki kanthle ktardou ki ju mdo pneek.”

⁹Ungta mmaan dil kṭoi ktlok Waantamsii mukdum nangi, krowl kparyaa khatti theda, “Saa luwkbuk ku mii khatti pthla, mdit mata mapchel leen mata mkhut leenni kbiinam marlaan bi,

¹⁰mma rukva Isowr plungthit ki rik rou dii, muplung thitti tong thu mdo purchuwm ava kneera. Ungu mma ava Kchiir Waantamsii rek leh Jaonao maiṭhuwmmi meila kantuppi suwk kupthuwk ra.

¹¹Ungta mmaan suwkthuw naki meikhut ava ṭuwnai nime; ungu saa ava leh mapthla luwkbuk ungta ava miing ki kbiinam karlaang kma mii khim khaija suwnjaan knai liit kma karnga chlamra.”

¹²Hava thung ngi Isowr paureen karkhii rek leh Jisu krin cha kintiing rek do diil dei ava ka am.

¹³Ungta Parwaan ki krowl khat nei kdo aryaak ava ngi theda, “Hava ava akjit: snii ki kupṭhunni Mukpu hin kdiyou dok rek ava msuw kṭha. Msuw in kṭha kat kat. Tditta mmaan nong tlot dil kṭoiji mnong tlot naan thungki karnga chlamra!”

¹⁴Au dilli asuw in, Armei kpowl dang khat, mluw leenni jeering laar luwkhum kukhum, mkhut thung ngi tangkep kraang jap ksin, Mii Chapa khat hep daatti armei tunni kukong ava neiji deinu.

¹⁵Ungta luwbuk Inn thungki kthuwk ktlok Waantamsii khat, armei leenni kukong Mma ava ngi krowl kparyaa khatti own da, “Atangkep pa mthung ngi jukhiing, ungu kminna, ungta mmin nrangki ṭhang nga kvei dokka, mleija dultipaam ki takhau ra ava kmin dokka.

¹⁶Ava leiji armei leenni ku kong Mma ngi mtangkep ava dulti leen juk khiing da, ungu dultipaam ava khauda.

¹⁷Ungta Parwaan ki luwbuk Inn thungki kthuwk ktlok Waan tamsii rukva tangkep khat kraang jap sin da.

¹⁸Au dilli ktlok Waan tamsii khat, mei tun rutan kthloi Waan tamsii ava suwlbuwr thungki thuwk da, ungu Mma ngi tangkep kraang jap khat ksin Mma ava krowl kparyaa langlang ngi ownda, “Atangkep pa jukhiing, ungu dultipaam ki rik rou ava mbel mbelli akhau purkuk, mleija thei ava kmin dokka.”

¹⁹Ava leiji Waan tamsii ava ngi dultipaam thu mtangkep arju khiing da ungu dultipaam ki rik rou ava khau da, ungta Isowr plung thit ki rik rou dii mdo sowm na thung ngi var pthiida.

²⁰Ungta rik rou dii tsowm na ava khuwpii duwn thang ngi var pthii da, ungu rik rou dii tsowm na thungki hii kluwng ava skowl ner rii kpha dekki kparthaang ngi luwng da, mleija ava meel arjaa kdummi ksaang ungu lamkhat kheelli kukthuk.