Read Lamkang PAUPHUWN 16 Bible Online

PAUPHUWN 16 - Lamkang bible

PAUPHUWN 16

¹Au dilli Waan tamsii rek tikheu hinni pau kthe krowl khat kparyaa ava luwbuk Inn thungki neiji aryaa nu, “Naanni jung inra Isowr plung thit ki tleengbeel tikheu va dultipaam tun aptlong in.”

²Ava leiji ru kri verki Waan tamsii ngi jungda, mtleengbeel ava dulti leen ptlongda, ungbi saa pthla ava luwkbuk kbii kthloi mii rek tun ni tiṭit karvei kpaan ava thuwkda.

³Miknit na Waan tamsii ngi mtleengbeel ava truwn leen ptlong da, ungbi kdiyou miilai khat hii heppi kur owl chda, ungu truwn ava thungki kring do khim khaija diyou chda.

⁴Mukdumna Waan tamsii ngi mtleengbeel ava kreng rek leh diitlaang kphul tun ptlong da, ungbi hii ngi kur owl chda.

⁵Ungta dii ava Waan tamsii ngi mdo the hava neiji aryaanu, “ka am slii ungu ka am dok, O Kchiir Khat, Nah do kṭewl la kindit langlang nga!

⁶Mleija mii rekki kintiing rek leh khulpu rek hii pbu lamda, ungu mmaan do neek ra hii ado piik lam, ava anto kat kat ra!”

⁷Ungta suwlbuwr own neiji aryaa nu, “Oji, kapchaang riim Mukpu Isowr, Nah do kṭewl rekka kindit ungu mkindit kat!”

⁸Miplit na Waan tamsii ngi mtleengbeel ava kniw leen ptlong da, ungbi mei tu kilṭhi ngi mii rek mdo sat nra rot pik da.

⁹Mii rekka mei ksa reenni pkaa lamda, ungbi tngana rutan kthloi hava Isowr miing nga mmaanni pauhur buk chda, ungta mmaanni plung ren hurda Mma kpanpaak tlo lamme.

¹⁰Mparngat na Waan tamsii ngi mtleengbeel ava saa ku onna leen ptlong da, ungbi mkruwng paam ma jiing chda; mii rekki mjat reen lei inni miplei in purtuk lamda.

¹¹Ungta kdung ksaan kpaan leiji Parwaan ki Isowr ava pauhur buk lamda, ungu mnong tlot in thungki mmaanni plung ren hur lamme.

¹²Mtruk na Waan tamsii ngi mtleengbeel ava Euphrats kreng leen ptlong da, ungbi mthungki dii ava kniw thuwna ktongki kruwng rek lam kpurchuwl pikki kang chda.

¹³Ungta ruwlrew ner thungki leh saa ava ner thungki ungu kindit kma khulpu rek ner thungki uiṭok hep daat ktobor pthla rek kdum kthuwk neiji dei nu.

¹⁴Mleija mmaanna tarnam pthla rek kurthuwk, titinna rek ktlo, dultipaam mkheng thungki kruwng rek hin, kapchaang riim ki Isowr nit klin langlang tunni rawl karnaak ṭhira kunpun rang leiji chet lamda.

¹⁵“Aryaa in, kup pru heppi Neiji arjung nik di. Mdakchai daatti kandang lerlorri mche ma nra mik khut harda mdona karkhii kcha mii ava msuw kṭha!”

¹⁶Ungta mmaanni Hebru pauvi Armageddon mdo dit mun ava thu kunpun lamda.

¹⁷Mtikheuna Waan tamsii ngi mtleengbeel ava tarthli leen ptlongda, ungbi luwbuk Inn thungki tku onna thungki krowl kparyaa langlang kthleng ngi theda, “Ava mtlot dokka!”

¹⁸Ungta kowl kiplek, pṭeek kpuwk archaang rek, mkrowl rek, dultipaam thu mii rek ma am daat ki kthuwk liit kma ringnaang klin langlang khat thuwk da, ringnaang ava kdung ngi klin.

¹⁹Khuwpii klin ava kdum kthuwkki jen da, ungu chati rekki khuwpii rek ava tluw chda, ungu Bebylon klin langlang nga Mma plung thit ki ju tong mdo pneek rangki Isowr ri bin phaak da.

²⁰Ungu prahpaam khim khai chen chda, ungta lown khdaat pre ame.

²¹Kegi som parnga lulu ngi krik, klin langlang ṭil parwaan ki ngi mii rek leenni tlada, tngana ṭil ava leiji miirek ki Isowr ava pauhur buk da mrai chaak du in khim khaiji, tngana ava kdung tiṭit kirvei daatta.