Read Lamkang PAUPHUWN 17 Bible Online

PAUPHUWN 17 - Lamkang bible

PAUPHUWN 17

¹Au dilli tleengbeel rek tikheu ksin Waan tamsii rek tikheu thungki khatti, ki hinni arvang da theda, “Arvang, dii knempok leen kuk ong daat snu ko okkma klin langlang mdo kṭewlra neiji aju tdet ni.

²Dultipaam ki kruwng rekki mma tu kilṭhi ngi kturkui chlam da, ungu kturkui kcha ki ju ava dultipaam thu ka am mii rekki nee lamda.

³Ungta Pthla thu neia Mma ngi kbowk laiji mṭhi dok da, ungu mluw tikheu ungu markii sowm ka am, Isowr kjowm kcha ki miing ngi pum dim kdim kcha, saa ksen ava leen ni kuk ong snu khat neiji deinu.

⁴Snu ava kning ngi ksen leh kning ngi ksen reirui dona ngi kirsim da, ungu jeering mman klu langlang ungta pṭhi arlo ngi kirsimda, mkhut thungtha tipder kurhui ungu mturkui chaak naki kbuwr ava ngi kdim jeering tong khat sinda.

⁵Ungta mapchel leen tha kukthuk miing khat kjit da; ‘Klin langlang Bebylon, ko okkma rek leh dultipaam ki ktobor nuh,’ dida kjit da.

⁶Ungu snu ava ngi kintiing rek leh Jisu tummi mdo eayo rek hii mdo neek neiji deinu.

⁷Neiji mma kdee thungta kdung ngi ngak chnu, pdainu Waan tamsii ngi ki hin theda, “Talu leiji kngak ptida? Snu kṭhi, mluw tikheu ka am markii sowm ka am ava ki kukthuk pau neiji aju the pik ni.

⁸Nang ngi ado dee saa ava kthuwk dok, ungu kthuwk pme, ungta mma ava ti knung rel khur thungki arhang kthuwk rangki, ungu mma ava kmawng lamtha kchet; ungta dultipaam mapṭhan daat ki rinkhu ki Laaika thu mmiing mdo kjit ma dulti leen ka am saa rek ava tak heppi kthuwk, ungu kthuwk slii, ungta kthuwk rangki da kdingi kngakki ksuw lamra.

⁹Hava lousing ki poithuw rangki: mluw tikheu ava snu ko onna lown tikheu rek,

¹⁰kruwngrek tikheu ruk ka am, parnga ava ktla chdok, khatta ka am bing daat, ktlok khatta kthuwk rangki, ungu mma ngi mthlen thungva mpha ktoi tekki kpiira.

¹¹Kurthuwk dok leh kurthuwk kma saa ava tret pdainu ava rukka tikheu thungki, ungta kmawng lamtha chet da.

¹²Nang ngi markii sowm ado dee ava kruwng rutan karlaang mlai kruwng rek sowm, pdainu saa ava tu kilṭhi ngi ṭhang khat pangki tummi kruwng hep daatti rutan karlaang rangki.

¹³Havale ngi plung bin khdaatti mdo bin in ungu saa ava hintha mmaan ki rutan ungta mrutan inna mdo piik in.

¹⁴Mmaanni Jaonao tun rawl karnaak ṭhi lamra, ungu Jaonao vi ava ngi kapchaang chlamra, mleija Mma ava Mukpu rekki Mukpu kruwng rekki Kruwng, ungta Mma tu kilṭhi rek ava mdo kchol dok ungu trin chaak kurhui rek mdo dit.”

¹⁵Ungta Mma ngi ki hin theda, “Ko okkma snu ko onna ado dee ava mii rek leh kurtuwl miiluwng ungu chati rek leh pau rek kurthuwk.

¹⁶Ungta nah dodee markii sowm mmaan leh saa ava ngi ko okkma snu ava kipder chlamra, mmaanni msangtlaak ungu mdakchai daatti kpurthuw pthii lamra, ungta mdaksaa ava kchaa lamra, ungu mei thu kapkaa pthii lamra.

¹⁷Mleija Isowr pauna rek mkurkhum du khim khai, Mma poibin ktlo rangki, plungbin mkinṭim nraan, ungta saa ava hin kruwngki rutan mdo piik nraan, mmaan poibin thu Isowr ri mdo thiik pik lam.

¹⁸Ungta nah do dee snu ava dultipaam ki kruwng rek tun kpaal klin langlang khuwpii ava.”