Read Lamkang PAUPHUWN 18 Bible Online

PAUPHUWN 18 - Lamkang bible

PAUPHUWN 18

¹Hava dil tha Parwaan ki kurjung kṭum ktlok Waan tamsii khat, klinni rutan kthloi; neiji deinu, ungta dultipaam ava Mma pleuvi taanda.

²Ungta kheel siiki krowl li Mma ngi owng da, “Klin langlang Bebylon ava ktluw kcha a, ktluw kcha a! Tarnam rek amna mun, pthla ktobor khim khai kurku na, ktobor leh tipder kurhui, puwa rek kurbu na kurthuwkka.

³Mleija chati rek mkheng ngi mma ki kbuwr kanthle ktardou ki ju pri nlamda ungu dultipaam ki kruwng rekki mma tu kturkui chlamda, ungta dultipaam ki sumdowl klou rekki mma dongei thu suwang thuw nlam da.”

⁴Au dilli neiji Parwaan ki krowl khat kdo aryaak ava ngi kihin theda, “Nei kmii rek, naanni mma pnu ton ado arvee ṭhi ma nraan, mma leenki tngana rek ado phaak ṭhi ma nraan, mma thungki thuwk dok in.

⁵Mleija mma pnuton ava parwaan kpha dekki, kchuwng ngi mpurtuwlla, ungu Isowr ri mma pnu arvee mbin phaakka.

⁶Mma ngi ado tpiik chaak in lulu ngi mma hin apiin, ungu mma nong tlot rek ava, sruk khat apkheel inra apiin; mma ngi mdo purchuwmna tong ava thu, sruk khat kheelli apurchuwm pik in.

⁷Mma ngi mdaksaa kpunlor da mdo ngei thu mlet lulu ngi, kja kakham leh kurnung karbaang apartee inra mhin apiin. Muplung ril thu mma ngi, kruwngnu khatti kuk ong ping dida theda, ‘Neia meikhunu pmaang, kurnung karbaang dei liit nimaang.’

⁸Mma ki tngana rek ava nit khdaat thu, omlai, kurnung karbaang, poitham kthleng ra, ungta mma ava meiji kukbung chra; mleija mma kekṭewl Mukpu Isowr ava kapchaang riim.”

⁹Mma tu kturkui kcha, ungu mma dongei kngei ṭhi, dultipaam ki kruwng rekki mma ava meiji kṭuwng mdo dee lei inni, ṭap lam donle kurnung karbaang lamra.

¹⁰Mma suwkthuw kṭi kcha ngi leer khatti mmaanni rip lam donle ungu kthe lamra, “Suwkthi palo! Suwkthi palo! Klin langlang khuwpii nang, kapchaang riim khuwpii Bebylon! ṭhang khdaat thu nang nga atikṭewl la.”

¹¹Ungta dultipaam ki sumdowl klou rekki, mma tummi ṭap lamda kurnung karbaang lamma, mleija ku khat lee ngi mmaan dojur dona ren pik lamme.

¹²Jeering, thiir kpowl, lung mman klu, sumbuwr, plaabuw, ktarnaal dangdang mikrim kdi ding mkheng, hol dona mkheng, thiir kvom, thiir, likli,

¹³satee howk, mroi, tapkaak thu mkrim ka am, myrrh tdit reidii, thao mkrim kdi, ju, thao, jaam mman klu, kehu, sil, Jao, skowl, ungu skowl kari, suwk rek, tditta dultimii raothla rekka havale.

¹⁴“Nah araothla do ngei thei rek ava nah athungki ksun kcha a, ungta nah alrou rek leh kipleu dang ngi akunlor chaak ava kmawng kcha a, tphaak chaak nowl liit rang me!”

¹⁵Snu hava thungki alrou kpha kcha rek, hava dona rek sumdowl klou cha rekki, mma jat kham kṭit pikki leer khatti rip lamda ṭap lamda, ungu kdung ngi kurnung karbaang chlam da.

¹⁶“Suwkthi palo! Suwkthi palo! kning ngi ksen leh ksen rei rui dona mman klu ktarnaal dangdang ngi kirsim, jeering, lung mman klu, sumbuwr ri kirsim klin langlang khuwpii daat lo!

¹⁷ṭhang khdaat thung ngi hava alrou mkheng nga do ksi kma kuplowm kcha a.” Ungta truwn biing ngi mdowllo in mkheng ka am chdaat, arkuwngpii kpupa rek leh kipjiin rek, ungu arkuwng kthou miirek mkheng ngi leer khatti rip lamda,

¹⁸mma kukbung meikhut mdee in thungta owng lamda ṭap lamda, “Khuwpii kling langlang ava hep daat tak ka am rangda?”

¹⁹Ungta mmaanni mluw tun inni vaiphul kurbuk lamda, ṭap lamda ungu kurnung karbaang lamda owng lamda, “Suwkthi palo! Suwkthi palo! Klin langlang khuwpii truwn thu ka am arkuwngpii kthloi mkheng nga mma alrouvi suwang kthuwk cha! ṭhang khdaat thu do ksi kma kuplowm kcha a.

²⁰O parwaan, mma tun kanpa cha, O kintiing rek, ungta kenyee rek leh khulpu rek, mleija Isowr ri mma raal piida makṭewlla!”

²¹Au dilli kapchaang riim Waan tamsii ngi klin langlang chakkri lung hep daat, lung khat chomda truwn thu var pthiida, theda, “Ava leiji klin langlang khuwpii Bebylon ava muplung thit tu kilṭhi ngi kvar pthiira, ungu vei khat am kurnowl chnime.

²²Ungta nah athungki tingsai kdum rek, laa kthe dei rek, riiseem kdum dei rek, ungta peengkhul kdum dei rek, ava nah athung ki vei khat aryaa kurnowl chnime; ungu do khim khai dim knei miilai ava nah athung ngi veikhat am nowl nime; ungu chak kri lung archaang ava nah athung ngi vei khat am nowl nime.

²³Ungta meila kleng ava nah athung ngi vei khat am nowl nime; ungu kphalnuh leh pah ava nah athung ngi vei khat taryaak nowl nime; mleija nah sumdowl klou rekka dultipaam thungki klin mii rek lam, ungu chati mkheng nga nah amit trang ngi ado huwn chaak na.

²⁴Ungta khulpu rek leh kintiing rek hii ava mma thung ngi phangda, ungu dultipaam thu mdo eayo mkheng ruk mphaakka.”