Read Lamkang PAUPHUWN 19 Bible Online

PAUPHUWN 19 - Lamkang bible

PAUPHUWN 19

¹Hava diltha Parwaan ki mii knempok krowl kparyaa nei kdo aryaak ava ngi theda, “Hallelujah! Nenki Isowr hin kirliinna leh laarnee ungta rutan ka amma!

²Mleija Mma do kṭewl la mkindit ungu kindit deek kurthuwk; kturkui kcha ngi dultipaam kpubuwr klin langlang mma ava Isowr ri makṭewlla, ungu msra owr rek hii ava Mma ngi mma tunni mphuw mlo a.”

³Veikhat nowlli Mmaanni owng lamda, “Hallelujah! mma thungki meikhutta kṭuw knai liit kma ksun kcha a.”

⁴Tku onna leenni kuk ong Isowr ava kver rek som knii lei plii leh kring saa rek plii ngi kuwn lamda luwbuk lamda theda, “Amen. Hallelujah!”

⁵Ungta tku onna leenki krowl khat thleng da, owngda, “Mma sra owr rek naan akheng, Mma kṭi klin kdil mkheng rek, nenki Isowr apanpaak chaan.”

⁶Au dilli klin langlangki kurtuwl krowl hep daat neiji aryaa nu, dii knempok kluwng archaang hep daat, ungta kdung ngi pṭeek kpuwk archaang hep daatti, owngda, “Hallelujah! Mleija kapchaang riim nenki Mukpu Isowr ri kpaalra.

⁷Nenni kanpa in chera kdung panpaak da ungu punlor in che, mleija Jaonao ki kphal ava kurjung nga, ungu kphalnu ngi mdaksaa kirsimma.

⁸Mma ava plabuw ktarnaal dang ngi kipleu, ungta Kchiir ri mkirsim ra mrot pikka.” Mleija plabuw ktarnaal dang ava kintiing rek rinkindit nongtlot.

⁹Ungta Waan tamsii ngi nei ki hin theda, “Hava akjit cha: Jaonao kphal kmaal thu kowl mdo lat rek ava msuwkṭha.” Ungta Mma ngi ki hin theda, “Hava lea kindit kat ki Isowr pauna rek lam.”

¹⁰Au dilli neiji mkhu therri luw kbuk ra kuwn chnu, pdainu Mma ngi kihin theda, “Nang ngi ava ado tlot rang pme. Nei rukka Jisu rinpaumin kurpom nangki a u anao rek leh nang tung ngi sra owr tkurthut sap in,” Mleija Jisu rinpaumin ava Pthla do phuwn.

¹¹Au dilli Parwaan kparvang neiji deinu, ungu asuw in, skowl kpowl khat. Ava leenni kuk ong Mma ava trin chaak kurhui ungu kindit, ungta rinkinditti Mma ngi kṭewlda rawl karnaak ṭhi kurthuwk.

¹²Mma mik ka mei kṭuwng lulu, ungu mluw tun laar luwkhum knempok amda; ungta Mma mdaksaa daat kma donle ku mii khat lee dodee pchaan ma tikjit miing khat amda.

¹³Mma ava hii thu tpuhuwm dona ngi kirsim da, Mma mdo ownna miing nga Isowr pauna.

¹⁴Ungta Parwaan ki rawlmii rekki skowl kpowl leen tuwng lamda, plabuw ktarnaal dang, kpowl ungu Kchiir naa lamda mdil ṭoi lamda.

¹⁵Chati rek mdo suryo nrangki mner thungki kaang ksaang kraang jap khat thuwk da, ungu Mma ngi thiir kchung tu kilṭhi ngi kpaalra; kapchaang riim ki Isowr plung thitti rik rou dii mdo sowmna ava Mma ngi kther pthiira.

¹⁶Mphrik kturrown tun leh mphei tun tik kjit kruwng rekki Kruwng, Mukpu rekki Mukpu tdit miing khat amda.

¹⁷Au dilli kniw thu krip daat Waan tamsii khat neiji deinu, ungta kjuwng puwa rek mkheng nga Mma ngi krowl kparyaa ngi own da, “Arhang in, Isowr kmaal klin langlang tummi kurkuk in!

¹⁸Kruwng rek daksaa, rawlmii ki ber ksu rek daksaa, kapchaang miirek daksaa, skowl rek leh ktuwng rek daksaa, kintek leh suwk mikniing, klin leh kdil mikniing, mkheng ki daksaa kchaara thuwk in.”

¹⁹Ungta skowl tun ktuwng Mma leh Mma rawlmii rek rawl karnaak ṭhira, saa ava ngi dultipaam ki kruwng rek tu kilṭhi ngi rawlmii rek tu kurkuk neiji deinu.

²⁰Ungu saa ava leh saa ava kbiinam karlaang rek ungu ava pthla luwkbuk rek, titinna nong mdo tlotti mdo huwn chaak, kindit kma khulpu rek ava kjowng lamda, havale knii ava kantup mei kṭuwng thu mikring daat inni var pthii lamda.

²¹Ungta angṭhe ava skowl tun kuk ong ner thungki kthuwk kaang ksaang ngi suryou tir lamda; ungu puwa rek mkheng nga mmaan dak kluwng ngi mpoi in paa chda.