Read Lamkang PAUPHUWN 2 Bible Online

PAUPHUWN 2 - Lamkang bible

PAUPHUWN 2

¹Ephisia thungki Rinlop tamsii hin akjit: Mkhut chang ktong tha bursi tikheu ksin jeering meila tikheu krip ava arlakki kchet Mma do the pauna rek ava hava.

²“ ‘Anong tlot anong palren ungu kdung ngi ado diil chaak, pdainu kṭha kma miirek ka diil pchaang mti, ungu kenyee rek in ping dida karthe rek ava ado pirsin ndok lam, pdainu ava kma ava kindit kma rek tdit nang ngi ado dee.

³Nang ngi kdung diil chti ungta Nei kmiing ngi ado tuhur pik ava arda pthit liit mti tdit Neiji kdeea.

⁴Pdainu hava ngi nang nga araal akpiik ka, tditta nang ngi ru kri ki thokki wonsat ava amaak pthiia.

⁵Tak thu ktlu cha pti tdit abin phaak cha, plung ren ahur cha, ungu ru kri ki anong tlot ava atlo cha. Nang ngi plung ren ahur mabi, Neiji nah hin arjung nik di, ungta nah ameila rina ava mmun thungki lou pthii nik di.

⁶Anto daat joso nah ado thloi ava Nei ruk va kdo pder chaak, Nikolaitia rek nong tlot ava apder cha.

⁷Rinlop rek hintha Pthla do the ava knaa ka am mii ava ngi aryaa chso. Ava kapchaang miia Isowr paradais tha ka am, rinkhu ki dingchui kchaa Neiji rot pik nik di.

⁸“Ungta Smyrnia thungki Rinlop hin ak kjit pik: ‘Diyou thida kring kinle, ru kri reep ki ungu mṭut na pauna ava hava.’

⁹“Nah asuwkthuw leh asrat thuw ava Neiji kdeea Pdainu nang nga suwang pti ungta Judia rek in ping ngi dida kirthe mmaan ni titi pau athe psuk da pdainu mmaanna seitaan ki synagog rek lam.

¹⁰Nang ngi ajat kham ra ava ṭi chma. Asuw, naan mii angṭhea dijabowl li ado tpirsin naanni rowng inn thu akvar pthii raan kirsimma ungta nii sowm thu naanni suwkthuw pha naandi. Kdiyou kpha thu nang ngi trin chaak kurhui cha ungu Neiji rinkhu ki laar luwkhum apii chnik di.

¹¹Rinlop rek hin Pthla ngi mdo the ava knaa ka am mii ava ngi aryaa chso. Kapchaang dok mii ava mvei knit naki kdiyou ava ngi lim nime.

¹²“Ungta Pergamum thungki Rinlop tamsii hin ak kjit pik: ‘Kaang ksaang mhaa knii kraang jam Mma pauna rek ava hava.’

¹³“Nah a amna mun ava Neiji kdeea, ava thung ngi seitaan ko onna ka am, nang ngi Nei kmiing arpom mer chti ungta seitaan rek amna, naan arlakki mdo eayo dok, Neiki trin chaak kurhui khat, Antipas nit rek thu sakhi atpiik pik mpha thu nang ngi ado trin chaak thu mat liit mti.

¹⁴Pdainu Neiji araal ado kpiik ra mruk ka amma: ava tha Balam do purchu kurpom mii angṭhe athloi daatta, tditta khut do sak pthla hin tlaai mdo down ava kchaara, ungu pang turkuiji mturkui chaak nraan, Isreel chapa rek maiṭhuwm mi khusiir mdo parthit nraan mma ngi Balak purchuk da.

¹⁵Ava leiji nang rukva Nikolaitia rek do purchu kurpom mii angṭhe athloi daatta.

¹⁶Ava leiji plung ren ahur cha. Anto mkurthut mabi, Neiji nah hin kbeiji thleng nik di ungta Nei kner ki kaang ksaang tu kilṭhi ngi rawl karnaak ṭhi lam nik di.

¹⁷Pthla ngi Rinlop rek hin mdo the ava knaa ka am mii ava ngi aryaa chso. Kapchaang mii ava hin tha kurdowl manna ava pii chnik di, ungta lung kpowl khat, ungu lung ava tun ni miing ren khat tik kjit Neiji mhin pii chnik di. Karlaang chra mii ava kma donle ku khat lee ngi ava dei me.

¹⁸“Ungta Thyatiria thungki Rinlop tamsii hin ak kjit pik: mei kṭuwng hep daat mmik kthloi, ungu mkhu ava thiir ksen uwm tukno dang hep daat Isowr Chapa ki pauna rek ava hava.

¹⁹‘Nah anong tlot rek, nah awonsat ungu ado rin chaak, ungta asok lo, ungu kdung ngi ado diil chaak, ungta nah anong tlot rek dil ki avangi ru kri ki ado pkheel Neiji kdeea.’

²⁰Pdainu Neiji araal ado kpiik nra hava ka amma, tditta mdaksaa mthina ngi khulpii ping kirdi kcha snu Jeyebeel ava nang ngi rot pik tinu, ungta mmava pang turkuiji kturkui kcha ungu khut dosak pthla hinki tlaaidown ava kchaara Nei ksra owr rekka purchuk lamda ungta lele tha mṭhi pthii lamma.

²¹Mma ngi plung ren mdo hur nra mpha kdo piik, pdainu pang turkuiji kturkui kcha thungki plung ren kuhur ra ava mma ngi pthlei da.

²²Asuw, mmaanni mma nong tlot thungki plung ren mhur maan bi, mma ava kowm tun ni kukoi daatti var pthii nik di, ungu mma tu kilṭhi ngi losang kṭhi rekka klin langlang ki suwk kthuwk thung ngi var pthii lam nik di.

²³Ungta mma naole ava preiyou tir lam nik di. Ungu poibin leh plungril kthlaam ava Nei tdit Rinlop rek mkheng inni kdei lamra, ungta naan nong tlot dil kṭoiji naan mii pum ktai hin Neiji pii nik di.

²⁴Pdainu Thyatiria ki mii angṭhe hava mdo purchu kurpom kma, seitaan ki kukthuk pau pi dida mii angṭhe ngi mdo the, ava kurchuk kma, naan ava hin Neiji kthea, naan tun tha bowr krik murson Neiji thii nimaang.

²⁵Nei kurjun du khim khai ado thloi daat in ava knetti arpom chaan.

²⁶Mṭut na kpha dekki kapchaang ungta Nei knong rek karkhii mii ava hin chati rek tun tha mrutan in Neiji pii chnik di.

²⁷Ungu tnek beel mlek mlekki kukui kcha lulu ngi, Nei kdaksaa kat daat ruk va Kpah hinki rutan kdo arlaan chaak heppi, mma ngi mmaan ava thiir kchung ngi kpaal nlamra.

²⁸Ungta Neiji mma hin vaarpa bursi pii chnik di.

²⁹Rinlop rek hin Pthla do the ava knaa ka am mii ava ngi aryaa chso.