Read Lamkang PAUPHUWN 20 Bible Online

PAUPHUWN 20 - Lamkang bible

PAUPHUWN 20

¹Au dilli Parwaan ki ktlok Waan tamsii khat kurjung kṭum neiji deinu, mkhut thu ti knung rel khur ava chungkam leh thiir rii klin khat sinda.

²Ungta Mma ngi ruwlrew tditta alraangki pruwl mdo dit dijabowl leh seitaan kjowngda, kum punkhat tummi bowl lamda.

³Ungu khur thu var pthii lamda, ungta kum pun khat mphaak du khim khai, chati rek ava mdo huwn chaak nowl lamma nra, khur ava arkam thida mleen kbii namda. Au diltha mpha mruk tummi mma ava kparthle pik chra.

⁴Au dilli neiji tku onna rek deinu, ungta mleen kuk ong rek hin kekṭewl rutan pii landa. Ungu Jisu rinpaumin tum leh Isowr pauna tummi mluw mdo reen rek, ungta saa, mdit mata pthla luwkbuk kma rek ungu mapchel leen mdit mata mkhut leenni kbiinam karlaang kma rek mmaan raothla rek rukka neiji deinu. Mmaanni rinkhu pha chlamda, ungu kum pun khat thu Khrista tu kilṭhi ngi paal lamda.

⁵Kum pun khat mṭut du khim khai kdiyou mii angṭhe rukva rinkhu pha lamme. Hava ru kri thokki kring karheel kurthuwk.

⁶Ru kri thokki kring karheel cha thu mtum kpha rek mii ava msuwkṭha ungu Kchiir. Hanto lulu ngi mvei knit naki kdiyou rutan ame, pdainu mmaanna Khrista leh Isowr ki thiimpu rek kurthuwk lamra, ungu Mma tu kilṭhi ngi kum pun khat kpaal lamra.

⁷Ungta kum pun khat mṭut dok mpha thu, seitaan ava rowng inn thungki kparthlet ra.

⁸Ungta dultipaam markil plii thungki chati rek kuhuwn chaak arhang kthuwk ra, tdit ava, Gog leh Magog, rawl karnaa rang ngi karchin lamra; mmaan msing ava truwn thungki sitphui jangi knem.

⁹Ungta mmaanni dultipaam mkheng thungki thuwk lam donle kintiing rek amna sang leh nwonsat lo in khuwpii tukhul lamda, pdainu parwaan ki mei arjung ṭumda, ungu pka pthii lamda.

¹⁰Ungta mmaan kuhuwn chaak dijabowl la saa ava leh kindit kma khulpu rek am ndaat kantup mei kṭuwng duwm thu kvar pthiira, ungu mmaan na kṭuw knai liit kma suwnjaan knai kma suwkthuw kpha chlamra.

¹¹Au dilli neiji tku onna kpowl dang tunni kuk ong daat klin khat Mma ava neiji deinu; dulti leh parwaan ava Mma maiṭhuwmki chen chda, ungu Mma tumra mun khat lee ame.

¹²Ungta kdiyou rek, klin leh kdil ava tku onna maiṭhuwmmi rip daat lamda, ungu Laaika ava pvangda. Rinkhu Laaika leh ktlok khat rukka pvangda. Ungu kdiyou rek ka mmaan nongtlot dil kṭoiji, Laaika thu mdo kjit dil kṭoiji kṭewl da.

¹³Ungta truwnni mthungki kdiyou ava pii pthiida, kdiyou leh sim mi mthung inki kdiyou ava pii pthiida, ungu mkheng ava mma mma nongtlot dil kṭoiji kṭewl da.

¹⁴Au dilli kdiyou leh sim ava meiki duwm thu var pthiida. Mei ki duwm hava mvei knit naki kdiyou.

¹⁵Ungta rinkhu ki Laaika thu ku mii khat mmiing ktaak ava meiki duwm thung ngi var pthiida.