Read Lamkang PAUPHUWN 21 Bible Online

PAUPHUWN 21 - Lamkang bible

PAUPHUWN 21

¹Au dilli neiji Parwaan ren khat leh dulti ren khat deinu; mleija ru kri ki parwaan leh dulti ava vei dok da, ungu truwn rukka vei khat am nowl me.

²Ungu Isowr hinki Parwaan ki arjung kṭum, Kchiir khuwpii, ren Jerusalem ava mi innpu tummi kmou kirsim lulu ngi, neiji deinu.

³Ungta tko onna thungki krowl khat nei kdo aryaak klin langlang ava ngi theda, “Asuw, Isowr amna ava miirek tu kilṭhi a. Mmaan tu kilṭhi ngi Mma ava ka amra, ungu mmaanna Mma miirek kurthuwk ra, ungta Isowr mdaksaa katti kurthlo ṭhi lamra.

⁴Mmaan mik tunki arthli khim khai Mma ngi kuknuwl pik ra, ungta kdiyou veikhat amnime, mdit mata kurnung karbaang, kṭap, mdit mata kdungksaan veikhat amnime, mleija chodu ki do ava kvei dokka.”

⁵Ungta tkonna tunni kuk ong Mma ngi theda, “Asuw, Neiji do mkheng nga ren kpur owlla.” Mma ngi the nowlda, “Hava akjit, mleija hava pauna rek ka trin chaak kurhui ungu kindit kat.”

⁶Ungta Mma ngi ki hin theda, “Mtlot dokka. Neia Alpha ungu Omega, mdo pṭhunna leh mṭut na ava ping. Mning kakraal hin tha rinkhu ki diitlaang kphul thungki mman ktaak dii Neiji pii chnik di.

⁷Kapchaang rek mii ava ngi hava kpha chra, ungu Neia mma ki Isowr kurthuwk nik di ungta mma Nei kchapa ra.

⁸Pdainu kṭi dei, krin kma, ktobor, nla tartlaang ngi kturkui kcha rek, mitrang ktlo rek, khut do sak pthla luwkbuk rek, plei knei mkheng rek tum ma mei leh kantup kṭuwng duwm kurthuwk ra, ava miknit naki kdiyou.

⁹Au dilli mṭut naki tngana rek tikheu kdim jil tleengbeel mtikheuna ksin Waan tamsii tikheu thungki khat karvang ngi neia mhai karbiik ṭhida, theda, “Arhang, Jaonao ki numei kmou Neiji aju tdet ni.”

¹⁰Ungta neia Pthla ngi kdung kparthaang lown ava tun tha mhanṭhi dokda, ungu Parwaan ki Isowr hinki arjung kṭum Kchiir khuwpii Jerusalem mhai tdet da

¹¹Isowr laarnee thloida. Khuwpii ava kheel siiki mman klu langlang lungrek, Jasper tdit lung kṭil, krystal heppi kchiir dang lung.

¹²Ava klin langlang, mbang kchuwng, paltong sowm lei knii pum, ungta paltong ktaiji parWaan tamsii rek sowm lei knii amda, ungta paltong leenni Isreel chapa rek chati sowm lei knii miing kjit da.

¹³Kniw thuwna ktong tha paltong rek kdum, karthak ktong tha paltong rek kdum, kurdu ktong tha paltong rek kdum, kniw tlaak na ktong tha paltong rek kdum amda.

¹⁴Ungta khuwpii bang nga ber kcho sowm lei knii amda, ungu ava tunni Jaonao ki kenyee rek sowm lei knii miing sowm lei knii kjit da.

¹⁵Ungta nei mhai karbiik ṭhi Mmava mdo owlna jeering kchung ava ngi khuwpii ungu paltong rek, ungta mbang rek mdo owl nra sinda.

¹⁶Khuwpii ava markil plii amda, mdung leh mkam ma kinṭim chak; ungu Mma ngi khuwpii ava mukchung sinni owlda, meel pun knii arjaa plii, mdung, mkam, mchuwn ava kinṭim chak.

¹⁷Mbang rukka Mma ngi owlda, ava Waan tamsii do owl dil kṭoiva khut liing arjaa khat som plii lei plii.

¹⁸Khuwpii ava lung kchiir dang, jeering kchiir dang, kurthuwk da, mbang nga jasper tdit lung kṭil.

¹⁹Khuwpii bang ber kcho rek ka lung mman klu langlang; ru kri reep ki ava Jasper tdit lung kṭil, miknit na ava saphire tdit lung haikowk reirui, mukdumna ava agate tdit lung kpindit sirser, miplit na ava emeral tdit lung ke er,

²⁰mparngat na ava onyks tdit lung knempok tpurchuwm, mtrukna ava Kornelia tdit lung ksen, mtikheuna ava Krisolit tdit lung monaang chengchung, mtret na ava beryl tdit lung ke er, mtukut na ava topas tdit lung monaang, msowmna ava khrisopras tdit lung haituk chui lulu ke er, msowm lei khat na ava Jasin tdit lung ksen ringreng, msowm lei knit na ava omethyst tdit lung kvom chengchung.

²¹Ungta paltong rek sowm lei knii ava, sumbuwr sowm lei knii, paltong ktaiji sumbuwr khat khat. Ungu khuwpii arlakki lam ava likli heppi sekthleng ringreng jeering kchiir dang.

²²Ungu khuwpii ava thu luwbuk Inn khdaat pre neiji dei chmaang; mleija luwbuk Inn ava kapchaang riim Mukpu Isowr leh Jaonao.

²³Ungta khuwpii ava mleen ni kniw mdit mata thla len nra ame, mleija mar awng ava Isowr laarnee ungu meila ava Jaonao ava.

²⁴Ava ar awng ngi chati rekka kchet ra; ungu dultipaam ki kruwng rekki mlaarnee in ksin lamra.

²⁵Ungta suwnni paltong rekka arkam liit nime, ungu ava thang va jaan tdit amnime.

²⁶Ava thu mmaanni chati rek do panpaak leh do kjat na ksin lamra.

²⁷Pdainu ktobor, mdit mata tipder nong ktlo, mdit mata kar mak nong ktlo khat lee pre mthung ngi klut ronime, pdainu rinkhu ki Jaonao Laaika thu mdo kjit rek daat ra.