Read Lamkang PAUPHUWN 22 Bible Online

PAUPHUWN 22 - Lamkang bible

PAUPHUWN 22

¹Au dilli Isowr leh Jaonao ko onna thu, lik kli kchiir ringreng rinkhu dii kreng,

²khuwpii arlak thungki mlam ṭimmi mhai tdet da; kreng raalpha khat ktong thang rukva, mthla ktaiji thei kchui, rinkhu ding msik msik thei sowm lei knii ngi kchui khat amda; ungta ava ding arnaa rekka chati rek dam chaak na.

³Pauhur tdit do khat lee ame, vei khat amnime, pdainu Isowr leh Jaonao ko onna ava thung ngi ka amra, ungu Mma sra owr rekki Mhin luwkbuk chlamra.

⁴Mmaanni Mma maiṭhuwm kdei chlamra, ungu Mma miing nga mapchel tun inni ka amra.

⁵Ungu jaan veikhat amnime; meila mdit mata kniw ki mar awng kriing lam nime, ungta mmaan na kṭuw knai liit kma kpaal chlam ra.

⁶Ungu Mma ngi ki hinni theda, “Hava pauna rekka trin chaak kurhui ungu kindit kat kurthuwk. Ungta khulpu rek hin pthla kpii Mukpu Isowr ri kbeiji kthuwk rang kat ava msra owr rek hinni ktidet rangki Waan tamsii khat arju siida.

⁷Ungta asuw, Neia kbeiji arjung nik di.” Hava Laaika rek dophuwn pauna rek karkhii kcha mii ava msuwkṭha.

⁸Johon neiji havale ava aryaa nu ungu kdo dee chaak kurthuwk. Ungta neiji aryaa nu kdee chaak mpha thungva havale mhai ktidet kcha Waan tamsii ava neiji luwkbuk ra mkhu therri kuwn chnu.

⁹Pdainu Mma ngi ki hinni theda, “Nang ngi ava ado tlot rang pme! Nei rukka nang leh nangki a u anao khulpu rek ungu hava Laaika ki pauna rek karkhii chrek sra owr sap in pmin. Isowr luw abuk cha.”

¹⁰Ungta Mma ngi ki hinni theda, “Mpha mtoi tek leiji, hava Laaika thungki pauphuwn ki pauna rekka kbii namma.

¹¹Kṭha kma nong ktlo miiva atlo thlit chdaat so, ungu ktobor mii va tbor thlit chdaat so, ungta rinkindit miiva kindit nong atlo thlit chdaat so, kchiir miiva chiir thlit chdaat so.”

¹²“Asuw, Neia kbeiji arjung nik di, ungu Neiki mnah ava mii pum ktaiji mma mma nong tlot dil kṭoiji Neiji arjun sin pik nik di.

¹³Neia Alpha ungu Omega ping, ru kri ver ungta dil knau mdo pṭhunna ungu mṭut na ava ping.”

¹⁴Mphrik ktur rown kursu kcha mii ava msuwkṭha, tditta rinkhu ding ava hintha kindit mdo phaak chaak nraan, ungu khuwpii ava paltong rek thu klut chlamra.

¹⁵Duwn ki rekka uirek, mitrang ktlo rek, nla tartlaang kturkui rek, mii ke eayou rek, ungu khut do sak pthla luwkbuk rek, ungta kar mak ava wonsat loda ktlo mii pum ktai rek lam.

¹⁶“Jisu Neiji nah hinni Rinlop rek tumra hava rinpaumin tu kilṭhi ngi Neiki Waan tamsii kju siia. Neia Devid arjung ungu mcharuwl, jiingsun ki bursi vaarpa kleng dang ava ping.”

¹⁷Pthla leh kmou ava ngi theda, “Arhawng,” Ungta karyaa mii ava ngi “Arhawng,” kdingi atheso. Ungu ning kakraal mii ava ngi arhawng so, mman ktaak rinkhu dii ava kbin kcha rekki alou chlam so.

¹⁸Hava Laaika thungki pauphuwn ki pauna rek karyaa mii pum ktai ava hin neiji pau kaktham chaakka: ku mii khatti mto pombi, hava Laaika thung ngi mdo the tngana rek ava Isowr ri kto pom pik ra.

¹⁹Hava Laaika thungki pauphuwn rek pauna ava ku mii khatti mlo pthii bi, hava Laaika thu mdo the rinkhu ki ding leh kchiir khuwpii thungki mtum ava Isowr ri klou pthii pik ra.

²⁰Havale sakhi kpii Mma ngi theda, “Kinditti Neia arjung kat nik di.” Amen. Arjung, Mukpu Jisu.

²¹Mukpu Jisu ki plungnee ngi kintiing rek mkheng nga aṭhi cha so. Amen.