Read Lamkang PAUPHUWN 3 Bible Online

PAUPHUWN 3 - Lamkang bible

PAUPHUWN 3

¹“Ungta Sardis thungki Rinlop tamsii hin ak kjit pik: Isowr Pthla rek tikheu ungu bursi rek tikheu kthloi Mma pauna rek ava hava. “Nah nong tlot ava Neiji kdeea, kring miing nang ngi athloija, ungta nang nga kdiyou kchaam ti.

²Ekardel, ungu kdiyou rang ngi ka am daat mkekleem rek ru aptan pik lam, mleija Neiki Isowr maiṭhuwm mi nah nong tlot mkinreel Neiji pha chmaang.

³Nang ngi ado arlaan chaak ungu ado aryaak dok ava abin phaak; ava arkhii cha, ungta plung ren ahur cha. Nang ngi akardel chaak mabi, kup pru lulu Neia arjung nik di, ungu talu ṭhang thu Neiji nah tun ni arjung nik di tdit dei nimti.

⁴Anto daat joso mdo mna kbuwr kma mii ktlowm suwn Sardis nang ngi athloija; ungta kpowl dang dang ngi mmaanni neia muktlown ṭhi lamra, mleija mmaanna kurhui lam.

⁵Kapchaang rek ava hanto lulu ngi dona kpowl pnaak lam nik di, ungta mma miing ava Neiji rinkhu ki Laaika thungki knuwl pthii ni maang; mma miing nga Neiki Kpah ungu Waan tamsii rek maiṭhuwm mi the thut pik nik di.

⁶Rinlop rek hin Pthla ngi mdo the ava knaa ka am mii ava ngi aryaa chso.

⁷“Ungta Philadelphia thungki Rinlop tamsii hin mdo the ava ak kjit pik: Kchiir khat, kindit khat, Devid chungkam kthloi, mdo pvan ava ku khat lee ngi mdo arkam pchaan ma, mdo arkam ava ku khat lee do pvan pchaanma, Mma pauna rek ava hava.

⁸“Neiji nah nong tlot rek ava kdeea. Asuw, ku khat lee do pvan pchaan ma thurngot khat kparvang Neiji nah amaiṭhuwmmi akthiik pikka; pdainu rutan ktlowm suwnni ado thloi ava Neiji kdeea, anto chdaat joso nang ngi Nei kpauna rek arkhii ti ungu Neia mmat mti.

⁹Asuw, Jihudia rek in ping ngi kirdi lam thida anto kma rek pdainu pleiknei rek ava Neiji seitaan ki synagog tpurthuw lam nik di. Asuw, Neiji mmaan ava nah hinni tipthleng lam nik don, ungu nah akhu therri luw apbuk lam nik di, ungta neiji nang wonsat ado klo ava mmaanni kdei lamra.

¹⁰Nang ngi Nei kpauna rek ava kdung ado diil chaak leiji, dulti tun ka am kpirsin rek, dultipaam mkheng thu kurjungra suwk kthuwk avaki ṭhang thu Neiji aju knen pik nik di.

¹¹Neia kbeiji arjung nik di; ku khat lee ngi nang ki laar luwkhum ado tulown chaak ma nra, ado thloi daat ava knetti arpom cha.

¹²Kapchaang mii ava neiki Isowr luwbuk Inn thungki kcho khat tpurthuw nik di; mma ngi ava thungki duwn thuwk liit nime, ungta mma leen Neiji Neiki Kpah miing, Kpah ki khuwpii, Parwaan ki Nei Kpah hinki kurjung kṭum ren Jerusalem ungu Nei kdak kat ki ren miing ava kjit pik nik di.

¹³Rinlop rek hin Pthla do the ava knaa ka am mii ava ngi aryaa chso.

¹⁴“Ungta Laodesia thungki rinlop tamsii hin mdo the ava ak kjit pik: trin chaak kurhui ungu rinkindit sakhi rek, Isowr do seem daat ki mdo pṭhunna, Amen ki pauna rek ava hava.

¹⁵“Nah nong tlot rekka Neiji kdeea, nang nga tsat ruk sa mti tdai ruk dai mti, kdai mdit mata ksa kurthuwk!

¹⁶Ava leiji, nang ngi tdai ruk kdai kma tsat ruk ksa kma klum tuwm tuwm akurthut leiji, kner thungki Neiji aju pthot pthii nik di.

¹⁷Neia suwang ping, alrou kdo thloi pok, ungu do khat lee kriing maang; diti nang ngi ado the leiji, nang nga do ksi kma wonsat kurhui rak,sra, mik ktot, ungta adak chai daatti a am rang nga dei cha mti.

¹⁸Ava ngi mlei kurthuwk da, nang ngi Nei ki hinki mei do pchiir dok jeering, tditta nang ngi suwang akurthuw nra, ungu dona kpowl ado naak chaak nra, ungta ningkja naki adakchai ado dowl nra, ungu ado dee nrangki amik ava thao ado tpubul nrangki, Nei kihin ki ado ren chaak nra akthe pikka.

¹⁹Neiji won kdo psat rek rek mii ava trai ruk kdo rai tarchak ruk kdo archak; ava leiji khei athe nra plung ren ahur cha.

²⁰Asuw, Neiji thurngot bulli rip nu kipreija; ku mii khatti Nei kukrowl aryaa da thurngot mpvan bi, Neiji Mma thung ngi arjung nik di, ungu then chaak ṭhi nik di, ungta Mma Neitu amve nikaan di.

²¹Kapchaang mii ava, Nei kdaksaa katti pchaang nu ungta Kpah ku onna tun Mma tu kilṭhi ngi kuk on in lulu ngi, Nei tu kilṭhi ngi Nei kuk onna tun kuk onve nraan Neiji rot pik nik di.

²²Rinlop rek hin Pthla do the ava knaa ka am mii ava ngi aryaa chso.”