Read Lamkang PAUPHUWN 4 Bible Online

PAUPHUWN 4 - Lamkang bible

PAUPHUWN 4

¹Hava diltha neiji suw nu, ungbi asuw in, Parwaan tha thurngot kparvang da! Ungta peengkhul khat krowl heppi nei kihin kpau bing, ru kri reep ki krowl ava ngi theda, “Hava tha arhang kal bet, ungu audilli kthuwk ra nong khim khaija neiji aju tdet ni.”

²Mpha ava kat thu neia Pthla ngi am chnu, ungta asuw in, Parwaan tha tu ko onna khat rip daat da, khatta tkonna tunni ku ong daat da.

³Ungta ava tun ni kuk ong Mma ava Jasper tdit lung kṭil leh karnelia tdit lung ksen hep daatti kandang da, ungu emeral tdit lung ke er mman klu lang lang tdee ava heppi mku onna ava kowllisa ngi tukhul dokda.

⁴Muku onna ava tkonna rek som knii lei plii ngi tukhul dok da, ungta tkonna rek tun thangva kver rek som knii lei plii ku ong lamda, kpowl sippi kirsim lamda mluw in tun jeering luwkhum khum lamda.

⁵Mukonna thungki kowl kiplek, ungu pṭeek kpuwk krowl thuwk da, ungta Isowr Pthla rek ava mku onna maiṭhuwmmi meila choi tikheu vi ṭuwngda.

⁶Ungta mku onna maiṭhuwm mi kchiir dang truwn thungki likli hep daat khat amda. Ungta mku onna tupkhul jikda, mdil mdu msiir ri, mmikki pum dimmi kdim kcha kring saa rek plii am daat lamda.

⁷Ru kri ver ki kring saa ava humpii smang hep daat, miknit na kring saa ava silpa hep daat, mukdum na kring saa ava mmaija miilai mai hep daat, ungta miplit na kring saa ava kjuwng pliim hep daat.

⁸Ungu kring saa plii ava pthla truk ruk mdo thloi in ava mmik rekki tupkhul jikda ungu mthung thang rukka mmikki pum dimmi dim chda, ungu suwnjaan knai liit kma pring lamda. “Kchiir, Kchiir, Kchiir, ka am dok, ka am bing, ungu kurjung ra, Mukpu Isowr ava kapchaang riim kurthuwk!”

⁹Ungta kṭuw knai liit kma ka am, mku onna leen kuk ong daat Mma ava kring saa rekki mlaar pnei lamda, kjat punlor lamda ungu mpanpaak in khim khai thu,

¹⁰kver rek som knii lei plii rekki mku onna leen kuk ong Mma maiṭhuwm mi kuwn lamda ungta kṭuw knai liit kma Mma ava panpaak lamda; mmaanni mlaar luwkhum in ava mku onna maiṭhuwmmi var lamda, laa the lamda.

¹¹“Neen ki Mukpu ungu Isowr, Nang nga laarnee ungta kunlor ungu, rutan karlaang ra kurhui sii pti, mleija nang ngi do mkheng ado seem. ungu Nah plungbin ni do mkheng nga amda ungta ado seem dok kurthuwk.”